أسعد الله أوقات الجميع بخير
من الجديد لعله يناسب الذائقيه الشعريه لديكم ولعله يشفع لي غيابي عن منتدانا الغالي
قال المغني بدا في مرقبٍ عالي=عصريةٍ تنعش الذكرى توابعها
ماحوله الا حوايم روس الأقذالي=ولا نوادر بنات الفكر يبدعها
ويسوق من ما تهيا زين الأمثالي=بهجوس فكرٍ على المعنى يطوّعها
ويهل دمعه على درّاس الأطلالي=منازلٍ يفجع الناظر تصدعها
في جَر شعبٍ قديمٍ موحشٍ خالي=منزال قومٍ بقى تالي قرايعها
وقت مضى ياوجودي يابري حالي=وقت القروم الي تشرف روابعها
أقولها ماني بداله ولا سالي=مليت جو المدينه مع شوارعها
الحمد لله على الشدات متوالي=بعزوم صدر على العزه مراتعها
ما أرخصت غالي ولا طوحت بعقالي=إلا لقرمٍ سلوم الطيب يتبعها
رفيقي الي ليا من الدهر مالي=فزعته تكفي عن الدنيا مطامعها
يفز فزة شجاع بحرب وقتالي=ويجيك مثل السحايب في تدافعها
يفداه يوم الخساير جمع الأنذالي=ناس عن الهرج ماترفع مسامعها
ناس تحرى لهرج القيل والقالي=على الردا دايم تلقى طبايعها
فالبعد للي شكى هم وغربالي=يبري جروح وسيع الصدر ما أوسعها
وجلسة خلا لا تعومس طيب الفالي=أخير من رفقةٍ تقصر منافعها
[/poem]
سوالم
نايف بن زايد