03-11-2010, 16:45 | #1 |
نديم المجره / شـاعر
|
خباري عروس.......
ياموتري والمطـر هتـان = والنفـس بالبـر مبلـيـه شد العزم تنطوي الريضان = وقت السحر طـي زوليـه يازين مشيٍ مـع الوديـان = باقصى الحـدود الشماليـه وطعوس لينه تقـل جيـلان = حمرٍ مـن الخيـر مرويـه ياماحـلا بـاذره لـحـان = وصارت به الارض مكسيه بس البـلا قايـد الغـزلان = ونفسـي لشوفـه هواويـه احـن لصخيـف الذرعـان = حلو النبـا صافـي النيـه ياني على شوفتـه شفقـان = اشفـق مـن الام لصبيـه عذب السوالف شجي الحان = اغليـه واغلـي حكاويـه له بسمـةٍ تبعـد الاحـزان = تسعـد قلـوب الشقاويـه مافادنـي البـر بالنسيـان = ماينسـي واحــدٍ زيــه اذكـره لمالـت الاغصـان = ولغـردت كــل قمـريـه ولشق نور الصباح وبـان = ولهبـت الريـح شرقـيـه والفجـر يذكـرنـي الاذان = لجـا يسحـب مواطـيـه ونادى بصوته وهو نعسان = ياحـي صوتـه وياحـيـه لـولاه ماخلـي الـبـران = وماخلـي ارضٍ خـلاويـه واعيش عمري مع البدوان = وانسى المدينـه وبلاويـه اهل الكرم ذابحين الضـان = وابوسعد* خـوش ماريـه انا اشهد ان الكريم امعـان = ربـك يقـدي خطـاويـه وين انت ياراعي النيسان* = ترى الوعد جـال زعبيـه سلم على ربعك القصمـان = وقل من هو اللي يبي الجيه نبي خباري عروس ان كان = تسمح ظـروف الشقرديـه العام جيتـه وانـا تعبـان = وكتفي تقـل فيـه شبريـه صابن حزامٍ مـن النيـران = ناره على الكتـف مطويـه حتى الطبيب قال لي حيران = ماله شفـى بكـل صحيـه مالـه عـلاجٍ لـحـد الان = غيـر المهـدي لراعـيـه جينا الخباري بـلا عنـوان = نمشي على غيـر ردميـه يسوقنـا يمهـا الرحمـان = نمشـي والاقـدار مخفيـه وطبيت في طينها فسقـان = وتعلـق الطيـن بيـديـه وحطيت منه على الامتـان = والكتـف واللـي حواليـه والصبح اصبحت ماكن كان = بالكتف امراض مـو ليـه شفيـت واشفانـي المنـان = وعـادت حياتـي طبيعيـه الحمـد لله عظيـم الشـان = منشي عـروس وخباريـه ياعزتي لكاشـت الصمـان = ارضه من النـاس ممليـه تلقى البشر بالفياض الوان = بدوان وحضـر وحساويـه وتلقى من اهل اليمن وعمان = ومن مصر تلقى وسوريـه وهنود تلقى بهـا وافغـان = ورعيان مـن دون جنسيـه والناس فيها تقـل ديـدان = مابيـن راكـب ورجلـيـه حتى فياضه غـدة ريغـان = غبـرا تقـل خـد بوذيـه وبالليل كنك علـى بركـان = كلٍ قبس بالمسـاء ضيـه والبعض ناقص حيا وايمان = يرحـل ويتـرك قواطـيـه خلوا الزبايل على القيعـان = في كـل الارجـاء مرميـه وان جيتهم ناصحٍ باحسـان = ردوا بالـفـاظ سوقـيـه وامنين ماتلتفـت جيـران = صكـوا عليـك الزقرتيـه محشور في وسطهم بلشان = مالك مـع النـاس حريـه لكثروا النـاس بالخليـان = خل الخـلا وخـل اهاليـه وارجع لدارك قرير اعيـان = على الاقل بـه خصوصيـه مر الحقيقـه ولا البهتـان = قولـي ولا اقـول مرويـه احمد بن عبدالرحمن العريفي (نديم المجره) * الاستاذ / بندر بن سعد القحطاني - لينه * النقيب / محمد بن عبدالله الجمعه - الدمام اخر تعديل كان بواسطة » احمد العريفي في يوم » 03-11-2010 عند الساعة » 16:50. |
21-04-2011, 23:20 | #2 |
نديم المجره / شـاعر
|
رد : خباري عروس.......
91 مشاهد ماحد ابدا اي ملاحظه لامدح ولا حتى ذم |
22-04-2011, 03:25 | #3 |
شــاعر
|
رد : خباري عروس.......
أحمد العريفي صح لسانك هجينية كالمطر وأبشرك عروس والديار الشمالية سالت ولله الحمد إن كنت تقصد عروس الحرة وإن كان براسك هومة على عروس نتشرف بك أطال الله عمرك على طاعته |
22-04-2011, 12:03 | #4 |
أبو تركي / شاعـر
|
رد : خباري عروس.......
ولا تزعل اخوي أحمد أحياناً يكون موضوع القصيدة غير مغري للمتذوق واحياناً نقرأ ونؤجل الرد فتختفي وننسى المؤكد هنا أننا لا نستطيع أن نجبر الذائقة على القبول وعليه لايحق لنا الزعل بالنسبة لي أراها جميلة وتذكرني بكل جميل سلم بوحك اخر تعديل كان بواسطة » علي التركي في يوم » 22-04-2011 عند الساعة » 17:12. |
25-04-2011, 03:03 | #5 |
شـــاعر
|
رد : خباري عروس.......
لـولاه ماخلـي الـبـران = وماخلـي ارضٍ خـلاويـه واعيش عمري مع البدوان = وانسى المدينـه وبلاويـه يغلب حب على حب منذ خلقنا قصيدة جميلة صح الله لسانك |
18-09-2011, 14:16 | #6 |
نديم المجره / شـاعر
|
رد : خباري عروس.......
حياكم ربي شرفني مروركم واسعدني ثنائكم الله يسعدكم تحياتي |
عدد المتواجدون في هذا الموضوع » 1 , عدد الأعضاء » 0 , عدد الزوار » 1 | |
|
|
|