[إبراهيم الوافي]

مخاوف والقلوب ألوانْ
من الأسود إلى الأخضر
من الأبيض إلى الأخطر
كتاب أمّي ..!
ومن همّي
كتبت إن السما بيضا وميراث الشفق أزرقْ
وقلب الغايبة أرفقْ
وميلاد القمر عنوان
متى الشاعرْ ؟!
إذا مرّة عشق .. يكتبْ
أو العاشق .. إذا مرة كتب يكذب ؟!
أنا الإنسان
أكبر همي النسيان
في عيني .. جمعت النور والبهتانْ
في قلبي .. كِبِر بستان
شوكُهْ .. آخرُهْ وردهْ
وأسفاري بلا عودهْ
وتذكاري حكاوي .. كلها تبدا بــ .. ياماكانْ :
قلم فوق السطور أحمر
وعاشق شاغل الجيران
عطر تركيبته ( ليلى )
وعين الغايبة نجلا
وأنا عطشااانْ ..!
أمانة لاذكرتيني وقلتي ( كانْ )
خذيني من تفاهاتي .. وغلطاتي
وصورة طيفك الفتّانْ
مخاوف لاتروحي هناك تنسيني
مواقف .. ما تصير الحين تلقيني ؟!!
بلا حرمانْ
شواطي صوتك احساسي
وآخر صمتك أنفاسي
ومهما كانْ
أحبك ماقدرت أخفي
إذا كنتي مرض ياااااااارب لاتشفي
بموت الشاعر الولهانْ ..!