فنجان حزني منسكب فوق الاوراق=ياكثر ماعنّيت (نادل) قصيدي
أمسح بقايا هالحزن وأنطر اشراق=ويْسيل حبر الليل من بين إيدي
حتى امتلا الدفتر ألم /دمع/ وفراق=قلت أبَكَمِّلْ آهِتي في وريدي

تعبت أحاول أرتجي غيمةٍ فيك=قلّي متى تمطر سماك بضفافي؟
مانلتقي ,, لانك بعيد بْمنافيك=وانا وحيدة تحتويني منافي
أحيان ودي أبتعد عنْك /أجافيك=وألقاك متوسّد ضلوعي وغافي
وأحيان ودي أنتظر في مرافيك=لكن أخاف تخونني هالمرافي

مريت في بالك وطن /حلم واشعار=وانت توطّن غربتك في سنيني
فتحت لك صدر الغلا غيم وامطار=وانت الظما ترسم جفافه بديني

ليه المسافة بيننا كلها اشواك؟!=ليه الجفا يرسم ملامح سرابك؟!
ليه الوصل لو يفتح اليوم شبّاك=طارت عصافيرٍ بكت في غيابك؟!

أحتاجك الليلة / سهر ..... لاغفيتك= يهزّني كف المسا واتثاوب
واقول: منهو وقّظ الشوق؟... ليتك=تركت بعض احلام واحساس كاذب
على الأقل ألاقي شــي ان بكيتك=لو ابتسامة ذابلة بوجه شاحب
يمكن يذكّرني المســا لا نسيتك=إنه ترك بعضك / سهر.. وانت غايب

.

.
يادمعتي لا لاتطيحين... بشويش / / / شوفيه متعلّق بعيني ونايم

.


.