02-09-2003, 20:31
|
#1 |
|
أطــلال
|
قصة واقعية " الجزء 4 + الجزء الاخير " مع بعض
مراحب .. كيف حال الجميع ؟؟ اليوم بانزل الجزءين الاخيرين من القصة الواقعية مع اني ماني شايفة تفاعل ..... بس اتوقع هالجزءين هم الاهم واللي بتتفاعلون معهم اكثر  وقبل ما اعرض البقية من القصة هذي روابط الاجزاء السابقة : الجزء الاول : http://www.sh3byat.com/vb//showthre...=&threadid=5805 وهنا الجزء الثاني : http://www.sh3byat.com/vb//showthre...=&threadid=5881 وهنا الجزء الثالث : http://www.sh3byat.com/vb/showthread...&threadid=5953 وهذا الحزء الرابع : بعدين واصل صديقي ( ابراهيم ) في سوالفة وتغيرت نبرة صوته .. وسب اول يوم دخل فيه للمركز . بعدين قال . جاء المدرب واخذ الاسماء ورتبها وحاول يتعرف اكثر على المجموعة .. ويشرح المادة اللي بيدرسها ومدى استفادتنا منها بعدين .. واهميتها بالنسبة للتخصص . واستمرت الدراسة لمدة كم شهر وانهينا فيها بعض الفصول .. وطول هالفترة طبعا صرت اعرف زين للديرة . وصار لي معارف كثير منهم عرب وسعوديين واجانب .. وطبعا الكثير من بنات الليل . او القيرل فرند . على قولتهم . .... لين طحت في وحدة واستمرت معي كم شهر . وانتقلت من بيت اهلها وجت وسكنت عندي . وبديت اطنش الدراسة شوي شوي . وكثرت عندي الانذارات من الادارة .. وانا ما لقيت لها بال . لين جاء يوم من الايام ودخل علينا في الفصل واحد من الادارة وقال . ممكن يا ابراهيم تروح للمدير شوي .. رديت عليه وقلت الحين والا بعد ما ينتهي الدرس . قال الحين . لانه سأل عنك امس ولا كنت موجود . بعدين قمت بتثاقل ورحت وكان قلبي حاسني ان هالمرة فيها شيء اكبر من الانذار . يوم دخلت عليه قال . بصراحة الملحقية التعليمية الغت ابتعاثك . والان انت موقوف من الدراسة . وتعال بكرة وخذ تذكرتك وارجع للسعودية .. ( بصراحة بيني وبينك ) يقول ابراهيم . مثل اللي مصدق وغير مصدق انها توصل هالمرحلة . قعدت اترجاه شوي انه يعطيني فرصة وممكن اعيد الفصل الاخير ويجربني لمدة شهر واحد بس . لكن ما فيه فايده . ولعنت ابو الدراسة كلها والابتعاث واوروبا والبنات والمراقص . وصارت الدنيا في وجهي مثل خرم الابرة . المهم . رحت لسيارتي ورجعت للبيت . وقعدت افكر في اللي صاير . وكيف اواجه اهلي بالموضوع . وكيف اواجه المجتمع كله بالموضوع .. بصراحة ( ياشينها شيناه ) لاني كنت محتار وما فيه احد ممكن يفيدني بشي .. بعدين قعدت احوس بالشقة واقلب المواضيع والاعذار من كل جهة لكن ما فيه فايدة . وبعد العصر يوم توقعت العيال طلعوا من المركز اتصلت على عبدالله . وقلت له الموضوع كيت وكيت . انا عارف ما في يده شي يسويه لكن كنت محتاج لاي واحد يعطيني راي او نصيحة . .. والقيرل فرند يوم جت من بيت امها وعلمتها ردت علي وقالت والحين وش بتسوي . قلت ما ادري . وبصراحة ما عندي استعداد ارجع للسعودية واواجه اهلي بالموضوع . ساعتها معد تناقشنا لانها عارفة ان النقاش في هالوقت ما له فايدة .. ويوم جاء الليل رحنا