عايمه
روحي تسأل ضايعه
من حدود الأسئله
ما انتهت عندي إجابه
من حدود الأسئله
ابتدت بي
بس شكوكن موجعه
جيت اسأل
ليه يعني
نكذب ونخدع .. نراوغ
ليه نحمل كلنا نفس الملامح
والاختلاف.. بس مجرد أقنعه
ليه لما.. نحبس الدمعه سكوت
صمتنا يغرق يموت
شنهو يعني
يصير أعمى هالضمير
ليه يعني ما يصير؟
يموت صوته
وبسكوته
نحس انه .. ضاع وسط المعمعه
ايه يا الجلاد ارفع
سوطك الي
ما يخوفني ولكن
يحرك الهم الي ساكن
لما تعبر فوق همي وترفعه
ارفعه
ارفعه وبكل جنون
حطم احلام السكون
تعرف اني .. لو بكيت
ما يهمني
لا ولا يكسرني صوتك
ما تحركني حياتك
او يهزني شبح موتك
تبقى عندي
شخص تافه .. أو مجرد إمعه
قلبي الطاهر بيبقى
يرسم العالم بياض
وكذبك الي .. كان معتم في عيوني
ما يغير .. ضي ظنوني
قلبي بعده طيبه ينبض
لا تفكر كنت متمكن وشاطر
بصوت مكرك تخدعه
انت فقاعه
والمشاعر .. عند أمثالك بضاعه
روح دور عن جهاتك
روح واشقى في حياتك
بتبقى ضايع
تصرخ بصمت الشوارع
تموت كل الأسئله
ويبقى بانفاسك سؤال
يعبر حدود المحال
وين جهاتي الأربعه؟
وين جهاتي الأربعه؟
بسألك
ليه نحلم .. نترس العالم سلام
واحنا اصلا نبلع الضيم وننام
حلمنا .. أسود وكاذب
انت ضدي .. آنا ضدك
وبداخلي الضدين أحمل
مدري آنا ضد ضدي واتجمل
ولا آنا أقترب مني معه
يووووووووووه أتعب
من حدود الأسئله
والضمير صار عندي
لغز أبعد من سؤال..
صار عندي معضله!
ليتني في الصمت اشرب
قطره .. قطره .. كل همومي الموجعه
ليه احنا صرنا غير
ليه نفرح؟
ليه نبكي؟
ليه نجرح؟
ليه نشكي؟
ليه اصلا تغتالنا بعض الملامح
نحس إنها .. بس مجرد أقنعه
اتعبتني .. كل حدود الأسئله
ولا انتهت عندي إجابه
عجز صوتي
يعلن الصحوه بموتي
عجزت أميز
منهو صادق.. منهو كاذب
تبعثرت روحي وهمي
عجزت اني في خفوقي
ارقى فوقه .. ارقى فوقي.. واجمعه