أنا لحالي ..
و راح ابريل .. و لا جابك .. مثل كذبه .. تجي بابريل
و راح العِذْر ْ.. ما دَوَّرْ .. ظروفٍ تدمح الزلّه
و راح اللّي بقابي من فضول يصدّق التأويل
و راح البَرّدْ .. ولي بعضٍ .. يلوذ وما لقى كلّه
تركني .. لدهشة الدمعه إلى ما خانها المنديل
تركني .. و الأمل قد مات بسيفٍ ما بعد سلّه
نعم جيتك على الموعد .. لعنت القال قبل القيل
نعم جيتك على الموعد .. وأصلي ماحترى ظله
نخيت اللّي بقى من نور .. يجيبك قبل ذلّ الليل
نخيت الوقت يرجع بي .. قبل لا يذلّني ذلّه
اعافر لحظة المغرب .. و نهاري ما بقي به حيل
يا ليت الشمس ما تغرب .. يا ليت الشمس منشلّه
و ضجّْ الصمت .. و موالي .. نسى بشفاهي التمويل
وقف صوتي على حيله .. يعزّي القلب و موَّل له
أنا لحالي .. وكل الصدق .. يملا مسرحي تمثيل
أنا لحالي .. أنا الحالي .. كثيري صار يا قلّه !!!!!!
عبداللطيف بن عبدالله بن عبداللطيف بن ابراهيم آل الشيخ
نيويورك
7 ابريل 2010 م
http://www.sh3byat.com/vb/dewan.php?pid=49