كالعادة وتسكعنا في الاسواق وتنقلنا بين هالبارات والمراقص لين اخر الليل ورجعنا .. كان عبدالله معي . وتناقشنا بالموضوع بدون نتيجة . هو يحاول يقنعني بالعودة اسرع وقت ممكن للسعودية . وانا اقول ما اقدر . ويوم جاء من بكرة قعدت انا والبنت وسألتها وقلت . لو بغيت اعيش في بلدكم . وش المطلوب مني . قال مدري . لكن ممكن اروح واسأل في الدوائر الحكومية واشوف المطلوب . وبعد كم يوم عرفت انه ما تقدر تعيش في هالبلد الا لين تتزوج وحدة منهم او احد يكفلك .. بشرط السفارة تجدد فيزتك كل ما انتهت . قلت زين . بالنسبة للفيزة انا عندي الان لمدة سنة كاملة . وما عندي مشكلة . بس كيف احصل على عمل واقدر ادبر مصاريفي . قالت ممنوع تشتغل الا اذا تزوجت منهم . بس كانت فكرة الزواج اخر شي افكر فيه . واستمرت الحياة وبعد شهر تقريبا قررت ارجع للسعودية واشوف الوضع فيها كيف . ويوم جيت راجعت العمل هنا وقالوا وينك كل هالمدة .. قلت والله كان عندي شوي ظروف هناك ولازم اخلصها . قالوا على العموم الان طوينا قيدك . ورح دور لك على جهة ثانية اشتغل فيها . لانه بدون الدورة في اوروبا مستحيل تقدر تشتغل عندنا . قعدت ادور وظيفة وطبعا اتصالاتي ما انقطعت مع الحبايب هناك . وزاد الشوق شوي لهم بعد اسبوعين من الانقطاع . والغريب ما فيه احد من اخواني او اقاربي حاول يفتح معي الموضوع لانهم خايفين يحرجوني . بس تصدق . يليتهم فتحوا معي الموضوع وهزئوني وقالوا كل اللي في خواطرهم . لاني فعلا كنت استاهل . وبعد مرور ثلاثة اسابيع كذبت عليهم وقلت اني لقيت وظيفة في المنطقة الشمالية . ولازم اروح اباشر هناك . وانا كان كل قصدي اني اسافر اوروبا ثانية . وحجزت بالطيارة وقبل السفر بيوم واحد بس . اكتشفوا الحقيقة . والموقف اللي اصعب من كذا انه اخوي الكبير هو اللي واجهني بها . وقال ليش كذبت وقلت انك رايح للشمال . قلت بصراحة انا عندي بعض الامور لازم اخلصها هناك باوروبا ومحتاج مدة عشرة ايام وراجع . قال ليش ما قلت كذا وصرت صريح معنا ومع الوالدة .. لانه لا سمح الله لو عرفت بعدين يمكن يصير لها شي وتكون انت السبب . بصراحة بكيت شوي . وقلت له اهم شي ما تدري الوالدة . لانها بتكون محضرة الف سؤال وسؤال .. وانا ما عندي اجابات لها . المهم خلصت الكلام معه بدون نتيجة . وسافرت . ويليت الطيارة طاحت . ولا اقدمت على هالشيء . لاني رحت وضعت فعلا . اول شي لقيته ان الحبيبة اللي كانت من اهم الاسباب لرجعتي ومن الاسباب لفشلي بالدورة . لقيتها في حضن واحد من زملائي . وكان الموقف صعب بالمرة . لكن صبرت وتألمت كثيييييير . وقلت لازم اعيش في هالبلد ولو كلفني حياتي .. طبعا راجع من السعودية ومعي تحويشة العمر على قولتهم . واستمريت بالسكن نفسه واغلب العيال يتساءلون ليش رجعت ؟؟ وكانت الاجابة واحدة . مهوب شغلك . لكن عبدالله الله يذكره بالخير جاء يوم عندي بالبيت وقعدنا نتناقش بالموضوع وانا احاول اني اتهرب منه لكن ما قدرت . وقلت بصراحة انا قررت اعيش هنا ويمكن اتزوج اوروبية . زعل علي طبعا وتخانقنا وترادينا بالكلام . وقال والله لا اسبب لك كل يوم مشكلة هنا لين يطردونك من البلد . وبصراحة زعلت عليه وطردته من بيتي . ورفض يطلع الا اننا نكون متخانقين وتجي الشرطة ويعلمهم بنواياي . بعدين طلعت انا من البيت ورحت امشي بالشوارع واتنقل من بار لبار . لين اخر الليل ورجعت بيتي ولقيته قاعد ما راح . تصور . قاعد ينتظرني يبي يتطمن علي . ساعتها بس عرفت انه من الاصدقاء الحقيقيين . اللي ينوزنون بالذهب . وفتحت معه الموضوع مرة ثانية وعطاني من الكلام اللي يوجع القلب بصراحة . وذكرني بالوالدة والاقارب والمعيشة بالسعودية . وكلام كثييييير ما اذكره الحين .. وبعدين قال للاسف اللي انت رجعت عشانها اكيد شفتها مع فلان .. بعدين بكيت لين قلت بس . وعرفت اني اقدمت على شيء اكبر من توقعاتي بصراحة .. لكن اخذتني العزة بالاثم . وما تراجعت عن قراري في البقاء باوروبا . وتعرفت على وحدة جديدة واستمريت معها مدة وجاء موعد سفر العيال والعودة لارض الوطن وكل واحد شهادته في يدة . ومبسووووط . لانه قرب يشوف اهله وربعه اللي ينتظرون رجعته بفارغ الصبر .. وانا كنت اتقطع من الغيرة واتمنى اني ما جيت لهالبلد . ولا عرفتها . واستمريت هناك وانقطعت عن اهلي فترة طوييييلة وتزوجت من وحدة وعشت معها واشتغلت . وكنت احاول اني احسس نفسي اني مبسوط . لكن للاسف اذا قعدت مع نفسي وسألتها عرفت اني متوهق . وكل ما جت زوجتي وشافت الدموع في عيوني عرفت ان السبب الغربة الطويلة . حاولت تغير الموضوع وتتكلم في أي حاجة ثانية عشان تسليني . لكن بعد كم يوم يرجع الحال . وبعد كم شهر .. قررت اجي للسعودية واقول لاهلي على كل حاجة . يمكن يخف الالم اللي فيني وتتضح لهم حاجات يمكن ما يعرفونها . وبعد رجعتي بالاجازة . ضمتني الوالدة وهي تبكي واخواتي كلهم يبكون وابوي الله يرحمة كان يسألني عن المدام وهو يتقطع من جوا . بعدها عرفت اني مذنب وغلطان لاني قطعت فيهم وكذبت عليهم . وفي هاذيك الايام حصلت احداث الخليج وتم غزو الكويت . وانشغلت زوجتي علي . وخفت انه يصير شي ولعد اقدر ارجع لاوروبا . وقررت السفر باسرع وقت . مع انه من المفروض ان الوطن كان بامس الحاجة للرجال لتطوعهم في الدفاع عنه . وبعد ما رجعت هناك صرت اتابع الاحداث بالتلفزيون . وكان الموضوع عندي عادي بالمرة . ما ادري ليش ؟؟ هل انعدمت الوطنية عندي ؟ او احسس نفسي اني انتمي لبلد اخر . كل هالسؤالين ما لقيت لهم اجابات . وبعد كم شهر طلع مشاكل مع المدام . وطلقتها . واستمريت عايش لحالي . وانقطعت عن اهلي مرة ثانية . وتركت الشغل وتدهورت اوضاعي المادية وصرت اشتغل باليومية . او اعمال مقطوعة . عشان اقدر اوفر ايجار البيت ومصاريف السيارة . تصدق بعض الايام كنت اصحى الصبح ما في جيبي الا خمسة ...... بس وكنت محتار . اشتري بها همبرقر والا باكيت دخان والا اشرب كاس بيرة . واذا رحت للعمل عطوني الاجرة اخر الدوام . وكنت اشتغل في توصيل الطلبات للمنازل ( مطعم بيتزا ) وحبيت هالشغلة عشان اقدر القى شي اكله طول اليوم . وبعد