[عبدالله الشلاقي]

لي ثلاث سنين يا بندر و أنا ما نيب طيب
ما قويت أدله وأسلي خاطر يا شين فاله

خالطت عذراء هجوسي وحدةَ بأشباه ثيب
لا رعاها الله وش لي به أورد له حباله


انحمست الله يجازي هالزمن يومه يخيب
واحد ما قد سلك دربً يقوده للضلاله

واحد مثلي عصامي ما يبي منة قريب
الله اللي عزه بيمنى تساعدها شماله

عن دروب العز والطالة حشا ما قد تهيب
ما نشد عمه و خاله ما نشد عمه و خاله

وهذا أنا دون الثلاثينات والعارض مشيب
يا شبابً راح نجمه وانخسف حتى هلاله

يا يباس طال يرجي برق وسم ورجع صيب
وخانته سود النصوب اللي تمننه ابتلاله

ذاوي غصن البخت فيني وعني ما تغيب
شمس الأمس اللي بحرقتها توريني نكاله