السلام عليكم ..
صراحه مادري وش اقول ..((اجل اطلع برا ))
.. بس ودي اسولف وبما اني بقراطيسي وتو الميانه ماتشوتت ... فالله يعينكم معي ابصير رسمي هاليومين لين ربك يحله ...
بعدين اخاف اسولفلي سالفه سامجه ماتسوى علي تقولون ياكافي وش هالمهبول اللي طحنابه ....وانا ماني خايفن الا من واحدن اعرفه منذو مبطي وهو موجودن بينكم .. ياهو راعي شماته .. فاخاف ااتهور وافقد شعوري وانطلقلي بكم سالفه .. وانتم خابرين الرجال يتحقط لي .. وانا الزم ماعلي نفسي مابي اصير مثل سليمان ....
سليمان هذا مايعرف يسولف خير شر ... مره كنت جالسن انا وياوه لحالنا ... كالعاده ساكتين ... فجأه قال :: نوااااف ...
قلت سم
قال :: ياخي انا عندي ولد شقي مرررره
انا استانست مو لان ولده شقي لا والله بس قلت اخيرا يبي يسولف ..
قلت :: اي والله هالوغدان عليهم سوالف رهيبه (( ابي استدرجه عشان يسولف ))
قال :: اي والله انا ولدي شقي مرررره مررره
قلت وقد بدا الانفعال يطلع من خشمي :: والله العظيم دريت انه شقي انجز اخلص عطن السالفه ..
قال :: والله هذا ولدي حتى بالمدرسه عليه سولافات رهيييبه ..:what:
(( ياشينهم لاتبدوو )) قلت :: بالله عليك ماتستحي على عمرك ؟؟؟ لعنبو بليسك ثلاث سنين ماعمرك قلت سالفه سنعه ؟؟؟ اقول لاعاد تسولف لي ولاتعرفن ولااعرفك ...وفوق هذا نحيس وعفن
طبعا قلت الكلام هذا بصدري ...
عاد بدا هالامر يؤرق مضجعي ........(( بتتكلم انقليزي يامرسي ؟؟
مالكم بطول السالفه .. انا واعوذ بالله من كلمة انا ماودي واعوذ بالله من كلمة ماودي اصير واعوذ بالله....الخ ....
ماودي اصير من هالنوعيه ...
ودام اننا بهالموضوع اذكر هكالحين كان عندنا مدرس على كيف كيفك تحطه على يمناك بس مشكلته انه مايدري وين هي موجهه وياكثر يسولف بس سوالفه مالله حاليهن يعني دماااار ....
مره عطان هالسالفه .. يقول:: مره طلعت انا واولادي للبحر ...
حنا انشدينا معه واللي كان يكتب ترك القلم واللي كان نيم قااام ..
قلنا :: اسلم
قال :: وراح ولدي يلعب .. وبعد شويا جاني يركض ويقول ابويا ابويا .. قلت له ايييييوه ياولدي ايش تبغى قال ابويا موية البحر مالحه ...
حنا متحمسين معه ولا كمل ..
قلنا ايه وبعدين شصار ؟؟
قال :: بس هادي هي السالفه .. قلت له ياولدي كل البحار مويتها مالحه (( لاهنت على هالمعلومه الجزله ))
المشكله اننا كنا محتاجين له هكالوقت
وكله تهون عند شيبان المقاهي ...
كنت جالسن لحالي مره والجلسه اللي بجنبي ثلاثه واحدن منهم مستلم الجلسه .. يسولف والباقين داغين بلهم كبسه مهم يمه قال :: تذكر هذيك المره يابوعلي يوم اسافر انا وام العيال ؟؟؟
... واحدن منهم هز راسه الظاهر انه ابو علي (( وش هالاكتشاف الخطير ؟؟
))
قال :: ياخي مرينا بالطريق مطعم .. ونزلت قلت لهم فيييه سمك قالو لا مافيه سمك ... رحت لام العيال قلت لها يقولون ماعندهم سمك ..
قالت اسالهم اذا عندهم لحم .. ورحت سالتهم فيييه لحم قالو ايه فييه لحم ورحت للمره قلت لها يقولون فيه لحم ((الله يعين هالمره على فداغته )) قالت لا اللحم حقهم مو زين روح اطلب لنا دجاج واطلب للعيال سن توب ..((وش هالتسبود سن توب مع الكبسه ؟؟ ... ورحنا واكلنا عندهم دجااااج ...ههههههههههه
ههههههههههه وضحكو اخوياوه .معه..
وهو يقوم لك الثاني ويقول لرفيدزه تتذكر يوم اروح انا والعايله عمره ؟؟؟؟ قالو ايه ايه اسلم ... وهو يسرد هاكالسالفه اللي اسمج من اللي قبله ولاودي ادبل تسبودكم به ...:what:
عاد السؤال اللي يلعن جدف نفسه ...
وش بلا هالعالم ماتعرف تسولف ؟؟؟
ولماذا لايتعلمون كيف يسولفون ؟؟؟
ماهي مقومات السالفه السنعه ؟؟
ومامصير الاجيال القادمه ؟؟
ماذا يعتقد المسولفون انفسهم ؟؟
الا يجب ان يتاكد المسولفون من سالفتهم قبل ان تنسولف ؟؟
هذا ماستشاهدون في الفيد المتفاخت ...
تحياتي