نهاية الدوام اروح اتسكع واطير باقي الفلوس .. واستمريت على هالحالة خمسة اشهر . ولا كلمت اهلي فيها او حاولت اتصل بهم .. وفي يوم من الايام جيت البيت ولقيت رسالة مسجلة بالبريد . من السفارة السعودية هناك . تقول .. الاخ / ابراهيم . الرجاء الاتصال باهلك في السعودية لان والدتك تمر بظروف صحية سيئة .. بعدها قعدت ابكي وابكي مثل اللي توه مصحى من النوم . وصارت اوروبا عندي بكل اللي فيها ما تسوى بيزة . وطلعت من بكرة ورحت للمدير في العمل وقلت له عن اللي صار . واخذت منه فلوس عشان اتصل . وكلمت وردت على الوالدة .. والله والله قعدت ربع ساعة معها على الخط ما قلنا الا كلمة ( الو ) فقط والباقي كله نبكي انا من هناك وهي من السعودية .. ما هي مصدقة انني عايش . او مصدقة انها بتسمع صوتي قبل تموت . وبعد هالفترة بدينا بالكلام وسألتني عن احوالي . وعاتبتني شوي . لكن سبحان الله كانت تعاتبني بكل رحمة وشغف انها تشوفني ولو مرة وحدة بس قبل تموت .. كنت انا احاول اتكلم واذا سمعتها تبكي . انعقد لساني ومعد قدرت اقول شي . ويومها قررت اني اترك كل حاجة وارجع .... أرجع للسعودية واشوف امي قبل تموت . واحقق لها هالامنية اللي يمكن تكون الاخيرة بحياتها .. اعذروني معد أقدر اكتب على الكيبورد الحين من الدموع .. |
|
|
|
02-09-2003, 20:32
|
#2 |
|
أطــلال
|
وهذا الجزء الخامس والاخير : بعد ما شفت ابراهيم وعيونه مليانه دموع . قلت له خلاص ما فيه داعي تكمل اذا هالشي بينكد عليك .. رد علي وقال لا عادي .. انا حبيت اقول لك كل قصة حياتي . عشان تكون اول واحد يعتبر منها .. ( بعدين كمل القصة وقال ) رحت لمكتب سفر وسياحة وسألتهم عن حجز للرياض . وقالوا فيه يوم الاحد . ووافقت وسويت الحجز . ورجعت العمل وقلت لهم خلاص انا راجع للسعودية . الكل بصراحة تفاجأ من هالقرار السريع والغريب . وبديت افكر في المواجهه . لان السفر بعد يومين بس . وفي الليل رجعت لبيتي وبديت اجمع في ملابسي واغراضي ولقيتها واجد بصراحة . وقررت اخذ معي شنطة وحدة بس فيها الملابس اللازمة . والباقي خليته هناك . ويوم جاء الصباح قابلت راعي البيت وقلت له اني لازم ارجع للسعودية يوم الاحد .. وبالنسبة للشقة عطيته ايجار شهر واحد مقدم . وقلت اذا ابقدر ارجع بيكون خلال هذا الشهر بس . وان كملت ثلاثة اسابيع ما اتصلت عليك . من حقك تأجر الشقة لغيري . وتركت جميع العفش والاثاث فيها . وقلت له لك حرية التصرف في كل حاجة ابتركها .. وفعلا طلعت من البيت وودعتهم وركبت سيارتي ومريت على العمل واعطيتها المدير وقلت له اذا ما رجعت خلال شهر بع السيارة او انقلها لاسمك . وفي نفس اليوم ركبت القطار للمطار ورتبت اموري وطلعت الطيارة . يوم وصلت للرياض لقيت كل اخواني في المطار . وسلمت عليهم ورحنا للبيت ولقيت امي الله يخليها واقفة عند الباب تنتظر الغايب يعود .. طبعا كان الموقف مرة محزن ومفرح في نفس الوقت . كانت ممهيب مصدقة انها شافتني مرة ثانية . ورددت هالكلمة كم مرة لين انا بكيت من كل قلبي وحاولت