[عبدالعزيز الرقراق]

بسم الله الرحمن الرحيم

على أمل أن يغلب أفضلي على اسوأي . . ! وأن يرتقي ما بداخلي لسمو فكركم الكريم . .

أنا ! بكل حالاتي

[عبدالعزيز الرقراق]

على آمل ملفاك سامرت انا سهيل = وسهيل قال اليوم ما ظـن ياتـي
ملّت دلالي مااروحت فايح الهيـل = والجمر رمّد واشتعل وسط ذاتـي
يصلى خفوق ٍ اتعبه زايد الشيـل = من شد حمله ماقـوى للشكاتـي
واليوم زاد الحمل كيل على كيـل = يالله صبرنـي لحـزة وفـاتـي
قالت بي الدنيا ومن ليل في ليـل = وبكل ليلـه ودي الصبـح ياتـي
وانت السبب حديتنـي للغرابيـل = وان مت ما اظنك بتبكي رفاتـي

/

عبدالعزيز

[عبدالعزيز الرقراق]

تدري وش اللي ذبحني فيك يالعندل ؟ = لا منك اقفيت ولاادري وش هي اسبابك!!
فجأه بلا انذار سابق هاتفك مقفل!!! = تقبل بي الأرض وتقفي ويش هو صابك ؟
ويزيد همي وخفاقي فلا يغفل = ماغير ينبض يعد الوقت بغيابك
يامل قلبٍ من بعادك بدا يزمل = ضرب به البعد ضرب السيف لا صابك
ينزف وشفه لقاك وفيك يتأمل = ويمسي على بح صوتك ثم يصحى بك

/

عبدالعزيز

[عبدالعزيز الرقراق]

أفيق لا حاشاك ما ودي أفيق = ولا لي بحلمٍ/ ما تجيه وتمّره
أنت السعه لا من غشى حالي الضيق = وأنت الغرام اللي خفوقي مقّره
وأنت القصايد والمحبه طواريق = يا طي حالي بين جرّه وجرّه
لا هوّد الداجي ونام المخاليق = وقمت أتذكر حلو وقتي ومرّه
تطري علي يا موهق الغيد توهيق = ياللي معك ماحصلوا ثقل ذرّه

عبدالعزيز

[عبدالعزيز الرقراق]

الوصل طب لبعض القلوب لكن في حالات ٍ معيّنه يصبح كالداء



/

شتان بين الشوق والفقد شتان = نور القمر لا مايسد طلة الشمس
صرخت لي ولهان؟ قلت أنت ولهان!! = وين الوله اسبوع ماضي مع الأمس ؟
أقفيت عني دون سبه وتبيان = وعليك ماغير أضرب الخمس بالخمس
واليوم جيت يسوقك الشوق بجنان = من عبرة الأشواق صوتك غدى همس ؟
ياناعم العسلوج يا غصيّن البان = يا بو الخدود اللي تجّرّ ح من اللمس
ماني على كيفك تجي بعض الأحيان = وتقفي وتحمس بالوله خافقي حمس
اما تجي كلك ومن غير نقصان = والا أطمسك من صفحتي يالهوى طمس

عبدالعزيز

[عبدالعزيز الرقراق]

يا أكبر ذنوب { الحسن } في نظرة {التايب} = يا أعذب { خطا } ماقويت أندمه .. وأغواني
يا أول أيام عمرٍ في نظر ...شايب!! = يا أجمل غرامٍ كتبته ثم غنّاني

/

ماتدري !!!!!!!

ماتدري إن الفرح في غيبتك غايب ؟! = والحزن ضيفٍ غثيثٍ حلْ واوذاني !!!

[عبدالعزيز الرقراق]

الشريط اللي حوى مـاض السنيـن = واهمهـا اخـر ثــلاثٍ مجهـمـه
ضحكةٍ مـرّت علـى قلـبٍ حزيـن = واتساعـةْ عيـن سَهرتهـا سِمـه
وعبرةٍ تخنقـ/ ولـو مالـه يديـن = تكتـم الصـدر المغـربـل تكتِـمـه
(ياوجودي) (عزتالي) (مل عيـن) = ماتفيـد ومـا تنـار إبهـا اظلمـه
ولا ترد اللي غدت والوضـع بيـن = سيل {عين} ورجف {قلب} و( تمتمه)
جـادلٍ غنجـا لهـا القاسـي يليـن = ناعـسٍ دعجـا فديـت السلهـمـه
عنـدلٍ شقّـقْ لياليـهـا الجبـيـن = والخـدود الـورد الاحمـر تفحمـه
لا أقبلت تمشي تقل ظبـي البطيـن = وان ِقفـتْ تنثـر حِسـنْ وتلملمـه
ولا حكت غَرْقَـتْ بعيـن الناظريـن = مـن بلاغتـهـا ومـمـا تعلـمـه
مير وينك يـا حسيـن الـدل ويـن = مابرحـت ذكـراك فينـي واسـمـه
مِن كِثِرْ شوقـي وحِزنـي ياظنيـن = كل يـوم أمسـح خيالـك وارسمـه

/

عبدالعزيز

[عبدالعزيز الرقراق]

تبيح السدود وسدنا مازال = ماغير رب الكون يدري به
لو فاس همي كسّر الامال = وحظي محل الشك والريبه
ببقى على عهدي لو الاحوال = ساءت من مصيبه الى مصيبه
لولا الثقايل ما دعينا جمال = ولولا الصبر ما زادت الهيبه

/

عبدالعزيز

[عبدالعزيز الرقراق]

يازين عطره لا بـدا كالمراسيـل = ينبي بحضرة ناعـم العـود ليّـن
أشهق شذاه وأرفع الشبح وأخيـل = وجه القمر . . وأقول له إيه هيّن
أنت القمر ؟!! أبك أنت ديكور لليل = تبي القمر ؟! اصبر . . حبيبي يبيّن

[عبدالعزيز الرقراق]

عز الله ان طعناتكـم يالاجانيـب = على خفوقي كنها الشهد وأحلـى
هذي ضريبة طيب وحنا هل الطيب = ونفوسنا ماردها سهيـل وأعلـى
من خلقة الله لين ما شمسنا تغيب = عشاقة العليا ولا عندنـا اغلـى
مقامنا فـي عاليـات المراقيـب = يوم البشر تقسم لعليـا وسفلـى
انعز بامر الله ولا نعرف العيـب = بعيوننا طيب الذكـر دايـم أولـى
وبيض النوايا خلت همومنا شيب = من فضل من يرحم ويغفر ويبلى
لكّن طعنات الأهـل والاصاحيـب = نارٍ بوسط الجوف تصلى وتصلى
لو هو يدور الوقت ماله تطابيـب = ولا تنتهي بالصد لو قلـت ابجـلا
الى الممات جروح قلبي معاطيب = مابه سوى موتي يخليني اسلـى
دنيا دنيه واضحـه مابهـا ريـب = مره كثير و ينـدر ايـام تحلـى