كنت احسبك
غير البشر
كنت الوفا ..
بس للأسف
طبع الوفا .. تحول غدر
كان الزعل .. يا صاحبي
لو يوم صادقنا يمر
لحظات .. تملانا حنين
تترس ليالينا كدر
شـ اللي حصل
الدهشه حبلى بأسئله
شـ المشكله؟
شي بيننا .. طاح وانكسر!
منهو الوفي في هـ الزمن
منهو الـ يحب
وابـ ليل المفارق ما يحن
منهو الذي .. فيني سكن
وكان الوطن
مو كنت لي في وحدتي
منفاي لو ضاق الصدر؟
معقوله كان الـ بيننا
بس ثرثره
أو بعثره
ولا سحابه عابره
ابـ صحرا الجفاف ..
ذابت مثل .. حبة مطر؟
كنت اعتقد .. إن انتا غير
كنت احسب الدنيا معك
جنه .. عصافير وشجر
خابت ظنوني كلها
وثوب الوفا .. الـ شفته عليك
أبيض نقي
يوم الحقيقه بينت
شفته مدنس بالغدر!
يا صاحبي ..
لا تفتكر .. بـ اندم عليك
ولو دمعتي .. حنت تبيك
بـ احبسها غصه داخلي
وجوا الصدر
راح اغسل ادموعي ابـ صبر
مات الوفا
وتغيرت لك نظرتي
دربك خضر
روح ابتعد ..
الله يسامح غلطتي
روح ما أبيك ابـ دنيتي
عفتك خلاص
وراح احسبك ..
واحد مثل .. باقي البشر ..