[عبدالرحمن المرخان]

السلام عليكم ورحمة الله وبركاته
وقصيده بعد غياب .. من وحي الحدث

استبشر التعليم في " دايم السيف"=خالد ولد فيصل.. كريم السجيه
نسل " الملك" ماهو بحاجه لتعريف=فيصل أبوه و"كل" خالد سميه
راعي محل .. ماهو على منصبه ضيف=ونفسه عن علوم "المهايط" غنيه
بعض العرب من شان يحضى بتشريف=يلهث ورا المنصب ونفسه شقيه
والاَ انت شامخ فوق روس المشاريف=ونارك على رجم المشاهير حيه
انت وسنام المجد ربع ومواليف=مانت بغريب الدار في كل هيَه
تاريخكم ماهو مجرد سواليف=وقصر الشرف ضافي على الناس فيَه
تاريخ عامر في جزال المواقيف=ويوم البلد بالجهل تطحن رحيَه
هذي الحقيقه صدق ماهي بتحريف=سطرتها لك من حروفي هديه
وانا ادري انك واسع الفكر عرٍيف=ضاري على شيل الحمول القويه
واضح وضوح الشمس من دون تغليف=ولك وقفتن عند اللوازم جريه
ربيعنا بالدار مزنه مراديف=من يوم "جدك" لم شمل الرعيه
والجاهل اللي نابتن له زعانيف=فعلا مايضحك غير" شر البليه"
وعندي" رساله" من هل المدن والريف=حملتها لك بالحروف الزكيه
ترى المواطن من شرورة الى طريف=يرجون بعد الله رجاوي نقيه
ترى" القياس" القى عليهم تكاليف=ومتاعبن بالرزق ماهي شويه
وترى المدرس ضاع رزقه تساليف=قبل الهلال يهل ينفض يديَه
وكم واحدن خريج محتاج توظيف=يبغى الوظيفه قبل يوم المنيه
والا انت قادر تقلب طريف لجنيف=وتبني صروح العلم وتشع ضيه
اختارك " العاهل بحنكه وتوصيف="والشبل من ذاك الاسد" وانت زيه
تم اختيارك قبل فتح المظاريف=حيثك لصرح العلم كسب وعطيه