[ناصر الفراعنة]

[c]
بسم الله الرحمن الرحيم
والصلاة والسلام على أشرف الانبياء والمرسلين
من العايدين ومن الفايزين إن شاء الله
وكل عام وأنتم بخير .........
أبى موضوع هذه القصيدة والتي يهم كل مسلم عنده غيرة إلاأن اصافحكم اعزائي
هذه هي الملحمة المقدسية (ملحمة بيت المقدس)
وهي الف بيت ..وهي تدور حول ثلاثة احلام رأيتها في المنام
كان اولها سحاب رأيت وكان ثانيها قصر دخلت وكان ثالثها غلام
قابلت في المنام وهو في الجنة ..ودار بيني وبينه حوار طويل
والذي علمت من آخر الحوار أنه الطفل الشهيد محمد جمال الدرة
الذي قتلوه الصهاينة ..والحقيقة انني احتفظت ببعض الاجزاء في الملحمة لنفسي
وفي الملحمة نبذة عن تاريخ اليهود ونبذة عن تاريخ العرب
وندبة للمسلمين ورثاء لأطفال الحجارة
وللمعلومية هذا هو اول طرح للملحمة
وهي هدية مني الى روح الطفل الشهيد محمد جمال الدرة
والى كل طفل من اطفال الحجارة


وإلى صاحب السمو الملكي الأمير :
سعود بن عبدالله بن عبد العزيز آل سعود حفظه الله

لما يتمتع به هذا الرجل من الصفات الحميدة
ومعايشة ما تعانيه أمته العربية والإسلامية
هذا واتمنى من الله العلي القدير أن يجعل عملي هذا خالصا لوجهه سبحانه
إنه نعم المولى ونعم النصير
وسوف آتي بها على أجزاء كي يستوعبها المتصفّح
[/c]

[poet font="Arial,4,white,bold,normal" bkcolor="black" bkimage="" border="outset,4,gray" type=0 line=200% align=center use=ex length=0 char="" num="0,black" filter=""]
بسم الله نبدأ
,,
,,
,,
,,
(1)