اني اخفي دموعي لكن ما قدرت . الموقف كان اصعب من كل اللي توقعته . ويوم دخلت البيت لقيت ابوي الله يرحمة قاعد . والله والله شفت الدموع في عيونه بعد .. ونزلت وحبيت على راسة وعلى يده . وطلبت السموحة منه . بس للاسف ما رد على وقال حاجة غير الحمدالله على سلامتك .. وقعدت بينهم والصمت كان اطول من العمر كله .. امي على اليمين وابوي على اليسار وقدامي اخواني وزوجاتهم واخواتي .. والكل كان يصيح من جوا ..لكن الدموع ما قدرت تنزل من عيونهم . وانا اكثر منهم صياح وفرح وندامة على كل اللي صار .. كنت متوقع انهم بيقابلوني بكل جفاء وقسوة من اللي سويته فيهم .. لكن سبحان الله الظفر ما يطلع من اللحم . ويمكن هذا اللي اثر فيني اكثر . تمنيت انهم يعاتبوني . ولو حتى يظربوني . او يتنكرون لي ويقولون كان لنا ولد او اخو اسمه ابراهيم .. عشان احس انهم تقاضوا مني ولو شوي . ومرت ذيك الليلة على خير . ويوم جاء الصباح اجتمعنا على الفطور . وطلع ابوي من جيبة مفتاح سيارة وقال خذ السيارة خلها تشيل رجلك . وتكفيك عن حاجة الاخرين . والله اني تمنيت ان الارض انشقت وبلعتني . لاني فعلا كنت خجلان وما ادري وش اقول . يعني بعد كل اللي سويته يعاملوني بالطريقة هاذي ؟؟؟ المهم استمرت الحياة . وقررت اني معد ارجع اوروبا لو يوزنوني بالذهب . لاني فعلا كنت افتقد كل هالحنان والترابط الاجتماعي بين الاهل والناس من حولي ..وتأسفت على السنين اللي راحت من عمري بالغربة وما استفدت منها ولا حاجة .. لكن الحمدالله .. لقيت الدنيا بخير في ديرتنا وبين اهلنا . والله والله ما يحس الواحد بقيمة اهله الا اذا فقدهم . وعاش بين الاغراب مثل الضايع . اذا مرضت مافيه احد بيسأل عنك . ولو مت من الجوع ما راح احد يهتم فيك . وبعد كم يوم بديت ادور على شغل .. ولفيت ولفيت لين تعبت . وبعدها اشتغلت في وحدة من الشركات . وكان الراتب قليل شوي لكن الحمدالله كان كل همي اني ارجع ثقة اهلي والناس فيني .. وبعد شهرين من وصولي للمملكة .. تعب ابوي ومرض ودخل المستشفى . وكان عنده جلطة في الراس . وتوليت انا مرافقته بالمستشفى . لانه كان بالمرة تعبان . كنت اجي عنده من الساعة 2 الظهر الين الساعة 7 الصبح من اليوم الثاني .. كنت اعطيه الاكل وادخل معه الحمام ( الله يكرمكم ) . واذا جاء الصباح . جاء اخوي عنده عشان اقدر اروح للعمل .. لانهم والله ما قصروا معي وخلوني اداوم بالصباح فقط مع العلم انه دوام الشركة فترتين باليوم .. وبعد تقريبا عشرة ايام .. وفي اخر ليلة . كنت مع ابوي .. وكان يتكلم بصعوبة .. لكن اللي فهمت منه انه قال ( اعرف ياولدي اني ولله الحمد راضي عليك ومسامحك في كل اللي سويته ) وكانت الدموع تنزل من عيونه . وخنقتني العبرة . ونزلت احب على راسة ويديه وانا دموعي كانت تنزل عليها ويحاول يبتسم لي لكن الالم كان اكبر من انه يعبر لي عن اللي في داخله .. واذكر الشي الوحيد اللي قطع علينا فترة الصمت هاذي هو جهاز المغذية اللي مشبوك فيه طلعت منه صفارة الانذار .. واستدعيت له الممرضة .. عشان