آخر 10 مشاركات
|
 |
 |
 |
||||||||||||||
|
||||||||||||||||
 |
 |
|||||||||||||||
 |
|
|
أدوات الموضوع |
17-01-2007, 17:40
|
#1 |
|
عيار
|
( يامسافر لمصر .. لزوم جنز ضيّق وشوكه وسكين ! ) الحلقة الأولى !
سلام علاكم سلخير جميع .. أولاً : لاأحد يزعل من الموضوع واخصّه الحبايب في مصــر .. تراي والله أحبهم ولو قسيت عليهم .  خامساً : هذي هي الحلقه الأولى من موضوعي : ( يامسافر لمصر .. لزوم جنز ضيّق وشوكه وسكين ! ) أنتم دارين أني قبل كم أسبوع زرقت لم ديرة الاهرامات والنيل المتنيّل بسبعين نيله ... رحت لمصر .. والا خلونا نقول .. ( أم الدنيا ) ! ياهي ( أم ) حبيّبه واجوديّه .. وتفتح النفس .. ويازين مقابلها ! عاد أنا ماطوّلت فيها لأني رايح مع ناس مايحبوّن يطولون في سفراتهم ولا يحبون يسرسرون في الليل إذا رقدت الناس ! = = = أستعديت .. جمعت عفشي .. شريت أغراضي .. ( 2 ) جنز .. واحد كحلي .. واحد ( فوشي على وردي ) >> كذا الذوق والا بلاش ! وشريت كمان ( 3 ) فنايل .. وحده ( كتْ ) وثنيتن ( كُمْ كامل الدسم ) .. وشريت بعد حزام .. وكرفتّه عجزت ألبسها .. آخر شي نطلتها في المَنوَر ! .. وشريت بعد ملابس داخليه ( .. تم الحذف مُراعاة للذوق العام ! .. ) ... وشريت بعد جــــــــزمه كعب عالي ! .. وخمّيت لي كم قبع وطربوش .. وجكـــــــــــــــــيت صوف .. وكميــــــــــــــرا رقميه ( made in banghladesh ) ! ودّعت أمي .. وخواتي .. وزملاي .. ودحيّم وراشد وماهر والمنعفظ والمنجطل وولد العامود .. واخو نويّر .. والسمرمدي .. وولد بن دهام !  تواعدت أنا وربعي اللي بسافر أنا واياهم في حي البطحاء .. ركبنا الباص أبو ( ريالين ) .. ورحنا للمطار .. ودّعنا بعض << شوفوا كيف الأغبياء .. بيروحون مع بعض ويتوادعون ! ركبنا الطيّاره .. حطوّني جنب الدريشه لأن أخوي يقول خلّك جنبها .. عشان تشوف الغيوم في السما .. ! من يوم أقلعت وانا قلبي مع ( دورة مياه الطيّاره ) الله يكرمكم .. والله ياهي ضيّقه .. الواحد يالله يدخلها .. ويالله يظهر منها !  تقولون حفرة قبر ! .. الله يوسّع علينا في قبورنا ! أزين مافي دورة مياههم أن الواحد يقدر يخش جو ويحس أنه راكب طيّاره .. تقعد تهزهز به لين ينبسط ! عاد أنا في الطيّاره كني مهبول .. مابلا أقحش من كل شي عشان أوريه ( لاهلي ) .. من قدّي ركبت طيّاره وقعدت في السماء ساعتين ونصف ! خذت كل شي .. الملاعق والسكاكين واعواد الأسنان .. حتى كيس ( الإستفراغ ) سرقتها أحسبها ( شي زين ) ! خذت مجلّة الطياره .. ويوم مرّ علي المضيف وانا اللي أقحش ثلاث جرايد .. ثنتين عربيه ووحده أنقليزيه ... وإلى الآن محتفظ فيها عندي في البيت .. وكل من شفته من الشباب ورّيته الجرايد .. وقلت هذي جرايد معطينيها في الطيّاره ! عطونا في الطيّاره غدى .. كلته وانا شبعان .. المهم أني آكل أكل حقين الطيّاره .. وأحس أني حلّلّت دراهمي اللي دفعتها في الرحله ! ويوم اني خلّصت من الغدى وانا اللي أنادي على المضيف وفي روايه ( مُضيفه .. حمرا ..عطرا .. قصيّره .. ربشا ) قلت لها عطيني ( شاهي ) .. طيّرت عيونها في وجهي .. وشكلها عرفتني !  