الكلام الي راح تقرأوه ما أدري أيش أسميه ... فضفضه؟ هذيان؟
يمكن لأن درجة الحنين مرتفعة لأقصى حد هاليومين.. حاولت علاجها بكمادات التناسي بس ما نفع العلاج
ونزفني الوجع... وأدري بقلوبكم راح تحتوي أوجاعي وأنيني ... اعذروني
يمكن قاعدين تتساءلوا ليش حاطه مقدمه هالمره على غير العادة .. أنا أقول لكم ليش..
يمكن لأني أحس إن الكلام الي كتبته يعور قلبي مره ويمكن يعور قلوبكم ... عشان كده الي راح يقرا النص
من البداية لو حس بشوية ألم أرجوه لا يكمل ما بي اهدي وجع لأي أحد فيكم لأني أحبكم من هنا لحدود السما
والحين الي حاب يقرأ هذياني يتفضل والي ما عنده رغبة وخايف يتألم.. عادي يطلع...
ومن البداية أشكر الي قرأ والي ما قرأ ...
مجرد الحضور يعني لي الكثير ويعني لي أن أرواحكم قريبة وهذا بحد ذاته يكفيني...
..........................................
أتذكرك
واطفالنا حولك فرح متجمعين
مثل اشجره.. تحمل شقاهم والتعب
يا هل ترى منهو السبب؟
منهو الي فرق شملنا؟
يقولوا القدر ... آه يا القهر
كيف انطفى .. صوتك ومات
ولا بقى منك معي ... إلا بقايا ذكريات
اتذكرك
تمزح معي
أصرخ بوجهك تبتسم
وتمد يدك تتهم
كل الي ما يضحك معك
انه عليك ويا الزمن
واضحك أنا بعد الزعل
واقول لك: مزحك ثقل
لكنه ممتع لا يُمل
اتذكرك
ترفع لي صوتك بالغنا
واغضب أنا
اقول لك: ما أزعجك
بسك نشاز
ويبدا صوتك يرتفع
وتقول لي:
أتحدى مثلي تعرفي
ويبدا التحدي بيننا
إنت وأنا.. يصبح تحدينا غُنا
اتذكرك
بعد التعب .. لما تنام
أطل في وجهك واقول:
ربي احفظه
بس ما يجيه .. واحد من اولاد الحرام
يا ربي آنا أعرفه
طيبه وحنانه لا يُحد
لو جاه احد
مثل الطفل.. يغريه بشوية كلام
اتذكرك
واغص بالدمعه سكوت
ليت الجراح فيني تموت
واعاتبك
ليه الفراق استعجلك
يا رب ليته أمهلك
وارجع واستغفر واتوب
كلنا إلهي ملك الك
أتذكرك
يا حسرتي
لما ألاقي إخوتي.. متجمعين
والاقي طيفك بينهم
مجرد خيال.. يروح ويجي
اغص ويموت الحجي
وامي تكون.. ويا الألم متواعده
اقرا الحزن في عيونها
تتذكرك مثلي أنا
تدور عليك في ملامح اخوتي
احس فيها تحترق
واضم حزني لحزنها
اشوف طيفك واختنق
واحاول اكتم عبرتي
كم ارمضان جانا وراح
واقول وينه ايش أخره
يا هل ترى
لو أقضي عمري ارتجيه
وانادي باسمه انتظر
واسأل عليه
بيرد لي .. ويقوم من نوم الثرى؟
لا ما أكابر يا الحبيب
بس الغياب.. تدري عذاب
وسهم الحنين
يزرعني وحشه وانتظار
والموت ابد ما فيه خيار
ليت الي مات.. طيفه يموت
ننساه لا ما نذكره
وجرح الذي فينا سطا
والخاطر الي منكسر
-عقب الي راح-
يا ليت نقدر نجبره
من كم سنه
والعيد يعود.. وانتَ بعيد
يمكن تجي
مرهونه بشوية أمل
سامحني يا ربي خطيت
يوم اني انطر رجعته
ما قد تأخر من طلع
ومن طلعته... ذيك السنه
وايد تأخر ما رجع
الموت ها قد غيبه
كنت احسبه... بيرد لي
بيرد لمي بحضنها
في البيت أسمع ضحكته
وافرح معه
اغضب عليه.. حين الخطا
وارجع وأرضى .. أبتسم
لو صوته يسبق جيته
يا رب سامحني
الفراق... وايد صعب
لو أقضي عمري انتحب
ما راح يرد من غيبته
الموت ما منه مفر
حق(ن) علينا وانكتب
والي رحل
الي توارى بالثرى
كود استحاله رجعته
عمره انتهى.. كيف انتهى؟
الله أدرى بحكمته
نتذكره..
ذاك الي غاب
ويمرمر الخاطر سؤال
كيف النحبهم نايمين
هناك مرقدهم تراب
والحسره تملانا أنين
مره دموع
مره أسى
أمرار أوجاع وعتاب
نتذكره وبكل ألم
نقول ما ينفع ندم
الي بنيناه انهدم
طيف الحبيب
لما يموت.. لما يغيب
نلقاه أطياف وحلم
باذكرك
حبيبي تذكر بيتنا
ذاك القديم.. الكان يجمع شملنا
تذكر حبيبي في الرواق
كنا ندور.. مثل الطيور
والضحك أقصى همنا
نركض .. نشاغب وامنا
تغضب علينا عن رضا
ابونا فينا كان يثور
كانت عصاه تلعب هناك .. تلعب هنا
أضحك وأتفرج أنا
تذكر حبيبي القرقيعان؟
نطلع سوى
نطوي مسافات الفريج
منهو الي كسيه يمتلي
قبل الأذان
كنا ندور..
وكل بيت يضمنا.. حضنه دفا
كنا نشوف .. كل البشر
أرواح يترسها وفا
تذكر حبيبي هالشعور؟
كنا نخاف ... نظلم أحد
أمي تعلمنا السلام
كنا ننام .. فعلاً ننام
العالم اشقد كان كبير
وأرواحنا
ما قد عرفها أي حزن
كانت الدنيا فرح
أمطار وازهار وطيور
كنا نحب.. كل البشر
كنا نشوف
ان الحياة.. إحساس ما يعرف كدر
كانت الدنيا تدور
واحنا ندور
واحلامنا
نرسمها ديره ملونه
تذكر حبيبي هالشعور؟
ولما نجي م المدرسه
والبيت فرحه نترسه
نرمي دفاترنا ورود
وذيك الشنط.. فيها نلم اهمومنا
نترسها أحلام ووعود
الله يا البيت القديم
تذكر حكيم؟
من كم سنه .. غاب واختفى
وصرنا نشوفه بس حزن
يرسم ملامح امنا
الموت ها قد غيبه
وصار الألم
يسكن بقايا حلمنا
آه يا حبيبي أذكرك
واشوف طيفك بس خيال
اعرف رجوعك شي مًحال
بس آنا أتوجع واموت
ويغص في حلقي سؤال
كيف انطفى.. صوتك ومات
كيف اختفيت.. ليه انتهيت؟
ومنك بقى بس ذكريات
سامحني يا ربي خطيت
يوم اني انطر رجعته
اعرف بأنه قد رحل
مات وانتهى بحضن الأجل
لكنه يوجعني الغياب
يمكن ألم.. يمكن أسى .. يمكن عتاب؟
ما قد تأخر من طلع
ومن طلعته .. ذيك السنه
وايد تأخر ما رجع
يمكن حنيني اتذكره
وصار ينزفني وجع...