[سليمان الشدوي]

/
/
/

/
/
/



يجتاحني احساس / مامثله احساس
ينثر بصدري مفردات / وقصايد

احيان اقول الصدر به عرق دسّاس
يدس من بعض الفرايد/ فرايد

واحيان اقول الناس /ماتشبه الناس
واحساسهم / مابين ناقص وزايد

لكن يجي للماس /في منجم الماس
إشعاع يغري عاشقات القلايد

الشعر/ ماهو من حديث ابن عباس
ولاهو/ عقيدة / تنتمي للعقايد

ولاهوب /من وسواس (شيطان خناس)
لكن على ماقالوا / العرف سايد

ولايميز جنس/ من بين الاجناس
ولاهوب /قوماني / ولاهو محايد

الشعر ماهو للرجاجيل مقياس
ولاهو رهين / الأنظمه والعوايد

مغانم الشعار / نغمات واجراس
وفوايد الصياد/ صيد الفوايد


(الشاعر المسجون) و(الخلق حراس)
و(الحارس المعجب) / يزيد النقايد

شاعر في الميدان يبني على ساس
موهوب في وقت الرخا / والشدايد

وشاعر على قول المثل يطبخ الفاس
استبشروا بالفاس / ياهل الموايد

لوكان بيت الشعر / بالمتر ينقاس
كان الفضا / يزخر بمليون رايد

لويضربون العالم / اخماس واسداس
محد ً تكفل / بالطيوف الشرايد


وان شارف الشاعر على حد الافلاس
تلقاه حول (اهل القصايد )يزايد

وانا تطاولته / على كل مرواس
وخليته الكايد/ على كل كايد

مالي امل /لو قلت (فنجال هوجاس)
وماله لوا / لو زارني بالهجايد

ياما نطقته / والشرايين يبّاس
وكرّمت (وجهه) عن فصول النقايد

وياما عزفت الريح / مع كل نسناس
واقلقت / طابور الحيّل والمكايد

شكلت به (لوحات) من عقد الالماس
للي نهـــار العيـد / وده يعـايد

يفوتني /وانا اطرده طرد الانفاس
الحق طرايد / ثم تظهر طرايد

ان ما رقى بي فكر / يرقى بي احساس
لو خانته كل الصحف / والجرايد

لولا الرجا/ والخوف / والشوق/ والياس
ماتهت / في نظم الطيوف الشرايد

واقولها : والناس ماترضي الناس
عبر الطروق الماضية / والجدايد

(إن عشت ياشعري/ فلاباس / لاباس
وان مت ياشعري/ فدتك القصايد )





ـــــــــــــــــــــــــــــــــــــــــــــــ
البيت الاخير توارد خواطر
مع البيت المشهور :

ان عشت ياراسي كسيتك عمامه
وان مت ياشعري فدتك العمايم

الشيخ / محمد بن سّرار الشهراني رحمه الله

[علي آل جاري]

أجدت فأبدعت فأمتعت
شكرا لك أخي