[سعيد بن مقبل الأكلبي]

[poem=font=",5,black,bold,normal" bkcolor="transparent" bkimage="" border="none,4," type=2 line=0 align=center use=ex num="0,black""]
صديقٍ عزيز يقول لي ليه ماتنشاف=ولا لك مع الشعّار فالمنطقة طاري
وانا لانشد عنّي فنا ماعلي خلاف=مادام انه وشرواه جمهور لاشعاري
انا خابر انه يوم ينشد يبي الانصاف=يهمه سمان الهرج وسمان الافكاري
وهذي طبيعه فالمناعير والعُرّاف=وساعٍ نهاياهم بعيدين الانظاري
يبين الوفا والطيب في حزة الميقاف=وبعض القلوب صحاح والله بها داري
ياراعي الكلام الذرب بهْدي عليك القاف=واغنّي على طرقٍ يغنّي به الساري
واعلمْك بعلومي عساها تجيك خفاف=وافصّل لك النشرة على موجز اخِباري
انا ماكتبت الشعر لاجل اكسب الالآف=ولانيب اوقّف به على بايع وشاري
ولا رحت ادوّر للمجلة عشان غلاف=وهي مالها بين النشامى ولا قاري
مانيب آتمذلق لين اطبّح على الاكتاف=ولا ادوّر الشهرة بتصريحي الناري
ولا اتعبت رجلي فالقنوات بالوِقّاف=وهي ماتبي الا من يذرّي مع الذاري
ماذليت عمري لو تبيّن علي الاجحاف=لإني عزيز النفْس واعز مقداري
عز الله محطات الشعر بعضها ينعاف=وعلى هَدمة الموروث مفعولها ساري
وسايط وجمع فلوس ومرايشه واحلاف=وصوتٍ على اذن المستمع يدخل اجباري
الا مارحم ربي مثل مطلق وصيّاف=والا مثل ابن جدلان ومحمد الصاري
رموزٍ عن الشعّار والا الشعر مضياف=ومعازيبة الجزلين في كل الاقطاري
وانا مايهيّضني لاعديت فالمِشّراف=الا دبرة الله فالصحاري والاقفاري
لاشفت الفيافي قُدم عيني وهي انظاف=هواها من هموم الحشا والقلق باري
يجيني على بدع المثايل ولَع وشْعاف=وهي كنّها تقول لي طب واختاري
ولا ابي نتايجها تجيني على الصرّاف=ولاهيب راس المال فحسابي الجاري
ابيها على قلبي تجي كنّها الاسعاف=لامنّه سرا ليل الهواجيس سمّاري
وابيها معا ليل الدجى كنها كشاف=لامنّه ولع فالليل ماحوله انواري
وابيها لاعِدّت فالمحاضر يصير اهتاف=ويطرب لها الجمهور من كل الاعماري
هذا راس مال الشعر والشاعر الحوّاف=اللي يحترم جمهوره كبار واصغاري
يطول الزمن ويدور ونهاية المطاف=يصح الصحيح وتنكشف عورة العاري