[قمر السلاطين]

كان فيه قطيع من الغنم بجانب التل والنهر يشرب من الماء ويأكل من الكلأ والأغنام هذي كان لها راعي اسمه فغران ,, وكان يصول ويجول بصحبة الأغنام في كل مكان وفي يوم من الأيام مر قطيع الأغنام من جنب جبل الذيابة وبما ان الذيابة كانت سهرانة طول الليل ماشافها الا واحد منهم الا هو ذيبان وطاحت عينه بعين وحدة من الأغنام اسمها شاهة شاهة كانت ذات قوام ممتلئ وكان بياضها ملفت من بد الأغنام وشعرها طويل يتدلى خلفها لدرجة انها اذا جات تعبر نهر خوياتها يرفعون شعرها عشان لايتبلل بالماء وتقعد تنافض عليهم وتعطس طول الليل وهذا لفت نظر ذيبان لدرجة انه من كثر مايقز فيها استحت شاهة وحاولت تداري نفسها من عيون ذيبان ورى جدتها اللي كانت باخر القطيع ذيبان قال من وين ذا الشاة المزيونة والله عليها عيون وبياض وشعر يطير العقل حاول يلحقها من بعيد لبعيد عشان مايلاحظ الراعي فغران ومن شعب لشعب ورى قطيع الأغنام لين حل الظلام وبمجرد حلول الظلام جا فغران ومعه صاحبه ودخل الغنم وحدة وحدة بالزريبة شاهة راوغت فغران وراحت ورى الزريبة تبي تشوف وش عند ذيبان وبما ان الراعي فغران يدخل بالغنم ذيبان ماراح يضرها بشي شاهة : خير وش عندك تلاحقني من شعب لشعب ,,, انت ماعندك خوات احرجتني ماصارت كل الغنم يسالوني وش فيك منتي على بعضك ياشاهة حنا نروح بشعب وانتي بشعب ذيبان : طيب شوي شوي روقي اسمعيني بالأول والله كني ذابح أبوك شاهة : والله وش يدريني يمكن انت اللي ذبحته يامأمن الذيابة يامن التبن بالخلا يمكن لحم ابوي في بطنك وانت واقف قدامي الحين بكل جراة ذيبان: صدقيني كل الكلام هذا ماله اي صحة ,, والأيام رح تثبت لك يعني تحسبيني الحين ما اقدر أكسر الزريبة ذي على روسكم واخمك مع كراعينك وامشي اقدر ,, اقدر بعد الحين احوسكم كلكم انتم وراعيكم هذا اللي شايفين نفسكم فيه مايدري وين الله حاطه لو فيه خير شافني وانا الحق وراك من صبح وهو مغير حاط ذا العود في فمه ومسوي طربان وماسك ذا العصا اللي مفكرها عصى سحرية والا يحسبها تبي تتحول عصى موسى بس انا ماني من النوع اللي ببالك,, والله يعطي كلن على نيته جاالراعي فغران يدور شاهة وهو ماسك العصا راح الذيب وتوارى عن اعين شاهة بسرعة فغران يالله وينك انتي عديت الغنم وانتي هنا مدري وش سالفتك اليوم دفع بها فغران داخل تلك الحظيرة واقفل الباب الخشبي باحكام نامت الغنم وشاهة مادخل عينها النوم ,, هذا غير الغباء اللي هم عايشين فيه مايفهموني ولا يفهمون احتياجاتي النفسية و الغريزية ماعندهم اي نوع من التطور ,,, يالله ياذيبان لو تشوف العذاب اللي انا فيه .. مداه الحين سهران وانا بين هذولي الطليان,,, اشرقت شمس اليوم التالي وبدت شاهة منهكة متباطأة الخطى بينما فغران يدفعها بين حين واخر بعصاه شاهة : وجع وجع خلاص ماشين حنا ياليتك ياذيبان يمي وتكسر ذا العصا على راسه جات وحدة من صديقات شاهة خير ان شاء الله وش فيك ماتناظرين الا من راس خشمك مافيني شي بس مليت من ذا العيشة ياليت يجيني اقرب واحد ويشتهي لحمي ويذبحني ياليت عيد الضحية باكر وافتك من ذا الراعي اللي حاط دوبه دوبي مافهمت عليك بس باقي سنة على عيد الضحية ,, وراحت ذيبان كان يراقب من بعيد كالعادة ومايقدر يرفع عينه من على شاهة وبينما الراعي فغران راح ورى صخرة يقضي الحاجة راحت شاهة لذيبان ذيبان :يا هلا والله بزينة البهايم كلهم شاهة :نعم وش جابك وراي بعد اليوم ,, وش ناوي عليه بالضبط ذيبان :اسمعي انا الحين سهران طول الليل وفيني نوم بس ابيك ضروري الليلة ابي اقابلك شاهة : ايييوووااا اييوة بالليل يعني ؟ صح اني من فصيلة الغنم بس ماني غبية ياحبيبي تستغفلني لذا الدرجة وتنفذ نيتك الشينة في الليل ,, لااااه اسمح لي ذيبان : يالله انتي ليش كذا عجلة وعلى طول متنرفزة يابنت الحلال انا مابي منك الا شوفتك اجيك الليلة ان شاء الله وعشان ترتاحين مانبي نبتعد خليك عند باب الزريبة بس ابي اشوف عيونك في نور القمر ذيبان :طيب اذا كذا خلاص ,,, فغران رجع الحين خيم الظلام على الحظيرة واتخذت شاهة مكان لها بجانب الباب ,, بدات تنطح الباب براسها وتركل القفل حتى انفتح الباب اتي ذيبان ومعه حزمة من البرسيم الفاخر والخضار المشكلة ذيبان :ياصباح الليل ,,, تصدقين عيونك بالليل احلى بكثير بياضك يلق تحت القمر ,,, انا الحين اسعد ذيب