[احمد الشمري]

`

السلام عليكم ..

شعيل موتري ورفيقي الذي اسند عليه الكثير من قصايدي وهو رفيق شهم وصدره وسيع على راعيه ..
اليوم كانت هالابيات بعدما زودت حمل شعيل شوي وحسيت اني ضايقته !!

فقلت:

ياشعيل راع الطيب عمره ماينضام
... لو لح ثقل الحمل متنك ومتني !!

ابعترف واقول شكراً للأيام
... اللي عقب طول الامل علمتني

خذيت معها جاهلن عدة اعوام
... وهي بعد من خبثها جاهلتني

تزينت لي بالمظاهر والأوهام
... وعشقتها منجوم وهي عشقتني

واقفت وخلتني على دار الاحلام
... ومثلي كثيرن حتنهم مثل حتني

ومن حسرتي ركزت سني بالابهام
... وجريت لي ونة ندم واوجعتني

غلطان يامن تحسب العمر قدام
... العمر فرصه ماتحرى وتتني

إغنم زمانك بالتوكل والاقدام
... ولاتستمع لوقيل عايل وفتني

تراك تاصل ماقصرت عن الاقزام
... اللي من اسفاف الدهر طاولتني

بانفاسها ريح الحسد مروح وسام
... قومن لو ان الامر معها محتني

ولو مالظروره له مقادير واحكام
... ماصافحت يمناي يمناً لوتني

الوقت هذا وقت توقيع وارقام
... واهل التجارة بين جاتك وجتني

ضاعت تقاليد القبايل والاسلام
... والمجتمع مابين فتنة وفتني

فـ يالله ياللي بالمقابيل علام
... فزعتك يالله كان بقعا كوتني

ومادام تال العمر رقعة من الخام
... يالله بحسن الخاتمة لا كستني !!


وسلامتكم.