[عزيـز]

اخوي الغالي

خالد الشايع


وبعدين لي فتره قاطع عن النت لظروف قاسيه شوي لكن حسيت ان المنتدى والموقع كله منور ولاعرفت وش النور ذا

لكن دخلت المنتدى اشوف وش قصة النور















































وعرفت عاد الحين من وين النور


اثر اخوي خالد صار مشرف بسالفه وقصيده

والله يابو وليد انه تو مازاد غلى المنتدى عندي

وانت مكسب للمنتدى

وبالنسبه لسالفة العنقري

ابي اقول لك شي


بيني وبينك اذا سمعت احد الرواة (الشيبان) وهو يقص قصة حب قديمه وفيها قصيده الاحظ ان الراويه يبالغ بعض الاحيان بحب وعشق الاولين ويمدحه ويتوجد عليه ويقول(ايه هذا الحب الصدقي )

صار الحب مثل السنه او النفيله

حب الاولين وحب التالين كلهن حول بعض لكن الفرق ان البنات من اول مايتسترون مثل الحين (اقصد المتحشمات فقط) وكان فيه جهل وخصوصا عند الباديه .



البنت الجميله تشتهر ويذيع صيتها وكانوا البنات يطلعون مع الرجال بالحروب لتشجيعهم وفيه كثير من الحروب كان سبب الانتصار فيها هم (البيض)


عندك الروقه من عتيبه اكيد انك سمعت بالمعركه الي صارت بينهم وبين ابن سعود (في الدوله السعوديه الثانيه) وكان جيش ابن سعود اكثر من 3000 خيال

والروقه كانوا 300 فارس

وانتصر جيش القوه والكثره وبعد ما انسحبوا الروقه راجعين لاهلهم . طلعت عليهم مضاوي بنت ابن ربيعان (شيخ عتيبه) وكانت معروفه بجمالها . وفرعت قدام الفرسان وصاحت

ورجعوا الروقه لعيون مضاوي وانتصروا .

وهذي ابيات لشليويح العطاوي بالموقف نفسه
[poet font="Simplified Arabic,4,white,normal,normal" bkcolor="transparent" bkimage="backgrounds/15.gif" border="none,4,gray" type=2 line=200% align=center use=ex length=0 char="" num="0,black" filter=" shadow(color=red,direction=135)"]
رحم ابو من صد عن محرافها=يوم انجلاع الستر عن مضاوي

نطعن لعين اللي تهل دموعها=تبكي وفي تالي البكا نخاوي

قلت ابشري بالفك ياحم الذرى=دام الطعن بفك والا هاوي
[/poet]

الزبده ياخال ان الغزل ماكان عيب حتى لو تغزل الشاعر في بنت وذكر اسمها واسم ابوها . لو ابو البنت شيخ قبيله مثل سالفتنا حقة شليويح

وهذا الشي طبعا يخالف تعاليم الدين . والحين انا مااقول كل البنات متسترات ومحتشمات . لكن اقول اهل الخير واااجد )

وطبعا ياخال فيه حب برئ وشريف لكن نادر لابعد الحدود واي شاعر يتغزل تلاحظ ان الشاعر يوصف حبه وعشقه على اساس انه عفيف وشريف

والناس تصدق انه هذا الحب الجائز

وكثير من الشعار الي اشتهروا بالغزل وحبهم للبيض تلقاه كل يوم يتغزل في بنت

عندك مثال محسن الهزاني

هذا مافيه بنت الا وتغزل فيها وله قصايد مهيب طبيعيه والي يسمعها يقول مسكين الشاعر

والشاعر كان الله يرحمه معروف بحب البنات وكل بنت جميله يحبها .

وعندك بصري الوضيحي الشمري

هذا بعد مايخفى عليك كان طراد هوى (هواوي) حتى اني سمعت شريط لراويه شمري يقول (بصري الوضيحي كان مولود بليلة القدر لانه اي بنت يشوفها وتعجبه لازم ياصل لغرضه من البنت )
يعنيس بصري كل يوم يحب ومقصده دايم مهوب شريف

لكن بعض الناس اذا سمع قصيده له قال هذا مسكين وضعيف اكيد انه مسحور



اخوي خالد بعض العادات والتقاليد القديمه يرفضها الاسلام

واكيد ان دينك الزم عليك من العادات والتقاليد

الحب الي بين الزوج وزوجته هذا هو الحلال وبالعكس اذا نوى الرجل ان حبه لمرته لله ورحمه بمرته فهذا عليه اجر

اما قصة انا والله احب بس حبي مثل حب الاولين

هذا ماهوب عذر ولاهوب كفاره عن الذنب بالعكس تلقاه يحب لكن يقول مانبي نتزوج لان الرجل مايبي يخطب وحده وهو يعرف لها تاريخ ماهوب طيب

صار الحب ذا معصيه وبعض الاحيان او اكثر الاحيان يوصل للزنا وتحت اسم حب الاولين

واسف ياخال على الاطاله.... بس ودي اوضح وجهة نظر ي بقضية الحب

وانتبه اصحك تقرب الهوى ترى واجد حبوا يجربون وتوهقوا
<===== مهوب عاقل الدجيما

وتقبل تحيات اخوك الصغير

عزيز