مسا ليل السفر يحكي سوالف من عبث تموز = على حضن الوداع اليوم وعيونك على الجيّه
مسا ليل السهر يسري على صوت الشجن فيروز = أسابق صوتها يمّـك ورجعني الحزن ليّه
مسا ليلٍ فتح صدره على \يمكن \ لـعـل \يجوز = (أشوفه عقبها!) والاّ (تطوّل غيبته ذيّـــه!)
بقت ذكرى وداعه لي رساله والاسم بــرموز = وكلامٍ كل ماقاله: تحسس رجفة إيديّه
غفيت أحضن تذاكر لوعتي مدري الجروح بروز! = تلوّت بي جروح جداد عقب جروح منسيّه
تمنن بي رجاوي الياس وعثرة حظي المحجوز = بقى وجه الرجا يفضح ملامح ياس مخفيّه
كذا ترحل وتنزع قلب من جوف الصدر مغروز؟ = ولك في داخلي ميّة وطن وبلاد محميّه؟!
أنا من ليلتك أحكي سوالف عطرنا للـ (روز) = إلين الصبح يتنفس سوالف ليل عطريّه
تفوز بجيّتك روحي وشوف العين بك بيفوز = فدا جيّتك روح مزون .. وكل سنينها الحيّه
ابدوية موتها دونك ومن دون الغلا المركوز = بقى لك بالحفظ والصون .. والنيّه على النيّه