سكّر المقطع وهات إحساس مايكذب بدفتر
لا، لالالا
!
هذا واحِد يشبه لوجهي ونَهجي
وواحد وثاني وثالث.
وأنا وحدي : من يطفي ضوء وهجي!
اترك اللي من ورى صدري يدوّر عن رماحه
أنا وحدي
أنا وحدي!
أنا من ورى أنفه : صباحه!
سكّر المقطع وهات أحلام ما تصدق بدفتر.
** ** **
واجتمعنا في صلاة الفجر مثل ما الأهداب توقف!
مثل ما الأهداب تجلس!
مثل مـَ ، مـَ ، ماادري مثل أيش!
مثل واحد ضيّع بقلبه جراحه!
أط ياصوت الغلابه
من عصر وعيونهم تاكل يديني!
من عصر وأنفاسهم جفت
وفي فَمّي : سَحَابة!
سكّر المقطع ودق أجراس مادقّت بدفتر.
ليل تين
وليلتين
واجتمعنا في صلاة الفجر مثل ما الأهداب توقف!
مثل ما الأهداب تجلس
أصغر الأحلام بنت ٍ من حنيني
وأكبر الأحلام خاتم في يميني!
سكّر المقطع وهات أصوات ماتصمت بدفتر.
هات شي من التشابه
شي من فِتنة بنات القرية بضحكة مراييل ومدارس،
موغلاتٌ في الحياد!
شعرهن ليل وشرايطهن مثل سرب الحمام!
أنا مغرم في التشابه!
لا، لا لا لا
أنا مغرم في تشابه مايشابه : للتشابه.
أنا موغل في الحياد
أنا موغل في النوارس!
أنا فعيوني ظــلام
أنا لي كبوة جواد وخوف فارس!
سكّر المقطع وهات أنفاس ما جفت بدفتر.
قل متى كان العقيق يعلّم الفتنة يديها
هذا شي من التشابه
وأنت موغل في التشابه
لا لالالا
أنا متعلّم ودارس!
سكّر المقطع وهات إيمان مايكفر بدفتر
* * *
مرهْ بنت بتنتصر فيني على كل الهزايم،
قلت : يابنت انتصرت ِ
قالت : السَّجان يامسجون نايم
قلت : والسَّجان نايم؟
: هذا شي من التشابه!
وآنا قبل أقفل جروحي والدفاتر
أكره شعوب التشابه
أكره أشعار التشابه
أكره أبيات التشابه
أكره التشبيه والتأليه لأنفاس القداما!
أكره اللي خارج ٍ من داخل أفكار التشابه
أكره اسمي وْ لمجرد ألقى للأسما تشابه
أعشق الأغصان
والأغصان مافيها تشابه!
أعشق النسيان والنسيان مايشبه غيابه!
سكّر المقطع وهات أوراق مارّفت بدفتر!
قلت : هذا واحد
واحد وثاني وثالث
راح دوّر من ورى صدري رماحه
أنا ليْلْهْ،
أنا عصره
وأنا وحدي
أنا من ورى أنفه : صباحه!
وهذا شي ٍ من كآبة!