بذا الدنيا شاهة : ياسلام يعني تبي تفهمني اني اول وحدة بحياتك وش فيهن بنات جنسك ذيبان : الله يخليك لا تكلميني في الذيبات وتضيقين صدري مالي هوى فيهن شاهة : ليش ذيبان وهو حزين : والله اشكي ايش واخلي ايش,,, كفاية اني مااقدر ابات مع الذيبة مغير بروس الجبال بالليل تعوي,,وبالنهار راقدات هذا غير الكيد اللي فيهن و الوحدة ممكن تبيعك عشان قطعة لحمة والا هبرة مع خويك وبعدين مستقويات يعني مااحس فرق بيني وبين الذيبة نهائي شاهة: والله ياذيبان مثل مانت متنكد بعيشتك انا بعد بيقضون علي ذا البهايم اكل ومرعى وقلة صنعة ,, وبعدين مايفهموني ,, تشوف ذاك الجبل اتمنى اطيح من راسه والا ادحدر في بير ولا ارجع معهم في صباح اليوم التالي ذهب ذيبان لينتقي اجود أنواع التبن لمحبوبته شاهة في الليلة اللاحقة اتي ذيبان وشاهة تنتظره عند باب الحظيرة قدم اليها بعضا من التبن الفاخر وبدأ العاشقان يتجاذبان أطراف الحديث ذيبان : اقول شاهة بعدك للحين ماوثقتي فيه ,, شاهة : ومن قال .. انا اتحدى وحدة من ذا الغنم تجيك وتوقف معك باخر الليول مثل ماانا اسوي ذيبان: طيب ليش مانتحرك شوي ,, انتي ليش كذا حابسة نفسك شاهة : يوه بس ماني متعودة اطلع بالليل صدقني اطيح من اقرب جبل ذيبان : وشو تطيحين ماتطيحين بسم الله عليك وعلى لحمك وشحمك واللي معك ذا مهو مالي عينك ,, والا بعد رجعنا لسالفة الثقة شاهة : والله ياعمري يا اغلى من صوفي ولحمي ماقصدي كذا ذيبان : مسموحة بس يالله خلينا ننبسط شوي ونتمشى ,,, طلعت شاهة وعبرت الجبل وهي ترتجف ,, قطعوا الوادي المقابل وهي مذعورة ذيبان :اش فييييك خلاص شوي ونرجع مستعجلة على الزريبة اللي ريحتها تطير الكلاب شاهة : لا والله مهو قصة مستعجلة , بس لو يدرون الغنم يطلعون علي قوسيب واشاعات ولو يدرون اني اتمشى باخر الليل مع ذيب كان يجن جنونهم والا ينطحوني نطحة يقضون علي عشان الثار والعار اللي صاجينا فيه من يوم فتحت عيوني على الدنيا ذيبان : وهو ينظر الى القمر يالله ياشاهة تقولين ذا الكلام ,, أجل وش يقولون عني أخوياي لو يدرون ان اتمشى مع زينة البهم واتغزل فيها ولا افكر امسها ,,, والله كان يشككون بفصيلتي والذيابة ماعندهم لعب كان قطعوني ووزعوا لحمي عظة وعبرة لكل ذيب يعشق من فصيلتكم شاهة : خلاص تمشينا نبي نرجع لا تجيب سيرة اللحم الحين الله يخليك ذيبان : اسمعي ياشاهة , ترى انا ماني من النوع اللي ببالك حتى لو انك مليانة لحمان وشحمان هذا الشيء ابدا مايلفت نظري اللي يهمني حبك لي وقلبك اللي اصفى من حليبك وصدقيني انا ماني زي باقي اخوياي اطارد في الغنم واسيح دم ومهما تكون الشاة سمينة وجذابة احاو ل اغض نظري شاهة : اجل وشلون انت عايش ذيبان : انا مسوي دايت اصلا ماتشوفيني كيف نحفان شاهة : وشو الدايت ذيبان : يعني اكلي جدا خفيف واحاول ابتعد عن اللحوم قد ما اقدر واحاول اصير فيجيتيرين يعني نباتي شاهة : والله انك تكبر بعيني كل يوم دير بالك على صحتك ذيبان : والله انا مستعد اكل التبن اللي انتي تاكلينه بس ما اقرب ضلع منك ولا انتف شعرة من شعرك لا ياشاهة لاتقولين كذا عسى يومي قبل يومك ,, وطالما انا معك لحد يهمك يالله ان شاء الله اشوفك بكرة بنفس الموعد ,, الحين اخوياي فقدوني وفي لحظة عزفت فيها أغصان الأشجار بسمفونية رومنسية تبادل ذيبان وشاهة القبلات عادت شاهة للزريبة وهي تحمل في قلبها اجمل اللحظات مع ذيبان,, هنا تجد القمر انعكاسا لذيبان وترى في الماء الصافي عيون ذيبان لم تعد شاهة تكترث لأي من بني جنسها , , وغدت تعزف عن الزواج بأي منهم,, وفي ذات ليلة ,,, أتى ذيبان كعادته ليأخذ شاهة في نزهة جبلية ليقضيان أجمل اللحظان ويتجاذبان أعذب الحديث وأرقه وكان يحمل معه خمشة من العشب الأخضر المشكل,, شاهة : هلا ذيبان ذيبان : وش فيك تقولينها من غير نفس شاهة : ماتلاحظ ان وضعنا كذا غلط ذيبان : الا اكيد غلط ونص ,, مهو معقولة نعيش بقية حياتنا كذا وهذا اللي أنا جاي عشانه الليلة شاهة : طيب والحل لأن الخطاب كثروا والعين صارت علي ذيبان : سقطت منه خمشة كوكتيل الأعشاب وهو في ذهول ذيبان : الحل انا بغيت اقوله من اول يوم قابلتك فيه شاهة : اللي هو ؟ ذيبان : تهربين معي والله لأخليك أسعد شاة بالكون وأصير لك سند وعون شاهة : وين نروح ذيبان : نبعد عن ذا الديرة ,, ونستولي على جبل والا غار على قدنا