مل قلب ما يكف=حيلته يوم اعتكف
ضرب كف فوق كف=لا يحِب ولا يحَب
بين سر وبين ضر=بين خير وبين شر
بين كر وبين فر=مثل غوّاص الغبب
لا يكل ولا يمل=مستحل مستقل
مستعز مستذل=مستربّ مستلبّ
يوم شفته يستدير=قمطرير زمهرير
مستثير مستذير=مستعل مستطب
قلت ابرقد واستريح=ويش بيدي لو بأصيح
وفوق تخت من ضريح=شفت موتي عن كثب
زارني وسط المنام=حلم اسود مستهام
قال والله ما تنام=لو تخبّى لو تخبّ
ولّ حلم في عجل=جل دق ودق جل
عن مرة صارت رجل=عن ربيب مستربّ
شفت في حلمي سحاب=احمرٍ مثل الخضاب
اسود ريشة غراب=ومرّة مثل القهب
يا سحاب في الخريف=من مشافه يوم شيف
يرجع المبصر كفيف=واخرس القوم يخطب
منه ساعة يستشيع=يختلف قلب الشجيع
ينقلب راس الرضيع=ابيض ابيض مشلهب
في جنوبه قدح نار=في مواخيره شرار
في مقاديمه حمار=مع سمار من عقب
حسبك الله من مطر=مويته دمّ حمر
ابرديّه من جمر=ساقه المولى غضب
ضوح برقه يوم لاح=دمع طفل يوم طاح
صوت رعده يوم صاح=صوت عذرا تغتصب
اوله طعنة جريح=واوسطه طيحة طريح
وآخره جثّة ذبيح=فوح نار ذا شعب
قلت هذا هو اكيد= من بلي به من يحيد
كل شيطان مريد=يال سوء المنقلب
اهلك الله فيه عاد=هل إرم ذات العماد
وكل طاغي في البلاد=للخنا قام يهذب
قلت لحظة يا سحاب=خذ سؤال وجب جواب
رحمة والا عذاب=انته من اي الجبب
قال عني لا تسل=روح للأقصى وسل
باحمر الدمع اغتسل=شعب كامل وارتعب
دون الاقصى ما نحيد=عن شبا السيف الحديد
عند ذالعرش المجيد=سد ثقب لا انثقب
وقمت من حلمي جزوع =شايف شيِّ يروع
وقمت ازوع المر زوع=وقمت اضب الفكر ضب
الحلوم المحزنة=ثانيتها عن سنة
عزي لمن تشحنه=كن بيديها مجب
وقمت احسب بانسجام=قلت اجل بارجع وانام
لا جزاها الله حلام=تكشف اللي في الغبب
وجيت مسرع في المسير=خايفٍ نومي يطير
ناحر هاك الوثير=مرقد حلو المذب
يوم طرفي في كراه =سج جاه الحلم جاه
حلم آخر وابتلاه=لين شفت الخبت خب
شفت لي شي يهول=يذبح القلب الزعول
لا يحيل ولا يحول=انحب القلب ونحب
شفت خمس مية شحوف=الصفوف اثر الصفوف
والسيوف اثر السيوف=عسعس الليل وسرب
شفت خيل حذو خيل=ليل صبح وصبح ليل
نوب حط ونوب شيل=نوب ربع ونوب غب
السيوف امفسّرات=والسهوم موسّرات
والرماح مكسّرات=وكل مسنون شرب
كل عذرا في غبيط=حولها طفل شطيط
من لحم جوفه يخيط=ثوبها يوم انسلب
ومسجد الاقصى ورا=عن وحمهم في ذرى
في وشاح لا يرى=كالذخاير في الجربّ
من فلسطين الرجال=من عمام ومن خوال
كبّر الاقصى وقال=هيّدوا يا اهل الثرب
دام هذولا هلي=احمد الله ما علي
اضرب الخبت الخلي=ما حسبت حساب غب
ربّع الاقصى ولعب=دونه الاطفال شعب
ما على الله شي صعب=لا شكوك ولا ريب
كل طفل في جماه=عضّ واظهر له حصاه
حط الاقصى في حشاه=وفي عيون النذل شب
سايق روحه فدي=بعدي والله بعدي
من يده ما هي يدي=عرش صهيون اضطرب
طفل برمية حجر=روّع اولاد الغجر
لين لاذوا بالشجر=واستغاثوا بالربب
صار شي ما يصير=ما عجز عنه الكبير
جابه الطفل الصغير=غصب غصب مغتصب
هو مثل غيره حريص=ولا العمر عنده رخيص
مير والله يا بخيص=باع روحه واحتسب
هو درى أن لا حياة=دون الاقصى أو نجاه
وان لا شيئا سواه=يوصل الجنة محب
ناطح الموت يعدي=وْلدي نفدا وْلدي
من سهيل في الجدي=في سما العليا دأب
وقمت من نومي مخيف=كن فوقي حد سيف
قلت لطفك يا لطيف=قرّ يا جنبي وطب
وقمت افكر واستخير=قلت ما في السهر خير
لا يعار ولا يعير=يحتصب ما يختصب
قلت عونك يا معين=ودوب طرفي يستكين
زارني عقب الثنين=حلم ثالث وانتصب
شفت لي طفل صري=أبلج عظمه طري
كنّ في خده زري=ضوح نار في حطب
لا بس ثوب حرير=قلت ذا شيّ كبير
يا ابن حاكم يا ابن امير؟=يا ابن سادات نجب؟
فوق صدره طيلسان=وفي يمينه صولجان
قدمه آلاف الحسان=خرّدٍ بيض خُلُب
