[صالح العبدالكريم]

من الأخير !؟ ان كان تغليني صحيح تكفى تكفى طالبك فكني من قول وشفي صوتك أو أسفل عيونك تنهّادة سواد أو نحف جسمك كل ما دبدبت زاد انا والله مو بلاي بنفسي إلاّ كل بلاي بأسألتك من صرت اسمعها فلا عيّنت خير ! يا شين صوتي منقطع وايديني للرحّل تصيح يا شين اشوف وجيههم قدّامي وما تبغى أطيح ! قاعد تبربر : الصقور صقور وأبرك لحملك تشيله وخلّك لحملك بعير وأعتبر ما طاف طاف وإن فالباقي كثير ! صدّعت في راسي عسى الله يصدّع براسك يعني بربك انا اوّل واحد تشوفه متضايق طب كل هالعالم تضايق يعني شسوي بنفسي اتحمّس وأطير !؟ بعلّمك حاجه من احزان الحقيقه إرم كل اللي سمعته بالمجالس واللي قريته بالكتب وأسمعني !؟ إن شفت لك شخص ٍ متعوّد يبلع همومه بصمت ويقلقه أحيان ريقه لاااا تسأله لاااا تسأله لاااا تسأله يمكن يغص بدمعه أكبر من كلامك الحزن يُبصر وإنت يا الفاهم ضرير !!

[صالح العبدالكريم]

مثلك انا يا حبيبي ساكت وهادي .................... والكل منّا يزوّد جرحه عناده مابي نتحاسب ونسأل منهو البادي .................... ونضيّق صدور بعض ونبعد زياده شفني ارد السلام وابتسم عادي ................ ...واقول لا ثار جرحك بالغلا هاده مقدر اشوفك حزين وجالس تنادي ................ وما اجيلك اركض واضمك ضمة العاده !! مش ح ردّك اسمعها على العود

[صالح العبدالكريم]

إهداء لك ِ أبنتي فقد تقرأيها هنا بعد عُمر التاريخ : 15 _ 3 _ 1429 هـ يا ( لاما ) والصغار اليا بدو يتحسسون الناس .......................... نبت بخدودهم حب الكلام وعفرتو بدري وانا اشوفك عطيتي الريح هيبه والخيول إحساس ......................... ما كن الأرض من تحتك بعيده وهاجسك يدري تلاغيك السماء قبل الغيوم وينطنخ لك راس ......................... وأشوف برفعة حجاجك عزيمة شمّر وقدري ألا يا بعد من لم الكلام الواجد بكرّاس ......................... وألا يا بعد من فت الضلوع المبطيه حدري تعالي إنزلي ودّي أضمّك والسنين يباس ......................... مثل ما الخيل تشتاقك وربي إشتاقلك صدري !!

[قِصّة]

.
.
ذكرتُ الله ثلاثاً وزدتها حتى أتممتها سبعاً

هذه الـ لاما كـ العمل الصالح يقترن ذكرها بذكر الله

[صالح العبدالكريم]

أعاد قدمها ذاتها القيّمه 4/2/2003

والله انّك بالغلا ما يشبهك إلا الرياض ................... كيف وانت اللّي سكنتك مثلها من خَـْلقتي من عرفتك ما عرفت لنيتي غير البياض ...................وانا من قبلك تـضيع بوسط جوفي نيتي كل عرق ٍ بي تشرّب من حنانك لين فاض ................... بالغلا،واصبحت اشوفك في ملامح دنيتي الله يحلك حبيبي لو تورّدني حياض ................... المنية , كـنّي آرد في روابي جـنـتي من ربى بالنار ما هو حاسب ٍ لادنى شواظ ................. ومن عطى للطيب عمره صار في ربعه فتي وانت يا اللي في خفوقي لك مخاليف و فياض .................... تدري انّي بحر عـشقٍ لو تغوص بغبتي مير مالي حظ يجدي بالعطا الا وناض ................... في سماي ايلين تمطـر من غليله دمعتي عن خطا الايام تكفى يا هوى بالي تغاض ................... دام ما للوصل درب الا مشت له خطوتي وان بغيت إلا تقاضى هذا انا يمّك تقاض ................ وشرهـتك باللّي يقول ارفق علي يا عزوتي سوّ ما يرضيك لكن ان لمحت القلب جاض .................... انتبه يمكن نسـيت انك تمالح نـخوتي المشاعر لو توصّــف حالهـا للبعد هـاض ..................... لكن الايام عـزّت عـن عـذابك عـزتي من كثر ماني احبك قمت اسولف للرياض ..................... عنك من اول عـيونك لين آخر غـربتي !!

