[بندر بن محيا]

البارحة كل طفل ٍ ذبّ حلواه!
...فاقصى الحنايا ..على باب انتظارك
قلي من العايدين : أحلى معاناه
... أقول لك من تَعَب : عيدك مبارك
جيتك من الصمت والنسيان يقراه
...شف كيف جيتك ..وقلبي تحت نارك!
جيتك معي صوت مايسكن فـ الأفواه
...صحّى من الشوق والتغريب : جارك!
مرة سمعتك تقول : البعد ما أقواه
...ومرة سمعتك تقول : الوصل دارك
واللي يحبك يشوفك داخل "أشياه"
...واللي كره جيّته بالدمع زارك!
هي أربع جروح فيني مالها أشباه
...خذ من بَعَضْهَا قناعتك وقرارك!
1قصيدة 2وضحكة 3وتنهيدة 4وآهـ
...اختر، وأنا مااعترض بعد اختيارك!
يوم ٍ الأطفال كل ٍ ذب حلواه
...جيتك وخلّيت قلبي في انتظارك

الرِّيَاض ـ2007م