تغيرها .. ويوم جاء الصباح . رحت للعمل وبالي مشغول بكل كلمة حاول يقولها لي .. وما صبرت قبل الظهر استأذنت ورحت للمستشفى . وقعدت عنده .. بعدين جو اخواني وقت الزيارة .. وتجمعنا حوله .. وكانت حالته غير طبيعية .. يسأل عن فلان وفلان . ويحاول يتكلم كثير .. وشد انتباهنا ان اصبع السبابة كان مرفوع اغلب الوقت .. وبين كل كلمة وكلمة كان يحاول يتشهد .. وما كنت متوقع انها اخر اللحظات بعمره .. الله يرحمة .. المهم في هالوقت صاح واحد من الاجهزة . وحاول يعض على شفايفة . وفجأة دخلت الممرضة ووراها دكتور . وطلبوا مننا اننا نطلع برا . وما احد سمع كلامهم ذيك الساعة .. وجابوا جهاز الصدمات الكهربائية وحطوه على صدرة .. لكن اخذ ربي امانته قبل لايسوون أي حاجة .. انا بصراحة طلعت من الغرفة .. وكنت منيب مصدق . وفي نفس الوقت يمكن كنت فرحان .. لانه مات ولاتعذب كثير .. بعد شوي طلعوا اخواني من الغرفة وهم يبكون . وعزينا بعض . وقعدنا نفكر بطريقة نقل الخبر للبيت .. شايلين هم الوالدة كيف نقول لها .. بعدين راح اخوي الاوسط عشان يمهد السالفة ..وبعدين نروح كلنا ونقول لهم انه توفى .. قبل احد يجي المستشفى ويعرف منهم وتخرب السالفة .. ودخلنا عليهم وقلنا لهم انه توفى وبدا الصياح والنياح والترحم عليه . وفي اليوم الثاني صلينا عليه الظهر .. واودعناه الى مثواه الاخير .. وكانوا المعزين كثير . وبعد العودة للبيت .. زادت حدة الصياح شوي .. لكن تصدق .. اني ما بكيت من جد الا بعد ثلاثة ايام .. كان البيت دايم مزحوم من الناس اللي تعزي .. ويمكن الواحد كان مشغول .. وفي اليوم الثالث كنت طالع مشوار بالسيارة .. ومريت من عند المستشفى .. وتذكرت المرحوم .. وبكيت عليه من جد .. الى درجة صوتي كان عالي بالصياح .. وطولت وانا ابكي .. وحاولت اني الف شوي بالسيارة عشان ما يشوفني احد عند البيت وانا ما زلت ابكي .. الله يرحمة ) .. ( الــــنـهــــــــــــــــ ــــــأيــة ) اعزائي .. احببت ان اطرح لكم هذه المجموعة من القصص . لتكون عبرة لكل شاب في مقتبل الحياة . لان الذي حصل مع صديقي ابراهيم من الممكن ان يحصل لاي فرد منكم او عزيز عليكم .. .. وتقبلوا مني اجمل الامنيات بحياة سعيدة ... في الختام اتمنى عجبتكم القصة فهي قصة رائعة ومؤثرة جداً اثرت فيني بدرجة كبيرة وتقبلوا مني خالص التحيات والشكر على المتابعة اختكم ........جروح |
|
|
|
|
03-09-2003, 01:21
|
#3 |
|
شـــاعــر
|
الأخت الفاضله / جروح الله يعطيك العافيه على هالقصه الجميله المعبره والله ما قصرتي على هالمجهود بما ان الموضوع شامل للأجزاء الخمسه فيستاهل اتثبيت بعد اذانكم يا مشرفين |
|
|
|
|
03-09-2003, 08:03
|
#4 |
|
عضو شعبيات
|
اختي جروح يعطيك الف الف عافيه علي هذه القصه المعبره والمحزنه في نفس الوقت قسم بالله وانا اقراها كانت العبره تخنقني علي فكره كنت مهتم بها من الجزاء الاول حتي النهايه وكنت انتظر نهاية هذه الرئعه . تقبلي تحياتي بعيد نظر |
|
|
|
|
04-09-2003, 07:51
|
#5 |
|
..