[قمر السلاطين]

استرسل ذيبان من ناحية المعيشة ,, انا مقتدر وأقدر أوفرلك الماء والتبن وأنتي جالسة وسبق وقلتلك أنا مستعد اكل التبن معك ,, بالأخير الحياة تنازلات شاهة : لا الله يخليك أنا أبي أشتغل قصدي أرعى بنفسي أبي أحقق ذاتي ذيبان : طيب على راحتك ,, أنا حيوان منفتح ولا أعارض هذا الشي بس قلت لو حبيتي على الأقل شغلك بالنهار مهو بالليل زي اللي مايتسمن شاهة : ماشاء الله ملاحظة ثقافتك عالية وعقلك كبير الله لا يرزاك ذيبان : تعرفين أنا ماخذ كورسات بـأكبر جامعة بالمنطقة على يد البروفيسور مكران ذيبان : عالعموم ألقاك بكرة زي ذا الحزة عشان نمشي ونودع ذا الديرة شاهة : الله يجعلني مارودها ولا عودها مرتن ثانية ذيبان : امين يارب في الليلة التالية : أتت اللحظة المنتظرة ,, لحظة هروب العاشقين ذيبان : يلا ياشاتي لميتي عفشك شاهة : وهي تغص بالدموع ,,عفش ايش ,, هي كلها كم صندقة أوقف عليها اذا جا المطر مابيها الله ماكثر الا بالصنادق في الخلا ذيبان : لا تدمع عيونك ,,, هذا القرار حنا اللي قررناه وحنا مقتعين شاهة : وهي تنشق وتنظر الى بقية القطيع ,, ودعتكم الله ,, الله يحماكم من كل مكروه ,, مع اني حاسة ان عقولكم ماتخارج وممكن تنتهون بأي لحظة ذيبان : يلا مشينا ,, قطع ذيبان وشاهة الطرق البعيدة وتوقفوا عند جبل في مكان جانبي شاهة : يلا نبي نرتاح هنا ذيبان : انا اتوقع محد ساكن فيه نبي نسكن فيه دخلت شاهة الغار في أسفل الجبل ودخل ذيبان جلست شاهة وهي منهكة ,,, ورأت ذيبان صامد شاهة : ارتاح اكسر عن نفسك شوي.. ذيبان : تتغير ملامح عينيه ,, ماني مرتاح لين اكل لحم شاهة : وهي ترتجف,, وش قصدك ,, انت بطلت دايت والا وشو؟ ذيبان : ايه بطلت دايت وصمت وابي افطر على لحم وشحم ذيبان : واللعاب يتساقط من فمه,, يعني لي ثلاث شهور ماكلت لحم ,, وودي بلحم الحين الحين شاهة : من وين اجيب لك لحم والله لو اني قاعدة على مجزرة ذيبان : ياسلااااام واللي قدامي مافيها لحم ,, مافيها شحم ,,شوفي وش سمنك ثلاث شهور وأنا أحشر في بطنك ,, شعير ,, تبن ,, برسيم صرت مسخرة للذيابة وأنا أشبع فيك شاهة : ياويل قلبي ويلاه ,,, عشقتك وبالأخير اهون عليك ,,, تكفى ياذيبان اتركني ذيبان : ومن وين اصرفها ذي تكفى ,, انتي بحث الماستر حقي لي ثلاث شهور وأنا أسوي في ذا البحث وماراح اخذ الدرجة لين أوزع لحمك وأخلي مكران يذوق منه. أكل ذيبان شاهة وحاز على درجة الماجستير في العلوم المكرية والتقنية الخداعية,, وهو الان يطمح للحصول على درجة الدكتوراة ,,,