[صالح العبدالكريم]

مو كل ضيقه لازم انّه تكون من : موقف وناس ..................... الأغلب تمرّك كذا .. من دون حاجه حاصله ! والليله .. أكثر ليله سوء اخلاقها جت بالمقاس ..................... أحاول اتبسّم .. ونفسي براس خشمي واصله ! ما رحت افكّر بالحياة وما حوت .. لنـّه طفاس ..................... والشخص منّا لا بغاله شي .. يقدر ياصله ! بس البلا لا صار ضيقك واطي .. متبلّد حواس ................... لا دك صدرك .. ما عطالك فرصه حتى تفاصله !!

[صالح العبدالكريم]

ما سألتك : ليه عنّي ما سألت ؟! .......... خايف أنّي / أحرجك و" أقتل " سؤالي " رغم هذا تصدّق أني ( ما زعلت ) ! ............ ما أبي ينقص غلاك وإنت - غالي !!

[صالح العبدالكريم]

حبيبي آسف توّي أصحى من النوم ................. غصب ٍ علي موعد لقانا تكنسل تدري من أسبوع وأنا أنطر اليوم ................. أثر الوعد من بين الأهداب ينسل

[صالح العبدالكريم]

صدّقني ماني جالس اكتب عشانك .................... بكل بساطه جالس اكتب عشاني ! إن كنت ناوي صدق تكسب رهانك ..................... وتشدّني لك لين تقلب كياني خلّك طبيعي .. لا تعلّي مكانك ..................... واحسب حسابك : لو زهتك الأماني إن العمر لو جدت له بأمتنانك ..................... مصيره يمسح فيك ظهر الثواني لا تنتقص قدر القريب بزمانك ..................... أو تـاكل بلحم البعيد بزماني والله لو انّي اموت موت بثمانك ...................... وأحس شوقي لو تغيب يغشاني اهون علي انّك تسكّر اذانك ...................... ولا انّي اسمع حكي يربط لساني واليا قسيت وعامل الوقت خانك ...................... ونويت ترجع صاحبي الأولاني ماني من اللي لا تزيعل اهانك ....................... صدري وسيع ولو بشيل يعصاني خلني أعيش بحب يعكس حنانك ....................... وأبشر بـ كلّي ماهو بس بحناني كانك تبي تقدير حبّك وشانك ....................... أحرص على تقدير حبّي وشاني !

[صالح العبدالكريم]

( كانت مشاكسه لأحد أصدقائي ) أجل كل التُهم دايم تلزّق فيك بأسبابي ................ تصدّق ما حسبت الشعر يخلّي كاتبه شبهه ! انا كنت انفخ بصدر الكلام ارواح لأحبابي ................ ولكن صعبه تفهمني مدامي اعرفك سبهه !

[صالح العبدالكريم]

سلّمت عمرك للملام وأنت مو راعي صبر .............. لا ترجع تفرّك يديك وتشتكي كثر الملام النور واضح وأنت ما طقّيت يا الغالي خبر ........... وإلاّ أجل فيه شخص عاقل مثلك يخاوي الظلام يا صاحبي والناس ماهي ناس والدنيا عبر ............. صدّقني كلاً راح يقطّع جلدك بسوط الكلام خذها نصيحه : همّك اليا ابطى بتفكيرك كبر ............ بس لا أعتبرته رغم كبره تافه تعيش بسلام !!

[صالح العبدالكريم]

يقول جدّه وأحس عيوني احمرّت ................. ويعيد جدّه وأحس النار بعظامي ما يدري ان الحياة بكبرها مرّت ................ من قبل اسولف عليه ويسمع الآمي !

[صالح العبدالكريم]

يقولون الحقه دامه يحبّك والهوى ذبّاح ................. وانا اقول المدى غمّض عيونه والمفارق زين صحيح اللي يقول الطفل لا يقرب يديه سلاح ................... مهو من نيّته لكن غشيم وطلقته بالعين أجل قلبي فتحته له ، يبيني اسلّمه المفتاح .................. عشان ان طقّت براسه قفله وأختفى بعدين وأنا ما عاد في صدري مكان ٍ ما لحقه جراح ..................... ولا ربي فرقني عن بقـيّة خلقه بقلبين !!

[صالح العبدالكريم]

يعني مضت كل هالسنين بعمري ما كنّه مضت .................... وما كنّي يا ربي بيدّي دافن ٍ أوجع قبور يا كثر ما رحت آتحرى أشياء نكهتها قضت .................. وأحاول أخلق للحنين أجساد وأعمار وشعور أحيان أحس أن الليالي لا انفقد غالي فضت .................... وأحيان ما ودّي أحس بشي يملاني كسور !!

[صالح العبدالكريم]

أحبّك .. وأكثرك يدري ........... وأحس قليّـلك يعميك أخاف أشق لك صدري ........... وتتوثـّم ضلوعي فيك مهو هالحين ، من بدري ............ وأنا والله العظيم أبيك