|
الاخت جروح الله يعطيك العافيه وتسلمين على النقل الرائع القصة محزنه ولكن هذا حال اغلب الشباب هناك والاسباب تعود الى عدم تمسكهم بتعاليم ديننا الحنيف واتباع النفس هواها تحياتي لك  |
|
|
|
|
04-09-2003, 13:07
|
#6 |
|
أطــلال
|
الاخ الكريم احمد الديهان : الله يعافيك ويسلمك اخوي واتمنى اكبر عدد ممكن يقرأها فهي مؤئرة جداً والكثير منا بحاجة لمثلها لايقاظه من سبات دنياه والف شكر على التبيث ما قصرت الاخ الكريم بعيد نظر : هلا بك اخوي وشيء يسعدني متابعتك وسلامتك من الحزن يا رب وجعلك ما تذوقه ولا جميع اخواننا المسلمين واتمنى ما تاخرت عليك بباقي الاجزاء اخوي الغايب عبدالرحمن اليحي : اولاً وين الناس ما لك حس بالمنتدى ... وين مشاركاتك  على العموم حضور اسعدني ورأيك في محله فالتمسك بالدين هو المنقذ لشبابنا من لهوهم وعاقبة الامر السيء للجميع هنا اطيب تحياتي اختكم .....جروح |
|
|
|
|
05-09-2003, 20:40
|
#7 |
|
شــاعـر
|
الله الله الله الله الله ياجروح والله قمت الابداع في سرد هذه القصه المؤثره والله يعين كل مغترب على البلاوي الي راح يالاقيها في بلاد لا يوجد بهاء قيم والاخالاق ولك اختي جروح كل الاحترام وصادق الود من اخو نمر العتيبي |
|
|
|
|
06-09-2003, 16:28
|
#8 |
|
رفيــق الحــزن
|
الاخت جروح مساء الخير ... بصراحة قصيةفي غاية الحزن ومأساة كل من يشذ عن دينه ومجتمعه .... الحقيقة فيه امثله لأبراهيم كثيرة وهذا ما يعني انهم اكثر من اللي راحو سواء لاوروبا او امريكا ورجعوا فاشلين .. وهنا ذكرت بيتين شعر كنت قلته وانا خارج المملكه : كلها أسبوعين بس اللي بقت ..................................... ويرجع الواحد الى أهله وناســه المشاعــر للسـعـوديـه بـكـت .................................... وكل شخصٍ مرجعه دوم لأساسـه ولك كل الشكر والتقدير على هذا لموضوع لقيّم . تحياتي . |
|
|
|
|
07-09-2003, 17:04
|
#9 |
|
أطــلال
|
الاخ الكريم نمر العتيبي : الف شكر على متابعتك وردودك اللي تسعدني فعلاً واشاركك الدعاء بان يعين الله شبابنا المغتربين ويحميهم من شر انفسهم ووسواس الشيطان ولك منك خالص التحية الاخ الكريم عبدالرحمن الربّيع : مساء النور هلا بك اخوي ..حضور اسعدني وبالفعل وكما قلت قصة مؤثرة لابعد حدود التأثير الله يصرف شبابنا عما يضرهم ويوجههم لجميل الفعل والقول ومشكور على ابياتك ...جميله وفي الصميم فعلاً لا قيمة للانسان الا في بلده الشكر وخالص التحيات لكل من حضر هنا للجميع من اختكم .. جروح |
|
|
|
|
08-09-2003, 03:21
|
#10 |
|
شـــاعرة
|
صباحك خير ونور جروح موضوع متعوب عليه واختيارك جميل له تسلمين والله قصه مؤثره فعلاً تحياتي |
|
|
|
 |
| عدد المتواجدون في هذا الموضوع » 1 , عدد الأعضاء » 0 , عدد الزوار » 1 | |
|
|
|
|
