.
.
.

أركض ورا الشمس .. اللي تغيب
ابي النهار .. وينتحي
أخاف أنا وجهي إلى طاح الظلام ..
فوق الملامح .. ينمحي
كافي سواد العين .. والظل الحزين
وشمسٍ تبين .. وماتبين
ورا السحاب ..
كافي بَعْض ليلٍ يجي .. قبل الغياب
عن ليل الغياب ..

.
.
.

يا موقد الشمعة ..
وجهي أنا .. أو نور ذا الشمعة
قاسي الشحوب ..
في رعشة الضي العليل
وتكبر مسافات الهروب ..
يا صاحبي الشمعة غروب
به قريةٍ تحت الظلام .. مريتها ماجيتها
وبنيةٍ تحت الظلام ..
ورسالةٍ في الليل
خانتها الحروف .. من القهر شقيتها
كلي عيون .. وماتشوف
والناس يا ظل .. وطيوف
والظلما نسيان الحبيب .. لحبيب
أركض ورى الشمس اللي تغيب ..

.
.
.

شعاع ٍ .. يدخل الغرفة
بعد العصر ..
يزحف فوق سجادة ..
ويطلع فوق هالكرسي
ويمكن يلمس وسادة ..
ولحظة ما لمحته .. خاف
تراجع .. طاح من الكرسي
وركض .. قبل النهار يمسي
ورجع للشمس كالعادة ..

.
.
.

يذكرني .. شعاع العصر
عيونك .. تدخل ضلوعي
في غفلة من عيون الناس ..
وتمد اهدابها .. إحساس
وتاخذ قلبي .. من قلبي
تضيق بصدري الانفاس ..
ولما ينتبه واحد من الجلاس ..
بسرعة تركض النظرة
على السجاد والكرسي ..
احس ان النهار يمسي
وتغيب الشمس كالعادة ..