( ياعيب .. ياعيب )
البارحه .. في تالي الليل ياذيب
شرد بي الهاجوس .. وأثره مشقّه
اجيله بترحيب .. ويقول ترهيب
الجرح جرحك .. وأنت داوه ووقّه
أحدٍ .. يقينة عند من يعلم الغيب
و أحدٍ .. خذاها من شوارع لـ أزقّة
ياليتها .. لا مسّكت ياولد طيب
ماتمسك الاّ .. في كفو يستحقه
احيان أشبّب .. وان غزى راسي الشيب
كنّه بشقّه غير .. وأنا بشقّه
واحيان اعوّد خوف من طرّة الجيب
ماني بخبلٍ .. طرّ ثوبه وشقّه
مبادئي .. ماهي مزوح والاعيب
ومشاعري .. ماهيب تحتاج رقّة
ياراعي البستان .. في ذمتي عيب
لاجيت بستانك .. فذرّه وسقّه
بعض الحميّا .. ماتوفي المواجيب
وبعض الرجال .. تعاف جلّه ودقّه
ودك لو ان بعض اصدقانا معازيب
يمّا يطقون الزراج .. أو نطقّه
والاّ استعاذوا .. من رداة العواقيب
وماكل تعليمة .. تجي بعد دقّة
اخبرك .. راعي بندقٍ دايم تصيب
حرّ وتبوج المهمان .. وتعقّه
لكنّ .. قلّ لمشذبين العراقيب
ان العرب .. كلن ترى فيه حقّه
واذا ضوت مـ الشعب واضحت مشاعيب
شوري عدوّك .. قبل صاحبك نقّة
محمد الدحيمي