[نوف الثنيان]

حبيبي ذبلت أغصان الوصل وأستوحش العصفور
وقوس فراقنا مفلـت علـى طيـر الغـلا نبلـه

حبيبي والنوى ( غابة همـوم ) يلفهـا الديجـور
من اين يحلق العصفور شوك البيـن ينشـب لـه

يعاني قسوة الريـح وجناحـه بالنـوى مكسـور
يحاول يبتعـد مالمـوت والمـوت يتقـرب لـه

يدوّر غصن مـورق بلله قطـر الوفـا المنثـور
على صدر السهر والموت حول الغصن يرقب له

حبيبي والأمانـي فـي الحنايـا تنتظـر بالـدور
تعال افتح لها جنـة وصـال ٍ مـا أنعقـد حبلـه

تعال اشتقت لك تاتي .. تعال عيون خلك ( دور)
تعال اسكن بها أنى شئت! هي لرضـاك منجبلـه

تعال اسقي معك غصن الوصل ويفوح كنه الجور
تعـال نخيـل هتـان الفـرح ويبلـنـا وبـلـه

تعبت وما تعبت اقطف لك أيامي ( فدتك ) زهور
وأبنهـا بـأرض أعـذب خيـال ٍ شاقنـي نُبلـه

تعبت ارقب تحت محراب حلمي لو بصيص النور
تعبت احسب مماتي قبل ! ولا أحضنـك قبلـه ؟
.
.


تسجيل مرور آخر .. وقراءات عديدة ..
قصيدة تختصرنا .. وتخترقنا .. !

بن جلعان / سالم ..
من الشعراء الذين يستهويني عذوبة إحساسهم ورقة مشاعرهم .. وصدقهم ..
وأحرص على متابعة جديدهم ..

تحية اكبار وتقدير جم ‏..