[العابر]

الرسالة الأصلية كتبت بواسطة عبدالرحمن الربيّع

ِ

مابقى للجرح قلب وما بقى للحزن جوف

................ ومابقى لي يالحبيبه درب أنا لك أسلكه


كل أحلامي تبددها المصاعب والظروف

............... ويتخيّـل لي سـراب ٍ مسـتحـيل ٍ أمسـكـه


كل ما جيت أكتب الأبيات ضيّعت الحروف

................ أكتب البيتين وأنسى بيت ثالث وأتركـه


أنا عايش في عذاب وإنتي في حيره وخوف

................ كيف أبكتب لك قصيدة والحروف مشربكه


دقت الساعة ومعها أعتلا صوت الدفوف

................... بعدها ثار الغبار وما قـدرت أستدركـه


غارت جيوش الجفا والهم وحدها صفوف

.................... دكّـت حصون الغرام وأصبحت متهـتكه


وش تبين بفارس ٍ جيشه بلا خيل وسيوف

..................... حاير ٍ مابين يرجع أو يخـوض المعركه


قامت حروب المشاعر والخساير بالألوف

....................... ما بقى ياكود فارس مع فلول ٍ منهكه


صرت أشيل الهم فوق الهم وأتعبت الكتوف

...................... الأماني ما تحقـق والدروب مصكـكـه


وآتخبّـط في ظلام وما قدرت إني أشوف

....................... غير نور ٍ من بعيد وهقوتي ما أدركـه


بتجهّـز للرحيل وما على الذكرى حسوف

.......................... آه ياهمي وحزني والدورب المهلكـه


فاقد الشي كيف يعطي وأفهميني يالهنوف

...................... كيف أنا بعطيك شي ٍ دام أنا ما أملكه

أخوي المبدع

عبدالرحمن الربيّع والله ياسنايدي كا خليت فيها اختيار اضطررت اختارها كالمة وماهي غريبه من شاعر متمكن مثلك

تحياتي لك

أخوك

العابر