28-03-2011, 20:12 | #1 |
شـاعر
|
ألفيّة : المعنى / المنّاعي ( مصافحة أولى )
السلام عليكم ورحمة الله وبركاته صباحكم / مساكم خير هذه أوّل مشاركة لي بمنتداكم الراقي شعبيات وأتمنى أن تقبلوني أخاً وزميلاً بينكم رابط الاستماع للقصيدة http://www.alsh3r.com/voice.8148.html ألـفيـّّة ( المعنّى / المنّاعي) . . أَلفٍ .. أَوَلّف ما وِلَفْ بَهْ مِعَنّّى .. مَسْكِين ما عمره بوِلْفِهْ تهنّى يعزف من اجروحه لحونٍ تغنّى .. والناس تِطْرَبْ واهْوَ لا حيّ لا ميت . البا .. بليت ابربع محدٍ بيصفي .. والحقد خلف اصدورهم حيل مخفي وقت الرخى تلفي وبالعسر تقفي .. وانا عزيز القوم ما يوم ذلّيت . التا .. تربّع في صَحَرْ خافِقِي اطْعون .. دام البشر صارت كما ابليس ملعون زيّن شروره خلّى لِشْيوخ يزنون .. ياليت يرجع سالف الدين يا ليت ! . الثا .. ثملت ابدون خمرٍ ومنكر ! .. بعض البشر من زود عشقه بتسكر ! دامه لذيذٍ مثل دوعن وسكّر .. لا تْلُمْنني لي من ذكرته و ( فهّيت ) !! . الجيم .. جازيته على العيب بالطيب .. لنّي ولد قومٍ بالأخلاق بتصيب ( منّاعي ) ومنّاع للشر والعيب .. واذا انطرى أخوالي ( البوعينين ) هلّيت . الحاء .. حاورني وانا في منامي .. صحيح إنك ميّتٍ في غرامي ؟ أنصت لما اقوله وإفهم كلامي .. ما غير بالأحلام بتشوفني جيت . الخاء .. خاواني الحزن بالليالي .. أصد عنّه بس اهو ما يبالي أبعد ويلحقني بتالي وتالي .. واقول تكفى روح أنا شاللي سوّيت . الدال .. دلّوني على راي يا اخوان .. فر الفكر منّي وظلّيت حيران من حين جازاني بالاحسان نكران .. وش حيلتي لو صحت عقبه وناديت ؟! . الذال .. ذوّب خافقي في غرامه .. من يوم طاف الريم وارخى لثامه مابي سوى لي مر يبدي سلامه .. ويبرد خفوقٍ ذوّبتْه التناهيت . الراء .. راواني نجوم الظهاري .. أضربت عن غيره ولو هو اضطراري أصدر علي حكمه وللحين ساري .. مؤبّد أفكر فيه وابعشقه أشقيت . الزاي .. زاد اجفاه عنّي شويّه .. يبي يعرف اشيمكن ايصير فيّه وانا احترق كل يوم مقدار ميّه .. بس ما أبيّن غير شدّة عفاريت . السين .. سبحان الذي غيّر الحال .. واتبدّلت ذيك المحبّه بالأجفال ما عوضنّي فيه عمٍّ ولا خال .. حتى القصور اليوم صارت توابيت . الشين .. شان الوقت من يوم أقفى .. واعطيه وايرِد ابسكاكين عقفى شمع المحبه دون الوصال يطفى .. حتّى لو آصف الحطب واسكب الزيت ! . الصاد .. صفّدني كأني معادي ! .. باغلال غطّت أخمصي لي فؤادي !! بين البشر كنّي بسجن انفرادي .. هل من معين ؟ .. آنا بصدى الصوت رديت . الضاد .. ضيقة ليل ما فارقتني .. اتهبّ صلفه حيل وامتعّبتني كلّه من اطيوفه بفكري اسكنتني .. وانا انفجرت وجيت بالشعر ونّيت . الطّا .. طعنّي في جفاه ابنشاشيب .. وما اظنّتي هالحال من بعده ايطيب وما اظنّتي بتفيد فيني التطابيب .. لو شاب راسي منْه وِبْعمري أفنيت . الظاء .. ظرف الوقت وإلا الأماكن .. لا ما آتغيّر تبقى بالقلب ساكن وما ابي بديلك يا منى الروح لكن .. اسقيني شوفك ياللي عالحور غطّيت . العين .. عيّا القلب أحدٍ بداله .. والعين عافت تنظر إلا جماله وانا كظيمٍ بالحزن فيه داله .. ياليت يدري وشكثر منْه عانيت . الغين .. غايات الطرب خاصمنّي .. عقب ما كنت أضحك معاه وأغنّي واليوم ، وين الضحك والأنس عنّي ؟ .. ما كن سمرت ليال قربه وغنّيت . الفاء .. فر القلب صوبه ولا عاد .. والعين هلّت دمع والقلب رعّاد مدري بأيّة أرض أو بايّة بلاد .. بس بدعي ربّي يحفظك وين ما اوطيت . القاف .. قلت أسأل مجرّب بحالي .. أجلس مع الأصحاب كنّي لحالي هو فيه شي عقبه بدنياي حالي !؟ .. قال : الصبر وادعي اذا طفت بالبيت . الكاف .. كل ما عمت في بحر الأفكار .. وَارجع لذكرانا واهل دمعي مدرار يغزر علي الموج وآغرْق أمرار ..وين انت ياللي كل ما ادعيك لبيت ؟ . اللام .. لين الحين وآنا أعاني .. لانّ الذي بين المحاني محاني ! لو بشرح ابشعري أببني مباني .. مليت من هالحال .. يا ناس .. مليت . الميم .. مرمرني كثر ما غمرني .. بالفرحه و وسع الفضا هو وحشني وروّح بعيدٍ كن ما قط قربني .. قولوله : فالتقصير كفّيت وفّيت ! . النون .. نارٍ فالحشا تستعرّا .. يشبّها زيت الفراق وتورّا الحال بعده ما رضى يستقرّا .. وابجيش هجره فتّت القلب تفتيت . الهاء .. هانت عشرة اسنين ويّاه .. خلاّ جروحي تنطق اشفاتها الـ ( آه ) آهٍٍ على هالحال .. آهٍ ووسفاه .. لو بس يحس ابْربع مافيه حسّيت ! . الواو .. ( وينك ؟ ) قالها قبلي اكثير .. من طاعنٍ فالعشق أو طفلٍ اصغير بس مدري ليش آحسّ صوتي بها ( غير ) !! .. ( وينك ؟ ) ( و ما وِحْشَتْك عيني وحنّيت ؟ ) . الياء .. يا نفسي تعيشي بدونه ؟ .. وإلا يهون الظيم داخل سجونه !؟ بفراش موتك هو يزيد ابطعونه ! .. قالت : في كلتا الحالتين انته الميت !!. وسلامتكم أخوكم / محمد راشد المنّاعي |
29-03-2011, 03:12 | #2 |
شـــاعر
|
رد : ألفيّة : المعنى / المنّاعي ( مصافحة أولى )
الله يصبحك بالخير يا أبو راشد شكلي أبحبّك من حبي لخوالك فيك منهم كثير ما شاء الله يا محمّد من ثالث مشاركة ألفية شاعرية متدفقة وحضور ملفت وجميل من شاعرٍ " يعزف جروحٍ تغنّى " لكنّي رأيت حرف الباء ابتعد قليلاً عن معنى باقي الحروف سعدّت جدّاً بتواجدي في متصفحك يا محمّد |
30-03-2011, 07:08 | #3 |
عضو شعبيات
|
رد : ألفيّة : المعنى / المنّاعي ( مصافحة أولى )
صح لسانك مدد بلا عدد الفيه في قمة الروعه كتبت المعنى بصدق واجدت الصورة واتنقنت المسحوب المروبع لك فائق احترامي وتقديري اخوك كان يتنفس في هذا النص.. |
05-04-2011, 19:31 | #4 | |
شـاعر
|
رد : ألفيّة : المعنى / المنّاعي ( مصافحة أولى )
إقتباس:
الله يمسك بالنور والسرور اخوي ثامر هههههههه ، حبتك العافيه وانت بعد تنحب يا ثامر تسلم والله ، ومن ذوقك وشهدتك أعتز وأتشرّف فيها وأحترم وجهة نظرك وأنا سعدت وتشرّفت بتواجدك بمتصفّحي يا ثامر تحياتي وتقديري أخوك / محمد المناعي |
|
07-04-2011, 01:48 | #5 |
عطر الروح
|
رد : ألفيّة : المعنى / المنّاعي ( مصافحة أولى )
