[محمد مدران اليامى]

الله يمسيكم بالخير جميع ..وكل عام وانتوا بخير.. مشاركه متواضعه لبرنامج شاعر المليون .. لم يكتب لي ولها,,

يشوقني صوت الشعر ويقودني مثل الغرير=على مزاين شاعر المليون..ياعرْافْته.

متوكل بالله على الروحه ولاني بالضرير=وادرا على عيني من ابهامي..ومن طرْافْته.

الله عطاني ماعطى ربعي..وماه اعطى جرير=والمرقب اللى ماحلا الوقفه..على شرْافْته.

في ساعة لاهي مطر..ولا عبوس قمطرير=الا يجاذبها الشعور اللى كما..ورْافْته.

ورْاف غصن منهزع للما تحت جذعه..خرير=والشعر صرف من ذهب..وانا حدا صرْافْته.

أنقاه نقو اللي يعرفون الحرير من الحرير=واعوذ بالله من تنحايه..ومن شر افْته.

وارد بحوره لي خلا بالنوم ابو طرف قرير=وابدي مبادي النجم انا وياه..في طرْافْته.

والشعر ماياتي به المسدح على جال السرير=ولا تجيبه هقْوة التجار..في عرْافْته.

سلام مانسنس هوى الغربي من فواد برير=على الحضور..ومن يشاهدنا مع شرْافْته.

والله يجنب راعي الفكره..عذاب الزمهرير=ويعيذنا من نزغة الشيطان..في حرْافْته.

ذا اليوم..يوم يجعل الشعار..في سك وصرير=والشعر كنه الا المحيط..وكلنا غرْافْته.

اقبلت..اقدم مايقدمني لو يحوس المرير=درب قطعته من وسط نجران..ياعرْافْته.

[غرم البهيشي]

محمد بن مدران انشهد انك كفؤ

صح لسانك

قصيده رائعه كروعة كاتبها وقافيه جميله لا يتقنهاالا الكبار

يعطيك الله اخي محمد ولك تحياتي

[نايف سعود]

صح لسانك يامحمد شاعر قدير سوى شاركت بشاعر المليون أم لم تشارك

تراك عندنا تسوى أكثر من قيمة البرنامج الذي لدي تحفظ كبير عليه

وما دامه ما وصل لبلدنا لأي سبب أقدرك وأقدر كل شاعر سعودي

أبت نفسه المشاركه فيه قصيده جزله من شاعر جزل

تقبل تحياتي وتقديري

[مانع الوايلي]

أبوعلي

صح لسانك مدد


شاعر لو كتبت عنه أحتاج الا بحث كامل


قصيده ليست بغريبه منك يابوعلي لأانك معودنا على كل جميل ونادر



تقبل مروري

[نورة العجمي]

محمد مدران اليامى
يسعد صباح الشعر
راجعة ان شاء الله

[علي بن جوخة]

محمد بن مدران

شاعر يطوع الحرف والوصف ,, لله درك من شاعر

صح لسانك ملايين ونحن بكل تاكيد خسرنا اطلالتك على الشاشة ولكن القادم احلى باذن الله

سلمت ودمت

[نوف الثنيان]

صح لسانك يامحمد ..
سواء شاركت في المليون أم لم تشارك ..
شاعر رائع ومتميز .. ونعتد به ..
تقديري ..

[سعيد المري]

محمد بن مدران

صح لسانك ونبضك وعز الله مافيك حيله

[فهد اليامي]

صح لسانك يابو علي

وانت مايحتاج شاعر علم من اعلام الشعر

وتقبل تحياتي

[خالد العروي]

ورْاف غصن منهزع للما تحت جذعه..خرير

والشعر صرف من ذهب..وانا حدا صرْافْته

والله ومليووووون نعم شاعرنا القدير

محمد مدران اليامي

قصيدة في منتهى الجمال والحرفنه

وإن شاء الله فيها خيره

تمنياتي لك بالتووووفيق

[محمد مدران اليامى]

غرم .. الله يحييك ..

ماعليك زود طال عمرك..وصح بدنك ,,

رايك يشرفني .. ومرورك بعد ..

[محمد مدران اليامى]

ارحب يانايف

نور شعبيات بحضورك معنا من جديد بعد الغيبه ..شاعر جزل وحضورك يكمْل العقد الدرْي هنا..

صح بدنك ومرورك شرفني..وانا اتشرف بكم والله جميع..
اجمل مافي البرنامج تحريضه الشاعر على الكتابه..فقط..
اما الامور الاخرى فهي توافيق من الله وبعد الله تعتمد على الشاعر نفسه..


لاهنت يبو سعود..

[سعيد بن مقبل الأكلبي]

محمد بن مدران
ياهلا والله ومرحبا بالقصيد الجزل وراعيه
بس ودي اعرف هم ما اجازوها والا مارحت لهم اصلا
لانهم ان ما اجازوا القصيده هذي فلا عندهم سالفه
شاعر تطربني ومن زملائي القدماء والمعاصرين في شعبيات
لاعدمتك وصح لسانك وبدنك

[سمو الرأي]

هيييييييييه يا محمد


تجرح وتداوي .... الدار هزتها مشاعر غرانها .. والباب ضاع مفتاح سدانه




مبدع يا محمد ورائع تحوس المشاعر حوس وترجع تداريها منذو مبطي وانت غير



لا خلا ولا عدم وفديت ديار تربيت فيها




(( سلام مانسنس هوى الغربي من فـواد بريـر
على الحضور..ومن يشاهدنا مـع شرْافْتـه.))




تقبل تحياتي / ابو حسين

[محمد مدران اليامى]

هلا يبو حمد..

نور المتصفح

صح بدنك ..وحضورك شهاده ..تشرفني..

سلم عليك ولاهنت