ألف شقر غانيات=والف سمر جاريات
وألف بيض دانيات=لولبيّات القُضُب
وألف كالفيروز جرد=وألف كالياقوت مرد
وألف تُسقى ماء ورد=من جمال منتخب
فوقه احمر ألف كاس=قدّموها أهل ألف طاس
لا يباس ولا مساس=حمر خالطها صهب
نور خدّه والجبين=مثل نور الصالحين
أو كؤوس من لجين=بيض ما فيها شوَب
ريح ثوبه زعفران=ديدحان قحويان
فاح من بين الثمان=عود جاويٍّ أشب
كنّ في ثغره درر=وكنْ بياض ايده شرر
لا ضرار ولا ضرر=يجرح القلب المشب
وسط قصر كالزجاج=كنْ جداره برج عاج
وأسقفه ملحٌ أجاج=مثل منقوش الكعب
فوق عرش من جمان=لبّسوه الإرجوان
في جنوبه قرطيان=مثل مركوز الطنب
قلت من ذا يا ترى؟=إنس أم جنٌّ أرى
ويش ذا يا من قرأ؟=ويش ذا يا من كتب؟
قلت هذا شهريار=وشهر زاد اللي يسار
قلت لالا كيف صار=مثل ذا ماله مربّ
قلت هذا التركمان=أو أجل جنكيز خان
قلت لالا كيف كان=مثل ذا وصفه عزَب
خذت لحظة كالسفيه=عقبها اومى لي يديه
قال زاير قلت إيه=قال قلّط وارتحب
قال ابسأل قلت سم=قال ابطلب قلت تم
بس سلّم واستلم=قال يا ضيف درَب:
يعربي والا حديد=قلت له هات المفيد
قال مسلم قلت اكيد=لو شذبنا من شذب
قام قال ارحب يا اخوي=يا ابن امي وابن ابوي
لا مطيع ولا عصوي=حِلّ والمغرب غرَب
اسألك بالله يا ضيف=كيف حال القدس كيف
مسجد الأقصى الشريف=كيف حاله والصحَب
قلت لحظة يا صغير=وانت وجهك وجه خير
لا بشير ولا نذير=لا مغبّ ولا مطبّ
ودي اسأل لا تهون=من تصير ومن تكون
اختلط نون بنون=واختلط دبّ بدبّ
ودي اعرف يا نما=أنت من أيّ الحما
أرض والا من سما=لأيّ حيٍّ تنتسب
قال أفا,عن ذا وفا=ما خبر خافي خفا
ضاع وجه في قفا=واكثر الماضي حثب
أنت ناسي يا فطين؟!=قم وطالع فيّ زين
كان لك أُذن وعين=مْحجرها ما غرب
قلت لا تشره علي=النواظر كالدلي
دلو يرجع ممتلي=ودلو يفشل من جذب
مثل ما قال الخليل=النظر حطّاب ليل
خبط عشوا في مسيل=لا تلومه لو زلَب
والشفق ثم الغسق=والقمر يوم اتّسق
عن طبق أعلى طبق=ما بقى جرح وطبّ
بس ذكّرني وشوف=كيف يجذب صوف صوف
كلّ ذكرى وسط جوف=فوقها الماضي سهب
ثم سكتّ وهو سكتْ=وعقب ساعة ما انحكت
كلمة,عينه بكت=قلت يا صغيّر أجب
وسج لحظة ثم بحَص=شمّر الكم وقحَص
شفت في عينيه حص=دمعة ماها دعَب
دمع موق روق روق=نوب تحت ونوب فوق
في مثل سمر البروق=اسود العين اغيَهبّ
وجض قلبه واصطفق=وهل دمعه واندفق
وقام يشبح في الأُفُق=كل نجم مضلهبّ
وشفت في عيون الصغير=راهبٍ في وسط دير
ماردٍ في وسط زير=جمرةٌ ذاتَ لهب
طفل قلبه قدح نار=شظوةٌ تقدح شرار
ساكنين اقصى الديار=من سناها في غيَب
قلب طفل ابو ثمان=نبضته في القيروان
أسمَعت من في عُمان=وأرعبت من لا رعَب
وعقب ساعة في سما=التفت كنّه عمى
في عيونه طشّ ماء=عاكس النور ورغب
قال سبحان المعين=وين أنا قبل امس وين؟
وشوف انا ذا اليوم وين!!=في جنان لا تُسبّ
وقلت أنته وش تقول=وش خبر ذولي وذول
لا تجنني اقول !=شف ترى راسي ضرب
خل قلبي يستريح=يالصغيّر كن صريح
ذي.هي الجنة صحيح؟=والا ركبة مالركب
قال يا طالب غنى=ها هي الجنه هنا
وكان ناسيني فأنا=من هل القدس انتسب
يوم الاقصى صاح صاح=الكل قالوا طاح طاح
كود انا درت السلاح=رب نصرا كان رُبّ
مسجد الصخرة ينوح=وقبة الصخرة تلوح
ما بعد هالروح روح=لعنبو من لا حضَب
يوم صوّت لي وقام=قلت اقول ارتح ونام
دام انا حي بتقام=والامان بيستتب
قال انا روحي بيديك=لا يخيب الظن فيك
قلت افا والله عليك=انت عيني والحجَب
يوم ينخى اهل العبي=بإسم عيسى والنبي
قلت أمرك وش تبي=ما تبي عده وجَب
آه يا لبّى ثراك=وآه يالبّى سماك
يا عسى روحي فداك=اطمئن واقدع رطب
يوم جدرانه شكت=جرّت الصوت وبكت
لعن ابويه لو سكتّ=والله لا اشبّ الحرَب