النون .. نارٍ فالحشا تستعرّا .. يشبّها زيت الفراق وتورّا الحال بعده ما رضى يستقرّا .. وابجيش هجره فتّت القلب تفتيت .................... أعجبني حرف النون استمتعت بقراءة الفيتك لا فض فوك |
17-05-2011, 17:17 | #6 | |
شـاعر
|
رد : ألفيّة : المعنى / المنّاعي ( مصافحة أولى )
إقتباس:
خالد القبيسي صح الله بدنك مدد بلا عدد وتسلم يا الغالي ومن ذوقك شهادتك وسام على صدري وأحمد الله أنه نال رضاك تحياتي أخوك / محمد المناعي |
|
28-05-2011, 18:24 | #7 | |
شـاعر
|
رد : ألفيّة : المعنى / المنّاعي ( مصافحة أولى )
إقتباس:
شكرا لمرورك الجميل أختي تحياتي |
|
29-05-2011, 08:41 | #8 |
شــاعر
|
رد : ألفيّة : المعنى / المنّاعي ( مصافحة أولى )
صح لسانك يالمناعي وهلا وغلا بك معنا شاعر مميز والفيه رائعه القاف .. قلت أسأل مجرّب بحالي .. أجلس مع الأصحاب كنّي لحالي هو فيه شي عقبه بدنياي حالي !؟ .. قال : الصبر وادعي اذا طفت بالبيت جميل هذا الحضور يا محمد |
08-06-2011, 17:30 | #9 | |
شـاعر
|
رد : ألفيّة : المعنى / المنّاعي ( مصافحة أولى )
إقتباس:
سالم بن جلعان صح الله بدنك يا بن جلعان والمهلي باقي وتسلم ومن ذوقك وأشكر لك مرورك الجميل تحياتي أخوك / محمد المناعي |
|
08-06-2011, 21:20 | #10 |
شـــاعرة
|
رد : ألفيّة : المعنى / المنّاعي ( مصافحة أولى )
ياسلاااام شي يشرح الصدر والخاطر شعر وحضور رائع وتعامل راقي مع الردود كما نتمنى من الجميع شكرا لرقيك شكرك لحضورك المتميز شكرا لتألق شعرك شعبيات تسعد بكل جديد لك |
09-06-2011, 06:16 | #11 |
شــاعر
|
رد : ألفيّة : المعنى / المنّاعي ( مصافحة أولى )
محمد راشد المناعي اهلا بك وبما اتيت به من الاف الى الياء جرح ونزف ,, بلا ضماد ,,, حتى حصحص الموت في قولك : الياء .. يا نفسي تعيشي بدونه ؟ .. وإلا يهون الظيم داخل سجونه !؟ بفراش موتك هو يزيد ابطعونه ! .. قالت : في كلتا الحالتين انته الميت !!. مبدع يا اخي وشهادتي مجروحه تقبل مروري |
10-06-2011, 22:36 | #12 |
شاعر
|
رد : ألفيّة : المعنى / المنّاعي ( مصافحة أولى )
الله الله يامحمد مصافحه اولى تستحق الوقوف امامها بكل اعجاب شاعر متمكن بكل ماتحمله الكلمه تحيتي لك حاره وصح لسانك |
02-07-2011, 18:15 | #13 | |
شـاعر
|
رد : ألفيّة : المعنى / المنّاعي ( مصافحة أولى )
إقتباس:
والشكر لك ولحضورك الجميل وشهادتك وسام على صدري تحياتي محمد المناعي |
|
03-07-2011, 00:55 | #14 |
شـــاعــر
|
رد : ألفيّة : المعنى / المنّاعي ( مصافحة أولى )
صح لسانك ياغالي دمت بخير |
08-07-2011, 06:54 | #15 | |
شـاعر
|
رد : ألفيّة : المعنى / المنّاعي ( مصافحة أولى )
إقتباس:
غارم العمري المهلي باقي يا الغالي ، وتسلم لي ومن ذوقك وشهادتك على عيني وراسي تحياتي وتقديري أخوك / محمد المناعي |
|
علامات |
ألفية المناعي, محمد راشد المناعي |
عدد المتواجدون في هذا الموضوع » 1 , عدد الأعضاء » 0 , عدد الزوار » 1 | |
|
|
|