[أسير الطيب]

مد النظر واطو الفضا طي صفحه=في دفة كتابٍ تقادم به الوقت
والوقت لا يثنيك لو طال جرحه=افتح شبابيك الأمل كل ما فقت
باب الأمل يسهل اذا رمت فتحه=وباب التشاؤم يورث الحزن والمقت
والطير لامن قام واهداك صدحه=قوم اشكره اذا على نغمته رقت
لا تمقت الماضي ولو قل ربحه =ولا تنخدع في حاضرك لو توفقت
احفظ صلاتك واطلب الله صفحه=وارفع يدينك كل ما خفت واشفقت
واعرف ترى النيات بالاصل سمحه=تشبه لوجهك لا تهللت واشرقت
خذ لك مع فجرك من الذكر نفحه=الذكر يوقض خافقك كل ما انسقت
في عالم يصعب على العقل شرحه=يمد لك بالغي مهما تحققت
سطر الألم لا تكتبه قبل مسحه=أول متاهات الألم حين صدقت
إن التحلل خير ما فيه جنحه =وابفكار رواد الحداثه تخلقت
على الحيا جناه يبغون ذبحه=وتبقى عدو لو عن نواياهم انطقت
والكلب لو تكرمه ما مل نبحه=والجهل لو تترك دروبه تألقت
والعقل زينه فيه الافكار سبحه =لو تنفرط ضاعت وللجمع ما طقت
خذ الحذر من كل خاين ومدحه =وارجع لربك واذكره لا توهقت

تقبلوا تحيات

سعيد الغامدي

[شيخه المرضي]

والـوقـت لا يثنـيـك لــو طــال جـرحــه
افتـح شبابـيـك الأمــل كــل مــا فـقـت

............

[سالم بن جلعان]

هلا وغلا
وصح لسانك يالغامدي
نص جميل جداً
أبيات فيها من الحكمة الكثير
ومن الشعر الكثير
سرني مروري يا سعيد

تحياتي واعجابي


اخيك


سالم

[علي التركي]

صح فكرك على النصائح القيمة
وهنا درب من دروب الشعر ومناهجه الأصيلة
رسالة لكل عاقل

[سالم بن لجعان]

هذا هو شاعر العذوبه والاتزان والكلام السامي والرفيع


مشهود لك بالجزاله من زمان يا اسير الطيب

سطـر الألــم لا تكتـبـه قـبـل مسـحـه
أول متـاهـات الألـــم حـيــن صـدقــت

هذا البيت رائع بكل ماتعنيه الكلمه من غير قصور في بقية الابيات

صح لسانك وبيض الله وجهك