السلام عليكم ورحمة الله وبركاته
يشرفني تواجدي بينكم
الشعب والدوله بني عم واخوان=في صف ابو متعب قبيله قبيله
مترابطين كنهم عقد مرجان=دون الوطن بالواجده والقليله
يا شعبنا رزوا على الدار بيبان=تعصى على خطل اليدين العميله
كونو لعبدالله نواجذ ونيبان=لا غوي راع الدرب جرة دليله
لا هان ابو متعب سلايل كحيلان=صقر العروبه لاتعزوى نجي له
مدة يمينه كنها سيل ودان=عم الديار وربعت عقب سيله
رجل يخاف الله وفي قلبه ايمان =نطلب من الله يحفظه لا يزيله
ولاهان ساعد قايد الشعب سلطان=سقم العدى طب القلوب العليله
ويعيش نايف محتمي كل ميدان=عين الوطن زند الحمول الثقيله
الله زرع بقلوبنا حب الاوطان =ما زاغ عن مهاجنا الا خطيله
ياللي تسوم ارضك على فلان وفلان=السود فالك يا حزام الفشيله
يا ابو قناة طيرها سود غربان=انشهد انك لاش وانك هتيله
وينك عن الخفجي وعن ريع دخان= يوم المشوّك والثميدي هميله
مثل الحصيني زاع صوته ولا بان=وليا غزى يمتط فرث الهزيله
منت بنديد للبطل يا سعيدان=كلٍ على قده يدور زميله
لا بالله اما عالي القدروالشان=عبدالله اللي ما ندور بديله
كله وفا كله صخا كله احسان=كله على بعضه صفاتٍ جليله
غيره على وجهين شابع وجيعان=يبلع غناة ارضه ويلعب بذيله
من قال عن طلابة العدل جرذان=يجيه يوم اسود منيل بنيله
لبسه من اشجار البحر ياخذ الوان=يصلح على الكورنيش بايع بليله
لابد يجرع كاس حسني وسوزان=كاس يفرق بين خل وخليله
ماهي شماته لكن الصدر مليان=والشعر غايه بررتها الوسيله
سد اليمن ما خلخله غير فيران=واركانه انهدت وراحت عبيله
ما دامت الدنيا لكسرى وهامان=كم ظالمٍ خطط وابت تستوي له
نسمع على باب اليمن حذف غيران=ونشوف عمدان الدبى في نخيله
والشام يطبخ قدرها فوق نيران=والزاد عكرة ظب واسلاب فيله
هذي هي الدنيا منازل وميزان=كل على ماقيل يكتال كيله
سعر الوطن في مهجتي غالي اثمان=سامي وقطرات الولا من دمي له