غريبه ليه متغير
عليك اخطيت؟
علمني.. انا اشسويت؟
قسى قلبك؟
ولا ادري مَ الذي قساه
كنت اعطش
مهما طول اغيابك
ترد تسأل واروى بك
واحس قلبك
نبع أخضر
سحاب امطر
يغرقني
يبلل خافقي وافرح
واطير آنا من الفرحه
مثل عصفور .. ضيع عشه ثم لاقاه
كنت بغربتي أبرد
وكان صوتك .. دفا لـ روحي
أشكي له ألم بوحي
ومن تضحك سوالفنا
أقول: يا رب .. قلبه مَ انحرم منه
صدقني الجفا قاسي
أحاول أخدع احساسي
واعاندني
لو شوقي إلك هزني
واصبرني .. بكم كلمه
أقول: الـ غابوا بـ يردوا
وهذا الصد لو طول
أكيد الوصل.. بعد غيابهم أجمل
ننسى هـ الوجع والهم
يمر الوقت ونتخطاه
أنام .. اتوسد ادموعي
ومن أصحى أخبيها
أداري لوعتي فيها
واناظر شاشة الجوال
أقول: يمكن .. يرد يسأل عن الأحوال
حتى شاشتي ملت
تتاني صوتك بلهفه وتتحراه
طال الصمت هـ المره
أصبر الروح اقول بكره
وبكره كثير يتأخر
وانا أنطر
واتخيل صدى صوتك .. أتلفت
(من اللهفه أقول: الله)
وحق اللي .. جمعنا فـ يوم وفرقنا
علمني أنا اشسويت
عليك اخطيت؟
ولا نبعك الصافي
طيبك .. قلبك الدافي
على ودي قسى واقفر
اشوفه اليوم متغير
جحدني أو تناساني؟
ولا انه .. تناسى طيبتي وياه
حبيبي والكلام اللي
تكسر في حناجرنا ولا قلناه
غريبه تقوله الـ غيري
وانا تعبت مشاويري
ما بين ارجوك علمني
وبين ابعد .. يمكن ودنا ننساه
حسافه
والسحاب اللي
تسامي في سما ودنا
ويوم أمطر
عطش صرنا
غريبه كيف صلينا
صلاة الغيث نترجاه
غريبه يا خطاوينا
تجافينا
كذا اربينا
ندفن همنا نضحك
واذا افرحنا
صار الحزن ثالثنا .. وحبيناه
إذا كان الجفا طبعك
أنا طبعي الوفا واكثر
شريتك بالغلا إنسان
وبعت احساسي كيف تقدر
كأن الود أبد ما كان
ولا فـ يوم الوفا اعرفناه
سامحني
هذا الصد يوجعني
رغم إني
إذا فز الوجع فيني
أقول: ابعد فـ امان الصبر
راح اصبر على اغيابك
وراح أنكر .. ولا أذكر
إني آخر احبابك
ولا بـ اشكي .. تعبت احكي
أنا حسبي من الشكوى
ما يسمعني غير الله