[خالد العروي]

أدري إن الوضع يصعب على بعض الحضور = والخواطر كسرها صعب والمعنى بعيد
والليال تمر وتمر وتمر الشهور = في مكانك سر مابه من الطاري جديد
راح نبقى بالشواطي على جال البحور = دون نسبح وسط الأعماق ونجيب الفريد
كان ما بان الخطا ما عرفنا وش يدور = على هالمنوال نمشي ونعطيكم مزيد
لو نغض الطرف يمكن على بعض الامور = لكن يصعب صب أساسات من غير الحديد
لا مجامل بالقوافي وتمرير الكسور = ما نبي جبر الخواطر على كسر القصيد
لجل ما تكثر مع الوقت ويزيد القصور = ونتساهل عبر الايام ويقل الرصيد
من خطانا نستدل الطريق إلى العبور = لا وصلنا مبتغانا هذاك اللي نريد
ودنا بالنصح من دون تجريّح الشعور= بالعلوم الطيبه عن سواها ما نحيد
والله إني ما أدور على هدم الجسور = بس ودي كلّنا من بعضنا نستفيد
يمكن اني قد تخطيت في بعض السطور = أعذروني يا أهل العرف والراي السديد