[احمد العريفي]

المناسبه :
هذه القصيده هي تجسيد لحالة مظلوم لم يستطيع ديوان المظالم رفع الظلم عنه. حيث اعتذر الديوان عن نظر القضيه لعدم الاختصاص ولائيا.
ولم يستطيع هذا المظلوم ايصال مظلمته برقيا ولاشخصيا إلى ولي الامر
مما تسبب له باضرار نفسيه وماديه جسيمه.
وبعد اطلاعي على وثائق القضيه اقتنعت بعدالة قضيته وجسدتها بهذه القصيده التي آمل ان تنال استحسانكم:

يالله طـلـبـتـك والـمـدامع حـزيـنـه = يالله طـلـبـتـك وازرق الـدمع هـمـال

بي ضيـقـةٍ لو تـنـتـشـر في مدينـه = والله فلا يضحـك بها حتى الاطـفـال

مـسـكـين قـلبٍ فارقـتـه السـكـيـنـه = قـلـبٍ يقـطعه الآسى من غـثى البال

امـن الـقـهـر قـام يـتـزايـد ونـيـنـه = ينوح نوح اللي تعـلت عـلى الـجــال

يرجف من اللوعات رجف المكينه = تـلـوعـه الـدنـيا عـلى شـط الاهــوال

امـن اولٍ كـانـت جـروحـه دفـيـنـه = والـيـوم اصـبـح لـلـغـرابـيـل مـدهـال

باح العـزاء والـقـلـب بيح كـنـيـنـه = ولاعـاد باقي للـصـبر فـيه مـثـقــــال

يصيح باعلى الصوت يامن يعـيـنه = يامن يوصل شـيخـنا الـظـلم بالـحـال

قـولوا له ان الـظـلم اكـبر غـبـيـنـه = لجـا من اللي بالعـدل مضرب امـثـال

دسوا عـليه اهل الوجـيه الـلعـيـنـه = اهـل الوجـيه الكـاذبه قــول وافـعــال

حـطوا المظالم تحت اسمه رهـيـنه = وحطوا السيادي دونهم ستر وظــلال

وقاضي المظالم كـف عـنها يـديـنه = وقـال السـيـادي مالـنـا فـيه مـدخــال

اعـرض على اللي بالعـدل خابرينه = اللي مـضاريبه على الـظـلم تـنـهــال

شيخٍ على الفـزعات يضوي جـبينه = بس الوصل دونه رجـاجـيل واقـفـال

والشيخ ماهو شمس يشرق بعـيـنه = بالعـدل وصى وبعـضهم خان الامال

ياما على العـادل تطـوف الـرطـيـنه = وياما مع الـطـيـب يخـونون الانـذال

ماتـصـفـق الـيـمنى بـلـيـا عـويـنــه = ومايروي الظميان طرد اشهب اللال

اضرب بعـدلك تسـتـقـيـم السـفـيـنـه = اضـرب بعـدلك اسـودٍ كـنـه الـشــال

بالعـدل .. تصبح كل عجفا سـمـيـنـه = وبالظلم .. تجـنح كل خصبا للامحال

ياقـلـب لاتحـمل عـلـيـهـم ضـغـيـنـه = يكـفـيـكـهـم عـالم خـفـيات الاحـــوال

ياقلب تُـفـرج والـفـرج مـحـتـريـنـه = بامـر الـذي انـزل تـبـارك والانــفــال

احمد بن عبدالرحمن العريفي
(نديم المجره)

[احمد عوض]

صح لسانك يالعريفي

اجدت صياغة هذه الرسالة بصوره احترافية في غاية الجمال

شاعر متمكن

الله يجزاك الف خير

والله يفك عوق المظلوم

تحياتي يالعريفي

؛

[احمد العريفي]

إقتباس الرسالة الأصلية كتبت بواسطة احمد عوض صح لسانك يالعريفي اجدت صياغة هذه الرسالة بصوره احترافية في غاية الجمال شاعر متمكن الله يجزاك الف خير والله يفك عوق المظلوم تحياتي يالعريفي ؛

صح قلبك لاهنت اخوي احمد
اسعدني اطرائك
الله يسعدك
تحياتي

[فهد الغبين]

وهل هنا غير الله يطلب

لله درك


وكفى

[الدهمشي]

صح لسانك يا أحمد
من أروع القصائد التي شاهدتها

[احمد العريفي]

اخواني واخواتي الاعزاء
شرفني مروركم
واسعدني ثنائكم
دامت لكم المسرات
تحياتي