بسم الله الرحمن الرحيم
والصلاة والسلام على سيدنا ونبينا محمد وعلى آله وصحبه وسلم ..
هناك رجال عاشوا طيلة زمانهم على عزةٌ وفخر .. لا يأبهون بالمصاعب ولا يرضون بالمهونة
رجال سخروا حياتهم لغيرهم .. رجال عاشوا كرماء أعزاء أوفياء ..!!
فأين هم الأوفياء اليوم ..!!
رجال عندما تذكر أسمائهم يقال لهم نعم الرجال ..
لهم يدان مسخرة للفقراء والمحتاجين ..
ولهم افعال نعرفها قبل وفاتهم .. ولهم افعال لم نعرفها الا بعد وفاتهم
وهنا اطرح ذكر رجل احيا همم الرجال وايقضها ..
رجل يهوى المصاعب رجل يترفع عن الذل هو ابي وعمي وابا لكل مخلص
" الشيخ سعد بن نفجان بن مرشد الغريري الدوسري "
وقد قيلت فيه قصائد كثيرة تذكر افعاله الطيّبه وخصاله الحميدة ووقفاته في اللحظات الصعبة ...
ومنها قول شاعر العجالين الشاعر سالم بن تركي العجالين الدوسري
في الشيخ سعد بن نفجان ومنها ...
طارشٍ توه من البر لافي = انحر الدوحة هل العقربية
في طريقي شفت رجلٍ سنافي = يلطم العايل وينفع خويه
ذاك سعدٍ في المراجل يشافي = كل ما بنساه يطري عليه
غريريٍ مبرور ما هو بهافي = كاسب الطالات راعي الحمية
وقد قلت انا في مدحه ابيات من قصيدة ..
يازين فنجال الغلا حين العصير = من يمنى قروم تفعل الطيب تحييه
في مجلس يبخر به الدخن تبخير = وهذا ابن نفجان ويا مرحبا فيه
الى نصيت سعد تجيك التباشير = يرخص لك الاروح والنفس تشريه
بن مرشد بن مهدي بن غرير = ويامناديٍ لبيه ولبيه لبيه
واما القصائد التي قيلت في رثائه حينما فارق الدنيا وهاجر الاقارب والاحباب مودعا اهله وذويه
الى جنات عرضها السماوات والارض باذن رب الجلال والإكرام ...
قال الشاعر محمد بن راشد بن نفجان الغريري
في رثائه سعد بن نفجان ...
انا كل ماهبت هبوب الهوى من شرق = توهج جروحٍ صالي الوقت محرقها
سحاب الهم في صدري يهزنًه رعود وبرق = خطيرٍ على مفرق ضلوعي يفتقها
الا ياعين لا تبكين ولا ياريق لا تشرق = ترى ذي عادة الدنيا الى صدت بعاتقها
والا ياقلب لا تحزن والا ياجوف لا تشهق = ياكم من عبرةٍ حارت بوسط الصدر خانقها
انا لامن بغيبت أنسى تجدد واهجٍ يحرق = معاليق الحشا ذابت وكن الوجد ينتقها
رحمك الله ياحرٍ يتله للمراجل عرق = عاداته يفعل الجزله والهزلات يفهقها
جعل سحايب الرحمه تراكم من جنوب وشرق = ورياح العفو تجمعها على قبره وتفتقها
هذا وختامها صلوا على صفوة جميع الخلق = عدد ما حنت رعودٍ وعدد ما لاح بارقها
وقال الشاعر ابراهيم بن راشد بن نفجان في رثائه سعد بن نفجان ...
مرحوم ياحرٍ له العز منزال = مرحوم ياللي بالوفا ذاكرينه
ابو احمد اللي صار مضرب للامثال = تشهد له افعاله ومدة يمينه
في الطيب سمح وبالمواجيب رجال = ياكم محتاج مسح دمع عينه
شفته وراه اليوم شيبان وعيال = ياويل قلبي يومهم شايلينه
يامل قلب من الحزن جاه ولوال = ولوال طفل فاقد والدينه
شكيت همي للولي عالم الحال = ينزل على قلبي وقار وسكينه
ولا يصبرني سوى قول من قال = هذا طريق وكلنا سالكينه
وهذه ايضا قصيدة للشاعر ثامر بن سعد الشعيفان العمور الدوسري في تعزية الغرره في فقيدهم
الشيخ سعد بن نفجان الغريري ...
يالله ترزقنا الهدى واتباعه = والمبتلي يا ربي انك تعينه
ويالله ترزقنا ثبات وقناعه = والراضي بحكمك تنور سنينه
والله يعظم اجركم يا جماعه = في الطيّب اللي كلنا فاقدينه
والقبر يا ربي تزيد اتساعه = وتحف روحه بالرضا والسكينة
وديعة وعادت لراعي الوداعة = بفراقها كل المدينة حزينة
واذكر هنا ابيات من قصائد رثاء قلتها في فقيدنا الشيخ سعد بن نفجان ومنها ....
يومٍ فقدته نصف روحي فقيدة = ونصفها الثاني يواسي قهرها
ولو البكا ينفع لعيده وازيده = ولو البكا ياخذ من العين نظرها
عز الله انه بالمراجل وليدة = طيب ومكارم في حياته عمرها
وله يمينٍ بالشدايد شديدة = وله يسارٍ لليتامى ذخرها
وقلت في رثائه ايضاً ...
لا صرخةٍ هزت شموخ الرجولة = ولا ونةٍ أعادت امن الموت رجال
وقلته على بيت " بن راشد " رسوله = مرحوم ياحرٍ له العز منزال
ابدٍ ما ذل نفسه للزمان وميوله = ولا ذل نفسه للرديين الانذال
بكيت رجلٍ والمآسي خجوله = سبحانه الله مغير الحال في حال
ومما قيل ايضا في رثائه .....
يا ونةٍ ونيتها ودمعي هماليل = ولي ونةٍ هزت رواسي الجبالي
جاني خبر موته ابليًا تفاصيل = وياونتي هلي دموعٍ همالي
عقب التعب بعد العنا والتحاليل = راح الامير اللي مع العز غالي
وهو ذاك سعدٍ نخوة للرجاجيل = هو راس قومٍ ومزبنٍ للرجالي
هو رايةٍ للعز ومعدًل الميل = هو العزيز وهو كريم السبالي
فعايله تطارى جيلٍ بعد جيل = هو فزعة المضهود عسير المنالي
ومما قيل في رثائه ايضا ....
يالله يالمعبود رب السماوات = هجرت انا الاحزان والهم جاني
دموع عيني فوق خدي غزيرات = طويت همي وحزن همي طواني
رجل دفنته بالمقابر ولا مات = رجل ذكرته وذكره ماهو بفاني
وونيت من بين المخاليق ونات = وناتٍ قد سمعها قاصي وداني
هذا وصلى اللهم وسلم على نبينا محمد وعلى آله وصحبه وسلم ...
اخوكم في الله
محمد الغريري