[قمر السلاطين]

أهلا ,,,
أولا اشكر القائمين على ذا المسابقة وأولهم نورة العجمي
وعسى بس تعجبكم القصة لأن والله من زمان مكتوبة لها حول ثلاث شهور وتوها تطلع للنور <<<<<<<<متأثرة بالشعراء
شاءت الأقدار تكون بذا المسابقة مع اضافه بعض التعديلات والصور
طبعا المغزى من القصة واضح مايحتاج وانتم ماشاء الله نبيهين بالذات اصحاب الشعر قادرين على فك الشفرات الادبية والتحليل الدرامي ,,,

ودي ,,,

[زينب الحجي]

هههههههههههههههههههههه

الله يقلعـه ذآ الذيبآن
شكييت فيه يقطـع ابليسـه
آجل شآه المسيكينه صآرت الضحييه آهـئ / آخس عليك رجآل يآ ذيبآن
<~ تتآثر بقـووه

يعطيتس العآآفييه / موفقـه بالمسآبقه يآ بعدي

[سمـا خير]

شاهه & ذيبان
.
.
تدرين وأنا أقرأ الموضوع تذكرت هذولي المماليح ..
7
7
7
7
7
7
7
7
7

.
.
.
.
قمر السلاطين القصة فكرتها جديده جداً
.
.
ممتعه وأسلوبك ششي
.
.
الله يعطيك العافيه يارب

[تي إتش]

روووووعة القصة والمغزى اللي بين السطور وصل

الفكرة حلوة وأسلوب سردك للأحداث أبطل شي فعلا ( يامأمن الذيابة يامن التبن بالخلا )

زي ما قالت شاهه بس ليتها طبقت كلامها ولا أمنت لذيبان !! يا قلبي عليها بس !

فيه ناس في الحياة يخاطرون ويمشون بطريق هلاكهم برجولهم وبرضاهم ..

رسالتك وصلت لكل شاهـ وكل أنثى إنها ما تأمن للذيابة الحيوانية والبشرية

أبدعتي وفالك البيرق بكل قوة .. تحياااتي قموورة

[i b r a h e m]

هههههههههههههههههههههههههههههههههههههههههههههه
اول شي اهلين فيك ومنوره شعبيات يالزينه واهنيك بصراحة
حبكه ولا اروع بداية من الفكره مرورا بالصور التعبيريه
ونهاية الى ما انتهت عليه من غدرالذئاب

عافاك ربي وتسلم يدينك وبالتوفيق لك

[الجازي]

عجبتني الرمزية ياقمر السلاطين ..
فعلا الشباب يبدأون بالريق الحلو والكلام المعسول والهدايا لحد ما تحب البنت وتصير النسمة تهزها من الرومانسية الزايدة , يبدأ دور الإحساس بالآمان لهذا الشخص , مع العلم ان البعض باااااله طويل ممكن يصبر على البنت سنة المهم في النهاية تخاطر تشوفه في مكان منعزل عن الناس بعد مايكون شافها في اماكن عامة مثل مارمزتي لها في بداية قصة الحب الى حد مايطيح الفاس بالراس وساعتها ما ينفع الندم
اغضبت ربها وخسرت نفسها

[قمر السلاطين]

مشكورين عل المرور والتعليقات الحلوة . . ويستاهلون شعبيات للأسف السفر خذاني منكم بس راجعين بإذن الله