شكل حقين الطياره دارين أني أوّل مره أركب طيّاره .. كل شوي قايم ورايح آخر الطياره ... وهذي من زود اللقافه أبغى أشوف اللي ورا .. يمكن أعرف أحد منهم ويدري أني ( Fauntleroy ) وراعي ( برستيج وخنبقه ) ! ويوم انا وصلنا للمطار المصري .. ويدلّي سوّاق الطيّاره ينادي علينا بالمقرفون .. ياساده ياركّاب .. أفسخوا أحزمتكم من بطونكم وانزلوا واذلفوا الله لايردكم وانا اللي أقحـــــص كني مقروص في جنبي .. وافتح جوّالي وادقّ على أمي وابشّــــرها أني وصلت ( مصر ) واني بـــــروح للنيل آلحين << لاتلوموني ما أعرف في مصر إلا النيل ! نزلنا للمطار .. إلا وذيك ( التفخه ) اللي تشّر علي وتقول خلّك في آخر السرى ! أنا تخوبصت وحسيت أني مسوي شي غلط !  على أني كنت مُحترم .. وقاعد في الطياره بأدب ! لادخّنت .. ولا حتى شغّلت جوّالي ! بالع العافيه .. وكل من قال لي شي .. قلت له ( أبشرطال عمرك ) .. حتى لو جاني أقرب مضيف وقال لي ( طبّ ) مع الشبّاك .. مافيها كلام ( بذبّ عمري ) والحياة ماتسوى من يعاندها ! أهم شي أني ماأخالف النظام أو أدخل قبل أحد لدورة المياه ! مسكت سرى مع العالم وربعي واخوياي قدّامي .. ! عاد أنا لابس ( جنز ) ضيّق << يافشلتاه .. قروي وطاح في جنز ! المشكله أني كنت شاري جِنز .... ومالبسته إلا يوم بغيت أروح للمطار .. وصار ضيّق حازّ على كل منطقه حسّاسه في جسم الإنسان ! صفّيت مع العالم .. وكل شوي يلتفتون علي ربعي في السرا ويضحكون .. يدرون أني بجيب ( العيد ) في روحتي لمصر ! ويوم أنه جا ( دوري ) وانا اللي أعطي الضابط جوازي .. وأطقّها ابتسامه أبيه يمشيني ولاياخذ مني ( خمسه جنيه ) ! عطاني الجواز .. وقال لي ( أمشي ) ! مشيت وانا مدودل راسي .. وبالع العافيه ! تونا طالعين من المطار إلا وثلاثمية واحد يناديني وكلهم سواويق تكاسي ( على فين رايح ياريّس ) قلت ( الزمالك في القاهره ) ! حافظ الكلمه مضبوط .. على بالي فاهم .. أصلاً أنا في القاهره .. ! إلا ويجيني واحد ويمعط الشنطه من يدي .. ويسحب يدي اليسار ويقعد يجرجرني بين الناس وربعي وراي يضحكون .. وهو اللي ينطلني في المرتبه اللي قدام ويقول ( أنت ريّس كبيرومُحترم ! ) ! مهوب لله .. عشان دراهمي يالمجرم ! إلى هِنا ياحلوين .. تنتهي الحلقه الأولى .. بنعطيكم الحلقه الثانيه والأخيره بعد كم يوم .. هالمرّه مافيه بطل بيموت .. لأني أخاف أموّت البطل .. ثم ننشب إذا رحنا مره ثانيه ( لأم الدنيا ) لي عوده بالحلقه الثانيه ياحلوين .... سلامون .. [ مُدمن شاهي ] |
|
|
|
18-01-2007, 10:10
|
#2 |
|
شاعـرة
|
رد : ( يامسافر لمصر .. لزوم جنز ضيّق وشوكه وسكين ! ) الحلقة الأولى !
أختي مدمن ليبتون (وحده تبي تنتقم) وسعت صدري على الصبح الله يوسع صدرك بالإيمان وطاعة الرحمن ... في انتظار الحلقه الثانية لك مني باقة جرجير |
|
|
|
|
22-01-2007, 09:16
|
#3 |
|
شــاعر
|
رد : ( يامسافر لمصر .. لزوم جنز ضيّق وشوكه وسكين ! ) الحلقة الأولى !
أنا تخوبصت وحسيت أني مسوي شي غلط ! على أني كنت مُحترم .. وقاعد في الطياره بأدب ! لادخّنت .. ولا حتى شغّلت جوّالي ! هههههههههههههههههههههههههه تحس ان هذه هي المخالفتين الي تودي اي مسافر في داهيه انا اشهد ان شوالفك توسع الصدر واسلوبك رائع في سرد القصص واصل يا باشا متعطشين |
|
|
|
|
| عدد المتواجدون في هذا الموضوع » 1 , عدد الأعضاء » 0 , عدد الزوار » 1 | |
|
|
|
|
