|
وحنا قوم هوّنا .. وحنا الـ لا وطاروقه
أسعد الله اوقاتكم بكل خير هذي أول مشاركة لي في هذا المنتدى الطيب وقد لا تناسب لكنها طلعت . كنت وأحد اصدقائي قبل فتره في مكان ما بالعارض وارعدت السماء وكادت ان تمطر .. الا ان الله لم يكتب لها ان تروي ارض نجد .. فخرجت الابيات كما هي . وسمعها من سمعها .. وتحت اصرار والحاح اخي وصديقي المنفهق ( ابو فيصل ) على النشر جبتها لكم واعرف انها لن تعجبكم ولكنه هو من الح علي فسامحوني ..
أخيلـِك يا البروق اللي على العارض لها رمّاق=أشوفك و الحيا بيني و بينك يمنـَعَه مُوقَه رفيـفه لامـس أهداب المزون و شبّها بَرّاق=صبرت .. و لا لقيت الا رعودٍ تلحَـق بروقه ألا يا نجد وش في دارك إلا صُــوقة الموّاق=و طيـرٍ هَد بسبوقه .. و طـيـرٍ عِذره إسبوقه ألا يا نجد وش في دارك إلا صـُوعَة العشاق=إلامن حَب معشوقه و إلامن عَاف معشوقه ألا يا نجد وش في دارك إلا نخـلة المـشراق=حلوم الشايب اللي لو تمنّى .. قـال ملحوقه ألا يا نجد وش في دارك إلا سومة البواق=و شيخٍ لو رِكــــع لَلّه .. عـيونه لاحَقَت نُوقه ألا يا نجد وش في دارك إلا قُولَة إبطَقّاق=يطِق اللي زَعل فيها الجدار .. و تَتعَب إشقوقه ألا يا نجد وش في دارك إلا قَطعـَة الأرزاق=تخاشَرنا صَـحَن مَرزوق .. الين تمُوت مَرزوقه ألا يا نجد وش في دارك إلا دَندَره و زعاق=عِليمي وأشغَل الدنيا.. بخَمسَ أفكار مسروقه ألا يا نجد وش في دارك إلا لاق .. لا مالاق=و حِنّا .. قُوم هَوّنا .. و حِنّا الـ ( لا ) و طَاروقه قَلَبنا البِشت و الغُتره و باقي نَقلبَ المِعلاق =صَلاةَ أَثنِين .. و إمصلّي .. ملا بالحِسد معلوقه بعِذرِك ياالمزونَ اللّي مَنَعتي دَمعِك المِشتاق=قـُلـوبٍ مَـا غَسلها الله .. حَرام تـشِّد زِمـلوقه و ســــــــــــــــــــــــــامحــــــــــــــــــــ ــونا :) |
رد : وحنا قوم هوّنا .. وحنا الـ لا وطاروقه
الشاخوفه صباحك ورد لاتعليق لاشك كسبنا شاعر جزل ومتمكن شعرياً في شعبيات أما القصيده المعنى في بطن الشاعر :) تحياتي |
رد : وحنا قوم هوّنا .. وحنا الـ لا وطاروقه
الاخ الشاعر الخاشوفه
عزالله انها من العيار الثقيل صح السانك ولاهنت |
رد : وحنا قوم هوّنا .. وحنا الـ لا وطاروقه
الشاخوفه ألا يا نجـد وش فـي دارك إلا قَطعَـة الأرزاق ...... تخاشَرنا صَحَن مَرزوق .. الين تمُوت مَرزوقـه بهذي والله ما صدقت !! والعتب مو عليك , العتب على ادارة المنتدى اللي مخليّه القصيدة الين الحين . منهي مررزوقه !!!! فكك وأنا أخوك من هالخرابيط اللي منت قدها . تحياتي للسبات العميق يا ادارة tsh2 |
رد : وحنا قوم هوّنا .. وحنا الـ لا وطاروقه
نوره العجمي
مساء النور المعنى واضح وليس في بطن الشاعر اي شي غير هالابيات ولك تحياتي |
رد : وحنا قوم هوّنا .. وحنا الـ لا وطاروقه
محمد العزران
صح بدنك وانا اخوك لا هنت على مرورك لك تحياتي |
رد : وحنا قوم هوّنا .. وحنا الـ لا وطاروقه
إقتباس:
لعلك تعتقد ان هناك ما هو مدفّن في الأبيات ولكن لعل فطنتك لم تسعفك هذه المره . القصيده واضحه وضوح الشمس في رابعة النهار وهي ابيات مباشره . أما البيت الذي توقفت عنده فأسمح لي ان اشرحه لك مادام قد صعب على فهمك .. ألا يا نجـد وش فـي دارك إلا قَطعَـة الأرزاق ............... تخاشَرنا صَحَن مَرزوق .. الين تمُوت مَرزوقـه في البدايه أنت تقول اني ما صدقت ولكني والله العظيم صادق .. ولعل غضبك لكونك من اهل نجد .. ولو تأملت كلمة ( تخاشرنا ) لعرفت ان قائل الابيات يقر انه من اهل نجد قبل ان تتحمس انت للدفاع وكأن كاتب القصيده من كوبا . أما مرزوقه فهي مرت مرزوق :) .. ومرزوق هنا هو الشخص الضعيف الذي لا مال له ويحرم زوجته واولاده من الطعام ليقدمه بشكل مندي والا مفطح لأحد المهايطيه الذين يستعزمون لمرزوق وهم يعلمون فقره . سؤالي للشاعر عبدالله مران .. كم مره استعزمت لمرزوق ما دمت مثلي من أهل نجد ؟ وهنا !!.. ولست اختبر شاعريتك لأني اعتقد انك لم تأخذ لقب شاعر من فراغ وانا مازلت أحبو كعضو جديد .. فهل تتكرم علينا بقصيده تبين فيها اسباب عدم نزول الامطار على نجد لهذا العام :) .. لعل هذه القصيده تقنعني ان اسباب منع المطر هي غير ما ذكرت أنا . الشاعر عبدالله مران .. إقتباس:
أما تعليقك لإدارة شعبيات فلا شأن لي به ... فأنا مجرد ضيف وهذه أول قصيده وغيرها في الطريق وأنا لا أكتب لأقول غير ما اعرفه وأعتقده .... وان لم يعجب الشاعر عبدالله مران . شكرا لحضورك رغم الاختلاف وبإنتظار قصيدتك عن اسباب منع المطر عن نجد من وجهة نظرك :) اللي أنت قدها :). |
. الشاخوفة .. ! شاعر رائع وكبير والله .. وهذا أنتم يا هل الإقلاع الله يصلحكم .. يجي الواحد شاعر كبر جدي وداخل بإسم مستعار :( داخل بواسطة ولاكان نشبت بحلقك :rolleyes: ألف صح لسانك ياغالي .. قصيدة جزل .. ومفردات وفكرة مترابطة حد الإلتصاق .. سعيد والله بتواجدك .. محبتي . |
رد : وحنا قوم هوّنا .. وحنا الـ لا وطاروقه
إقتباس:
الشاخوفة أسحب كلامي ,, وعذراً على المهايطه اللي وصفتني فيها .. وبحضور الماء يبطل التيمم , وبحضور المراقب انتهى كل شيء بالنسبة لي . والذي أكد كلامي " إقتباس:
فأنا هنا أوقف وأقول " سلام عليكم " والكلام اللي أنت قلته .. أنت قده وقدود يا شيخ وأنت بطل العالم . وشاعر الشعراء . تحياتي ,,,, والله يخليك قفل على الموضوع |
رد : وحنا قوم هوّنا .. وحنا الـ لا وطاروقه
[c]
اخي الشاخوفه ... صح لسانك على القصيده الجزله كنص واللي تدل على ان قائلها شاعر كبير ومتمكن وله باااع طويل ... اما المعاني في القصيده فقد نوافقك في بعضها ونختلف معك في اخرى فالغيث فضل من الله والله يؤتي فضله من يشاء .. وقد يكون بعض ما ذكرت موجود ليس في نجد وحدها بل بكل مكان ولكن لا يعني ذلك عدم وجود الخير واهله اللي يستاهلون المطر ... تحياتي وتقديري ومره اخرى صح لسانك على النص الجزل اخيك سالم بن جلعان [/c] |
. بعد إذنك أخي الشاخوفة ! بالنسبة لي : فانا أرى القصيدة جدا ً واضحة .. أراد الشاعر أن يصف بعض التصرفات الخاطئة في المجتمع وينتقدها بطريقة مميزة .. فتعذر بالمطر وعدم هطوله وهو على دراية بالتأكيد بأنها من الله سبحانه وتعالى .. وقام بسرد تصرفات خاطئة لـ ( بعض ) الناس وليس الكل .. فلن يتكلم الشاعر عن نفسه بهذه الطريقة وهو من أهل نجد .. وكل ماسبق .. أوافقه الرأي به وأثق جدا ً بصدق القصيدة .. هذا مالدي .. محبتي . |
رد : وحنا قوم هوّنا .. وحنا الـ لا وطاروقه