يوم كلب الصومعة=في خضمّ المعمعة
جاب خرفانه معه=يحسب الاقصى مصبّ
يحسب انه يستطيع=دهمة البيت المنيع
ما درى أنّا جميع=ارواحنا دونه نَهِب
يوم حكّام الفلَس=خانعين للدنَس
هايمين في الونَس=يْتساقون النخَب
قلت لا واللي خلق=ابن آدم من علق
ما نطاوع للسلق=وآخر الدنيا مضبّ
عن محرّفة الكتاب=دون بيت الله حجاب
قوّةٌ منها يهاب=راس قوم لم يهَب
صفّت الاطفال صف=دون الاقصى صفّ صف
يا موصّف وش تصف؟=من مروّية الغلَب
من مطلسمة الخطوط=من بقايا قوم لوط
في حجارتنا صعوط=فيه للغاشم عطَب
من ثعابين الوطا=ما رضينا بالخطا
سيفنا سيف سطا=في جناب وفي جنَب
بالوجيه العافرة=والقلوب الكافرة
جاء وبيّن خافرة=كلب صهيون ولعَب
بالنفوس الدانية=والرقاب الحانية
يبغى ولد الزانية=في حما الاقصى يطبّ
ابصواريخ تروع=مع مدافع مع دروع
صنع عبّادة يسوع=صال في شعب عزَب
بألف طيارة شبح=وألف غواصةسِبَح
قلقص الكلب ونبح=من كلاب في كلَب
بالسفن ذات الرؤوس=والكواسح والتروس
شبّ له حرب ضروس=كان عهد امس وقلب
بأسلحته الضاربات=والقنان القاهرات
جاء عشير العاهرات=ثوّر الحرب وثرَب
يالوجيه الدانعة=والجلود الخانعة
جاء يدور اليانعة=...أمّه مستقبّ
مير ربي قطّنا=في نحره وحطّنا
من شرب كاس الطنا=يثني لا مِسّ الحقَب
لو يجيب اللي يجيب=الف مليون حريب
وكلّ عبّاد الصليب=وكلّ عبّاد النٌصُب
لو يجيب اهل البطان=من شياطين وجانّ
الجبان ابن الجبان=ما عرفنا له حسب
نقلبه من فوق قلب=ونحلبه من تحت حلب
كلب ابن ستين كلب=ثب يا إبن الكلب ثب
بالقلوب الطاهرة=والجباه الزاهرة
والعيون الساهرة=مرابطين فوق قُبّ
بالسيوف الساحقات=والرماح الماحقات
والجياد اللاحقات=نستلم سِرو العِبَب
السيوف من الشجر=والرماح من الحجر
والجياد ارضٌ زجَر=رملها الطاهر وهبّ
من ثلاثة لا ثلاث=كلب صهيون استغاث
قام يمشي في الحثاث=حافيٍ ياطى القِتَب
عقب فسقات الرخا=لان راسه وارتخى
وان تعزوى وانتخى=ندعس امه بالكعب
وكان ما طاوع ولان=نلحقه نارٍ دخان
مثل نار الموبذان=تحرق القلب العسَب
دون قبة مسجدي=يا سرائيل اهجدي
اسجدي تحت اسجدي=مالك اليوم مْحَجَب
حن محيّرة القطا=الخطا عجل الخُطا
العطا عقب البطا=سلّة السيف الحدَب
كل طفل من طلع=به على الهيجا ولَع
ما عشقها من دلَع=كود من جبٍّ يجبّ
في جهار من نهار=شبّت الأجواء نار
صوّت الاقصى وثار=مثل ملحٍ لا التهب
قلت أمّن واعتلم=من دخل وجهي سِلِم
يلعن الله من ظلم=ودون حقك ما وثب
ابشر ابشر بالسعد=لا يهمك من وعد
لوّ قام ولو قعد=لو تطاول للشٌهُب
يا حبيب حنبله=من حشاي وسنبله
لو رموا به قنبله=نبت غير الحبّ حبّ
يوم ردوا للسلاح=والفلاح من الصلاح
دمّرت هوج الرياح=بيت صهيون الأكبّ
أحد رشّاشه معه=واحْدٍ اعزل ما معه
كود حيدٍ نزرعه=في جباه اهل الثغب
والحجر في يد أسد=يْحَصِد ما لا حصد
ألف رشاش بيد=كلْ جبانٍ مستخبّ
بيننا طال النهار=لين أمر الله صار
صابني منهم عيار=يحمد الله من طلب
صابني يوم المصاب=طلْق رحمة لا عذاب
وشفت أنا حسن المآب=شوف عينٍ ما كذب
لو دروا من بالعمد=غرّهم طول الأمد
ما وهبنيه الصمد=بعد دهرٍ ذا سغَب
كان ذبّوا بالحياة=ذبّة الحافي حذاه
وكل سلطانٍ مناه=جنّة عز الطلب
مثل ما عينك تشوف=جنة عنها الوصوف
تقصر وعنها الحروف=ما تصب ادنى مصبّ
وقلت حسبك بسّ بس=بسّ.ما يحتاج مسّ
لا تهسّ ولا تنسّ=جوّد اللحم العصَب
وقمت اهلّ الدمع تحت=ثم برد حيلي وطحت
قلت ما الومك لصحت=أوّل السكرة رضب
يا صغيري يالحبيب=هالشكل ما هو غريب
قال:قل,يمكن تصيب=من قضب دلوٍ جذب
قلت واحد بسّ مات=واسمه محمد ثبات
والعمر سبع سنوات=صارع الموت ونشب
قال:ياناصر وصلت=ذا جواب اللي سألت
ان عدلت او ما عدلت=كل عود له مشبّ

يتبع...

[/poet]