|
غ ر ق
يا قلمها
جف حبري
يا ورقها
ذاب صبري
والقلم ما عاد يكتب غير نزف الطفل إذا قام بليالي وحدته
واهتز فيه الانتظار
وباقي الحنان إنهار
والورق غيمة، تبي توصل، وضيعها النهار
،،
وكنا زمان صغار
والحين نصغر بالدموع
اللي تعلمنا الرجوع
اللي تشبعنا ونجوع
اللي تبلل هالجفاف اللي كسا بعض الضلوع
،،
كله غرق
كله كلامٍ يسرق الوقت بثواني
يحتمل حفلة معاني
أو تراتيل وألق
أو قلق
أو
مجرد تمتمات
تبدا باحساس ونشيد
وتنتهي
بآه
ونزيف
شارد وضمه رصيف
ما معه غير الثواني اللي شراها
من بقايا حزة الضحكة
ومن أول ثراها
من وراها
ما سرق
شافها حلم وشهق
صاغها من زفرته
دم وعرق
وابتهل تبقى معه
كل المواني تسمعه
والحين
ضايع
في شواطيها
معه
لا شيء
غير
آخر حروف
يحتسيها مع مرارة
ويتكلمها الأرق
،،
سامحْ..
يا حلمها البارحْ
اللي هطل في ساحتك
بلل جفافك
وإحتواك
ورّى السما قلبك
واحساسك الناضح
عرّى خطى دربك
وغموضك الواضحْ
ياحلمها البارحْ
ياحلمها الفاضحْ
،،،،،،،،،،،
20/07/2004
عبدالرحمن السعد
(عذراً للتكرارارارات!)
|