[بدر الضبعان]

مدخل :
ودعت حايل وكل أرض شماليه
. مستقبلي حدني عنها ومشاني
ودعت حايل شماليه وقبليه
. ودعت شمر بعد حيي وحياني

حائل هي المدينة التي ملكت قلوب من سكنها ، وانا منهم
متواضعه بسيطه كتبتها بيني وبيني في عالمي الخاص ، أحببت أن تشاركوني هذه المحبه
مع أمنياتي ان ترتقي لسكرة ذائقتكم

()()()()()()()()


القصيده بصيغة mp3

http://www.aldhab3an.com/bader-s/yahail.MP3

القصيدة بصيغة rm
http://www.aldhab3an.com/bader-s/yahail.rm



()()()()()()()()

دخيل الله ياحايل ابي أسبق دموع العين = وأبسأل : لو رحل عنك أحد يغليك .. تنسينه؟!
أحد عاش العمر شاقي عشانك بس ترتاحين = يشوف الراحه بحضنك اذا جيتي تضمينه
أحد عمره على شوفك من أول مارحل .. للحين = على كثر الأماكن مالقى غيرك ملا عينه
كتب أجمل قصيده في عيونك من قبل عامين = ولازالت على مر السنين أجمل بساتينه
كتب (ودعت حايل) من بعد هاك الوداع الشين = ولا جاله أحد يمســح دموعه (غير كفّينه)
خذا مده وهو يزرع أماني ./ والأماني طين = ولاحصّل من غيابك (أمل) يسقي شرايينه
تعالي شوفي / طعون الغياب / ومضرب السكين = تعالي وأحكمي / وأنتي لك عيونه وغالينه
تعالي يابلد (أمي) (وأبوي) وموطن الغالين = تعالي بس .. وأنتي لاحضرتي له تداوينه
مطر غيم ٍ سقى صدر الجفاف وسيّل النهرين = حيا عشبه على مد النظر وأنتي تخبرينه
أمانه عاد ياحايل ابي منك جواب الحين = تراني عايش ٍ عمري على كلمه تقولينه
أنا .. وافي معك وإلا مقصر ؟!! وأنتي تشوفين = رخص عمري على دمعك ولافكرت بسنينه
دخيلك ياثرى حاتم أبي أسبق دموع العين = وأبسأل : لو بدر سافر ؟! أو أنه مات ؟! تنسينه ؟!

وأعتذر عن قلة تواجدي لظروف قد لاتعطيني الكثير من العذر ولكن صدوركم أكبر لتقبله

مخرج :
الله ياهمي كنه جمرة ٍ حيه .
أخفي دموعي وحر الشوق بكّاني
يادار حاتم ترى لو طالت الجيه .
والله لرجع وانا مشتاق ولهاني

لكم محبتي / بدر الضبعان

[أحمد المطوع]

.
.

و لك طولة العمر يا بدر ..
أبدعت في مناداة معشوقتك " حائل " ..
و تستاهل حائل و اهلها ..

أعذب التحايا ........................

[الجازي]

لو حايل لهاعينان و آذان قطعاً ستتغاضى عن أي فراق عنها
وستعتبرك من الأبناء البارين لها ..
سلم نبضك ..
وتستاهل حايل بالفعل كل هذا التودد ..

[تركي عبد الله]

يخوي بدر ... لك طولة العمر ...
واعتقد انك فاهم الموضوع غلط ..
حايل ممكن تنسى ناس عايشين به الحين ..
لكن الطيبين الي مثلك .. حتى لو اضطرتهم الضروف للإبتعاد .. فهي تذكرهم جيداً وتشتاق لهم ..

لك فائق احترامي يالعزوه .... وصح لسانك

[نورة العجمي]

صح لسانك
وتستاهل حايل الكتابه عنها

كل الود والورد
والشهر عليك مبارك