رفيفه لامس أهداب المـزون و شبّهـا بَـرّاق صبرت .. و لا لقيت الا رعـودٍ تلحَـق بروقـه ألا يا نجد وش في دارك إلا صُوعَـة العشـاق إلامن حَب معشوقه و إلامـن عَـاف معشوقـه . . الثرثرة والنميمة ونقل الكلام في كل مكان .. وليس في نجد وحدها .. :) . . ألا يا نجد وش فـي دارك إلا نخلـة المشـراق حلوم الشايب اللي لو تمنّـى .. قـال ملحوقـه ألا يا نجد وش فـي دارك إلا سومـة البـواق و شيخٍ لو رِكع لَلّه .. عيونـه لاحَقَـت نُوقـه ألا يا نجـد وش فـي دارك إلا قُولَـة إبطَقّـاق يطِق اللي زَعل فيها الجدار .. و تَتعَب إشقوقـه . . :) . . ألا يا نجد وش فـي دارك إلا دَنـدَره و زعـاق عِليمي وأشغَل الدنيا.. بخَمسَ أفكـار مسروقـه . . :white: . . ألا يا نجد وش فـي دارك إلا لاق .. لا مـالاق و حِنّا .. قُوم هَوّنا .. و حِنّا الـ( لا ) و طَاروقه . . أتفق معك هنا .. :) . . بعِذرِك ياالمزونَ اللّي مَنَعتـي دَمعِـك المِشتـاق قُلوبٍ مَا غَسلها الله .. حَـرام تشِّـد زِملوقـه . . لو صبرت قليلاً .. لــ رأيت المطر قبل ثلاث أيام مكتسح الرياض وضواحيها .. :) . . . الغاضب .. / الشاعر الكبير .. الشاخوفه .. :) أولاً أرحب بك في شعبيات .. يشرفنا وجود هامة شعرية فذه بيننا .. ونشكر الشاعر المنفهق .. لدعوته لك .. أما الأبيات تمثّل وجهة نظر خاصة .. نحترمها .. ولو أختلفنا معك في بعض الأسباب .. :) س .. سؤال .. :) ماقولك أن في بعض البلدان الأوربيه وهم من المسيحين .. ينزل عليهم المطر في كل الفصول .. وهم يخوضون كل أبواب المعاصي .. :) هل تعتبره رضا من رب العالمين .. ؟ :) الشاخوفه .. بعيداً عن فكرة الموضوع .. لايختلف أثنين على شاعريتك الفذه وغزارة الفكر وجزالة المعنى .. بــ أنتظار مشاركاتك وقصائد أخرى .. أطيب تحية .. |
رد : وحنا قوم هوّنا .. وحنا الـ لا وطاروقه
إقتباس:
الاخ عبدالله مران ... شكرا لك . تحياتي |
رد : وحنا قوم هوّنا .. وحنا الـ لا وطاروقه
إقتباس:
شاعرنا الكبير سالم بن جلعان .. أسعدني حضورك غاية السعاده وشهادة مثلك أعتز بها ايما اعتزاز الابيات لم تتعدى كونها وجهة نظر اعلم ان الكثيرين لا يوافقونني عليها ولكنها تظل في النهاية فكره ووجهة نظر . ومعاذ الله ان اعيب في اهل نجد كلهم وانا منهم وشملت نفسي معهم في اكثر من موضع . والا نجد فيها الطيب وفيها الخبيث كسائر المناطق والدول . اكرر شكري على تواجدك هنا وشهادتك العزيزه على قلبي وتقبل مني كل الود . تحياتي . |
رد : وحنا قوم هوّنا .. وحنا الـ لا وطاروقه
إقتباس:
شكرا لاطلاعك ودعمك وصدقني لم أكن اود ان اسبب اي بلبله .. ولكن حبيت اشارككم ولو كانت الفكره جريئة بعض الشيء . في هذه الابيات تعمدت ابراز الكثير من السلبيات واعتقد في داخلي ان طريق التصحيح دائما يبدأ بالاعتراف بالمشكله .. ونحن كما تعرف مجتمع فيه الكثير من الايجابيات وكذلك السلبيات ولذلك فنحن لسنا فوق الانتقاد كما تفضلت في ردك الثاني على اخونا الشاعر عبدالله مران . شهادتك اعتز بها كثيرا . تحياتي |
| الوقت المعتمد في المنتدى بتوقيت جرينتش +4.
الوقت الان » 07:57. |
Powered by vBulletin® Version 3.8.7
Copyright ©2000 - 2024, Jelsoft Enterprises Ltd.
جميع ما يكتب في الموقع يعتبر حقوق محفوظة لموقع شعبيات- شبكة الاقلاع