وأنا لي وجه ٍ من الغربـة كئيـب

......... والمشاعر داخلي فيهـا ذبــول

تسأليني وأسئلك ويـن المجيـب

.......... وأسئلتنا جـاوزت كـل العقـول



عبدالرحمن الربيّع

صباح اشحذ فقر قوتي صباح الرزق مـن بـدري
نفض جسم الفجر شرشف نعاس وحلـم مترامـي


نهضت اغسل ارق نومي قلق خاوانـي بصغـري
وقمت اكنس من الشارع (بقايـا) احبـاط بايامـي


عشان امسح (وسخ) عثّر خطاوي كل مـا تطـري
على دروبي تثاقلهـا الطريـق وحـارت اقدامـي


اخاف ان هدني وقتي وروّح مـن يـدي عمـري
يجي بعدي بشر كانـت امانيهـم علـى اوهامـي


لجل هذا اروح (اكرف) وازاوج فجري بعصـري
الين اصرخ من الضيقة يا انا يا انتي يـا احلامـي


واذا حسيت بانفاسـي ابـد ماهـي علـى خبـري
ابوس الكف واتحمد وانـا ابنـي طوبـة اعوامـي


ولا استطعم من اللقمة الـى منهـا بـدت تسـري
سوى لا خالطـت منـي عـرق ينـزاح بابهامـي


كفاحي يـا بلـل ثوبـي /تجاعيدي/تعـب ظهـري
يا أسود بـرد لحّفنـي وطـاول ابيـض عظامـي


يا آه اللي مشى لكـن دروبـه عنـه مـا تـدري
يا آه الغيم لحظة ما يداعـب لـه جسـد ضامـي


هنـا والارض بوابـة جـراح ومعبـري حبـري
ولقمة جوعي حروفي... وركض الرزق الهامـي


يصبرني على الممشا ويهيج احساس في صـدري
وكل ما جيت لي ارض ٍ كتبـت آثـار لحطامـي


يا نفسي وش ورى الدنيا اذا كـان المـدى قبـري
وانا فـي كـل تنهيـدة اشـوف المـوت قدامـي


واذا كان البشر تفهم .. وش اقصد من ورى شعري
تطير ارواحها من قبـل تاصـل لحظـة ختامـي


مسا..أشحذ فقر قوتي .. متى موتي يجـي بـدري
واصير بجانب احلامـي جسـد للنـاس مترامـي



حيدر الجنيد