من قبل أمـا بعـد هـذي النهايـه
نهايـة القصـه تريـح وابـرتـاح

انـا تعبـت وزاد معـكـم بـلايـه
ماعاد لي رغبـه وذاك الهـوى راح

كم لي وانا ابني وانت تهـدم بنايـه
ما الومك انا إلي بسدي لكـم بـاح

كم لي وانـا اقـدم لغيـري وفايـه
والقى منه لنكار كـن الوفـى بـاح

عرفـت بإنـك ماتحـق العنـايـه
تخون من لوجاع روحك معك نـاح

بأتركك في سعدك وانا لـي عنايـه
يمكن معـى الايـام ترتـاح الأرواح

بأتركك واكتب من عذابـك حكايـه
يقراء بها من في بحور الهوى طاح

واحط مبسـم شفتـك لـه دعايـه
عله يباع إليـا نظـر فيـه لمـاح

صورتـك م الخـلاق للنـاس آيـه
أية عجب تخدع صويبـك بالأفـراح

من شاف وجهك قـال هـذا منايـه
مايدري إنه فـخ كـم فيـه نـواح

مثل الفراشه طحت بك مـن عمايـه
وأنت اللهب م النار للجسـم لفـاح

خليتني غرقـان بـك فـي دمايـه
قبل يطيب الجـرح زودت الأجـراح

لكـن بعـدك خيرتـي وإرتجـايـه
دون الكرامه ما اقدر اتلبس وشـاح

نـزل دموعـك مـا بنـزل علايـه
دمعك سهل ينزل تقل دمـع تمسـاح

ونهايتـي معكـم لغيـرك بـدايـه
ابدى معه قصه ولو مثلكـم صـاح

بديـت قصـة حـب وافـق منايـه
في غالي فصل على القلـب مفتـاح

الغيت فـي حبـه سوابـق شقايـه
يفصح لي بحبه وانا منـي إفصـاح

اصبح حلى زادي وللعطـش مايـه
وللي مضى من غدر الاحباب بي زاح

اصبح ضوى شمسي وغيمه سمايـه
واصبح لزهر الحب في قلبي لقـاح

خاتم رسـل حبـي وجنـة بقايـه
لولاه في دنياي لا امـوت وارتـاح