|
أحبني
أحبني
أحبني .. و احبها من خلالي
أنا الأناني و كنت اظنّ انّي آحب
لقيت حالي فيك .. و حبيت حالي
و صرت اقنعك إني أحبك و انا اكذب
أكـيّـف المنطق بمنطق خيالي
و اطاوع اسهل حس .. و اهرب من الصعب
و اجنّحك و اطيّرك للعلالي
و اذكر بإني قلب و انسى ان لك قلب
مرايتي عييّت تفارق قبالي
الذنب فيني أو هي مرايتي الذنب !؟
هذا أنا ما اشوف غيري لحالي
اغمض احساسي و بحساسك العب
بفضح غروري و انتقم من ظلالي
و ارجع لدربي قبل يجحدني الدرب
شكراً لعقلك جرّني من هبالي
ولا تركتيني عليّ أعلن الحرب
عبداللطيف بن عبدالله بن عبداللطيف بن ابراهيم آل الشيخ
|