[علي الخطيب]

اصدقائي في شعبيات ..

تحية عطره واتمنى ان يحوز الجديد على رضاكم .. واعتذر عن الانقطاع لظروفي العملية ..

خافي من الله والشعر قبلك حسوف=يبكي على ما قيل به وش يفيده؟
ماهوب فيك ولا لقى مثلك وصوف=آخرها بعيونك وحاله فريده
صفّة رموشك كنّها زحمة حروف=وقامت ترتّب لا رمشتي قصيده
تقول ربّي سوّى بالناس معروف=وجعلك مع باقي البشر في عبيده
يا لهفةٍ جابت ثمانين ملهوف=ومن سبّتك راحوا فقيده فقيده
او قصّةٍ ما هيب للسمع .. للشوف=كنّي طفل واطلب عيوني تعيده
خافي من الله ولاّ انا فيني الخوف=لولاه اسوّي بالهوى ما اريده
وصايفك ما ترحم الحال وتروف=كل ما كتبتك جبتي حاجه جديده
خصلة شعرك لحالها حرب وسيوف=لانها على اهدابك تسوّي مكيده
ومبسم شفاتك لا غدت حوله حتوف=حبّات خالٍ حاولت بس تصيده
وصدرٍ ما بين انّه مغطّى ومكشوف=ما ينفع اللي مناظرٍ فيه سيده
وحضنك دفا باوّله تتعانق كفوف=وآخره يتعانق وريدي وريده
والخصر يشكي ما خذت منّه ردوف=واثره يحوّل للردايف رصيده
تبختري والناس تلويح وكفوف=وانا الوحيد اللي ذخر رفعة ايده
حذفت قلبي للسما غير مأسوف=وامطرت لكن في الديار البعيده

وسلامتكم ..

[سعيدزهران]

وامطرت لكن في الديار البعيده
صح لسانك ياالخطيب...
السعيد

[الغناوية]

صح لسسانك يالشاعر

[خالد بن صمّان]

صفّة رموشك كنّها زحمة حروف=وقامت ترتّب لا رمشتي قصيده

[center]وسلامتكم ..[center]]

البيت ذا ^^^ يكفيني لاقول انك مبدع

صح لسانك يارائـــــــــع

تحيّتي وودّي

[علي الخطيب]

إقتباس الرسالة الأصلية كتبت بواسطة سعيدزهران وامطرت لكن في الديار البعيده صح لسانك ياالخطيب... السعيد

سعيد .. وما انا هنا الاً ماخذ من اسمك شوي ..

صح بدنك وعلا شانك ..

[محمد الدحيمي]

الله الله الله الله ياعلي
شفت اسمك ودخلت ابي اقرأ جديدك واعاتب غيابك
لكن هالدره شفعت لك غصب يشهد الله
لاتحرمنا منك يامبدع

[علي الخطيب]

إقتباس الرسالة الأصلية كتبت بواسطة الشيهانة صح لسسانك يالشاعر

صح بدنك شيهانة .. شرّفني مرورك

[ناصر آل مداوي]

صفّة رموشك كنّها زحمة حروف

وقامت ترتّب لا رمشتي قصيده

صح لسااااااااانك

كلمات رائعة والبيت اعلاه متفرد

كل التقدير لك

[علي الخطيب]

إقتباس الرسالة الأصلية كتبت بواسطة الشيهانة صح لسسانك يالشاعر صح بدنك يالشاعرة

[علي الخطيب]

إقتباس الرسالة الأصلية كتبت بواسطة خالد بن صمّان صفّة رموشك كنّها زحمة حروف=وقامت ترتّب لا رمشتي قصيده [center]وسلامتكم .. ] [center] البيت ذا ^^^ يكفيني لاقول انك مبدع صح لسانك يارائـــــــــع تحيّتي وودّي

صح بدنك اخوي خالد ..

والبيت الذي اشرت اليه .. فعلاً اتاني تعليق آخر عليه .. ولله الحمد

الف شكر لمرورك واطراءك من كل قلبي

[علي الخطيب]

إقتباس الرسالة الأصلية كتبت بواسطة محمد الدحيمي الله الله الله الله ياعلي شفت اسمك ودخلت ابي اقرأ جديدك واعاتب غيابك لكن هالدره شفعت لك غصب يشهد الله لاتحرمنا منك يامبدع

والله يبو بدر ان وجودنا هنا للمشاركة معك انت وامثالك من الاخوة والاخوات المبدعين

اصيل يبو بدر انك ما نسيتنا .. وهالدرّه وان كانت درّه .. فهي في بحر ابداعاتكم جميعاً

الف شكر على تشجيعك ومرورك من كل قلبي

[علي الخطيب]

إقتباس الرسالة الأصلية كتبت بواسطة ناصر آل مداوي صفّة رموشك كنّها زحمة حروف وقامت ترتّب لا رمشتي قصيده صح لسااااااااانك كلمات رائعة والبيت اعلاه متفرد كل التقدير لك

عزيزي ناصر ..

التفرّد بحقَ حينما اجد هذه الاشادات والاطراءات منك ومن الاخوة والاخوات

اشعر بانّي كوفئت على ما صنعت ..

لك كل الشكر يالغالي .. وصح بدنك

[غرم البهيشي]

علي صح قلبك

استمتعت بحق وارتويت من منهلك العذب

لا هنت ولك تحياتي