سر ياقلم واكتب على بيض الأوراق=إحساس قلبٍ من عنا البعد مخنوق
يسري مع الهاجس ليا لاح براق=ويجر باحزانه مواويل وطروق
كنت أحسب إن الليل يقفي بالاشراق=لكن ليلي طال ماجاني شروق
أنا أشهد إن البعد قاسي وحراق=همٍ وضيقة بال والفكر مسروق
في غيبتك هالكون ياصاحبي ضاق=شف نظرتي تكفيك عن كل منطوق
الحزن في عيني مع نار الاشواق=والقلب عقبك ياهوى القلب محروق
ليت الذي قدر مع حبنا فراق=يكتب لنا وصلٍ ويرقا بنا فوق
عزالله إني يالغلا حيل مشتاق=وان مت والله ماذبحني سوى الشوق
لاصار حبك ساكنٍ وسط الأعماق=كنه معي ياغاية الروح مخلوق
ماهو على قولة سواليف عشاق=ولا هو تسلي باسم عاشق ومعشوق
إي والله أحبك بها القلب خفاق=والحب يسري في شرايين وعروق
إي والله أحبك غلا ماهو نفاق=وإي والله إني بالهوى صرت مصفوق
أسري مع الهاجس ليا لاح براق=وأجر باحزاني مواويل وطروق
واسطر شعوري على بيض الاوراق=إحساس عاشق من عنا البعد مخنوق

الرسالة الأصلية كتبت بواسطة يزيد بن غشيّان (مشاركة 214554) صح لسانك يا عاشق محال قصيده جزله تنبئ بالكثير من الجزل والوافي مرحبا بك في شعبيات وسجلني متابع لا هنت أنا أشهد إن البعـد قاسـي وحـراق همٍ وضيقة بـال والفكـر مسـروق في غيبتك هالكون ياصاحبي ضـاق شف نظرتي تكفيك عن كل منطـوق انا اشهد :) قصيدتك مافيها كلام يا عاشق

الرسالة الأصلية كتبت بواسطة شيخة الغيد (مشاركة 214562) عاشق محال صح لسانك ودام احساسك الراقي قصيده جميله بالفعل تحياتي

الرسالة الأصلية كتبت بواسطة محمد بن حليلان (مشاركة 214569) صح لساانك ياعاشق.. إسم مستعار بالتأكيد خلفه شاعر متميز .. كنت أحسب إن الليل يقفي بالاشـراق لكن ليلـي طـال ماجانـي شـروق صحيح من قال ليل العاشقين طويل.. وليكن ليلنا طويلاً طويلا فكثير اللقاء كان قليلا بالـتاكيد كسبنا شاعر جميل أسعدنا بإنضمامه وفي إنتظار ما قد يحمله بوحك الشجي في الأيام المقبله.. تحياتي

الرسالة الأصلية كتبت بواسطة ذيبان (مشاركة 214587) في غيبتك هالكون ياصاحبي ضـاق شف نظرتي تكفيك عن كل منطـوق شكرا لانضمامك لنا انورت شعبيات بك وليت تنشر باسمك الحقيقي شعر يستاهل وصلت لذائقتنا صح لسانك لا هنت يالغالي