12-06-2002, 18:27
|
#1 |
|
رحمة الله عليه
|
عبدالعزيز ابن رشيد
السلام عليكم ورحمة الله وبركاته لو بحثت في كتب التاريخ عن عبدالعزيز المتعب العبدالله الرشيد  تبي تلقا الشجاعه المتهوره والدهاء والكرم وال<======== هنا يختلف الوضعتبي تلقا الظلم (الي مصور بشكل كبير) والقسوه حتى ان في احد الكتب (الطاغيه ) الصراحه يالربع فيه بعض(لاوالله كلهن  ) الكتب يالربع تشوف فيها تزوير للتاريخ  ونصب ونفاق  وطبعا من اكثر الي نصب التاريخ في حقهم هو عبدالعزيز ابن رشيد والسبب واضح جدا وهو ان عبدالعزيزالمتعب الرشيد كان عدو الملك عبدالعزيز ال سعود  ومؤلفين الكتب يحسبون ان الحكومه تبي تذبحهم لو مدحو ابن رشيد او تكلمو عنه بانصاف وكل كتب التاريخ فيها الشي ذا وبعض الاحيان تحس ان التحيز واضح الى درجة انه صار مثل النكته من الطرائف في احدى كتب ابن خميس كان يتكلم عن معركه بين الامام فيصل واحدى القبايل ....... بس شوفو وش يقول ابن خميس الله يرضا عليه  وهجم جيش المسلمين على المشركين وكان المشركين يادون صلاة الفجر هذه تراها صحيحه مهيب نكته والله  المهم نرجع لابن رشيد عبدالعزيز ابن رشيد كان معروف بالشجاعه المتهوره ويقال (ان اشجع الحضر عبدالعزيز ابن رشيد واجع البدو محمدابن هندي) وكان عبدالعزيز ابن رشيد يلبس (جوخ (ن) حمر) والبس هذا محد يلبسه من جيشه الا هو علشان الي يبيه يقدر ياصله ومن المعارك الي كان لها اثرها في التاريخ معركة(الصريف) طبعا المعركه ذي كانت عام (1318هـ) السنه الي فشل الملك عبدالعزيز ان يدخل الرياض فيها قبل (1319هـ) وقصتها هي بدى ابن صباح يتحرش بابن رشيد وسرق قافله لاهل حائل ....وابن رشيد كان معطيه وجه وساكت له لكن كثر التحرش ويجي ابن رشيد ويرسل لابن صباح يقوله اعقل بس ليششششش الاخلاق ذي المفروض يروح ويلعن الطيب مابه؟؟؟  السبب هو ان محمد ابن رشيد الي كان قبل عبدالعزيز المتعب ال رشيد وصى عبدالعزيز انه مايقرب راعي الكويت وطبعا هو مايقصد ابوجابر لا يقصد اخوه الي كان يحكم الكويت وغدر فيه مبارك وذبحه لكن ابن صباح ما احترم مرسول ابن رشيد ولاعبره وابن صباح كان عنده خير وسمعته عند الباديه مايحتاج جاء وطلب من البدو انهم يفزعون معه ضد ابن رشيد وكان اغلب البوادي حاقدين على ابن رشيد لانه كان يردهم عن الحيافه وتجمعو عند ابن صباح الكثير من البدو ومن ضمنهم العجمان والمطران وعنزه بني مره وبني هاجر وسبيع وبعض من عتيبه المهم انهم (14) بيرق الي مع ابن صباح وطلع من الكويت ومعه الجيش الجرار وقال خلونا نخيم بنجد وخيمو بنجد وكانو يتحرشون بابن رشيد ابن رشيد طلع من حائل ومعه (اهل فقط ) يعني حضر بس وجيش ابن رشيد كان سلاحه السيف والرمح والقرطاس والقلم<======= التمست الفيوز اقصد ان سلاح ابن رشيد كان سيف وشلفا وغيره من السلاح الابيض وابن صباح كان معه (5000) باروده والسالفه ذي ياجماعه انا سامعها من احد الي شاركو بالمعركه من بني مره وعمره كان (18) المهم ان ابن صباح كان متفشخر وواثق من قوة الجيش والسلاح الحاله يسد جاء ابن صباح وقال <======== يقول لشيوخ القبايل الي معه يالربع وش رايكم نهجد ابن رشيد الليله والا نصبحه باتسر قام واحد من الي كانو فيه وهو من اهل حائل الي طردهم ابن رشيد للكويت وقال انتم تبون تغزون ابن رشيد؟ قال ابن صباح وهو حاقد ايه حنا اجل من؟ قال الرجل والله ياعبدالعزيز المتعب الي اعرفه انكم ماتغزونه قال ابن صباح ليش؟ قال يبي يجيكم قبل لاتجونه ابن صباح حقد وتفل على الرجل ذا وقاله تخسى انت وياه <==== الي هو ابن رشيد المهم اهل حائل كانو بعد مجتمعين وقال ابن رشيد نبي نهجدهم الليله قال واحد من الحكماء شف يابن رشيد ابن صباح باتسر (بكره) يوافق تاريخ غدره باخوه يعني بكره يصير له سنه بالظبط ذابح اخوه واليوم ذا ماهوب شايف به سعد وكان ابن رشيد لاياخذ راي احد لكن انه هداه الله وسمع الكلام ويوم اصبحو اهل حائل ويطقون الدمام <====== الي هي عرضة الحرب وقام احد عبيد ابن رشيد ونسيت اسمه والله وقال ياهل الغالي ..................يالابتي ياوي من لابه نحمد الوالي .................يوم ان عمي نط مرقابه شال واشتالي .................نبغي لحرب الشيخ واصحابه نلبس الشالي ................ وان حل يوم(ن) فيه ضب ضابه نرخص الغالي .................دون الجبل وخشوم صبابه ظبي الاسهالي .............. من فعل ربعي تضحك انيابه غوش جهالي ............. وان طب سوق الموت جلابه طقه الجالي ...............ولالقى شي يتهقوابه وعرضو عرضة الموت <======= عرضه من العرضات الحربيه وقبل لايعتلون قطيهن قامو وسلمو على بعض ووادعوا بعضهم ...لانهم داخلين حرب وكل واحد حاط براسه انه يموت اما ابن صباح فهو قام الصبح وقعد يتقهوى وعنده شيخ مطير (سلطان الدويش) قام الدويش وحدى ...... قال لا والله الا تو زان الكيف ..................................يوم ابو جابر ظهر نبي نطارد مكرمين الضيف .................................شمر هل الغوش العطر اما خذيناهم بحد السيف .................................والا خذونا بالظفر اما نجي بيت المضيف ................................والا فياخذنا قهر المهم اثناء ماكان يتقهوى ابن صباح مادرو الا الصبي الي يصب القهوه ماسك الدله ويصب على الارض (ينثر) قال له واحد ولد الدله علامها تدفق؟ قال شوفو يوم التفتو والا ابن رشيد هو وربعه ويوم شافو البدو الي مع ابن صباح الموت وهم يهجون وصار كل واحد يسرق له شي من ابن صباح ويهج ابن صباح ماصمد معه الا اهل الكويت واهل عنيزه ومات من اهل الكويت فقط في المعركه ذي 1200 رجل المهم ان المعركه ماقعدت خمس ساعات بس وكان فيها خطه لابن رشيد عجيبه لانهم قالو له ترى معهم سلاح وبنادق قال ابن رشيد سوقو المسيوق المسيوق <========= ذولي البل الي ماتجفل من صوت السلاح وحطو المسيوق وقال يالله خلونا وراهن الين ناصلهم واذا وصلنا خلاص ماينفعهم سلاحهم لانه كان فتيل وياخذ وقت وطبعا محد فاضي يعبي بندقه وفعلا نجحت الخطه وكان ابن رشيد له فعله في المعركه ذي وابن صباح قعد به وقال (ماجد الحمود العبيد ال رشيد) يرد على الدويش اهلا هلابك يوم دار الكيف ...................................قرة عيونك بالظفر اعطيك ماجوبك بحكم الضيف ....................................شلف يفجن النحر خلاك عمك يوم شاف السيف ......................................عجل(ن)جواده وانكسر سلطان هو عقلك خفيف؟ ...................................عرضت روحك للخطر ان جاك ابومتعب تعيف ............................. مازبنك عنه البحر المهم المعركه ذي في كل كتب التاريخ ملفقه اول شي مامدحوا ابن رشيد ولا نسبو له الخطه الي سواها والسبب مثل ماقلت لكم وكان ابن رشيد يسمونه (الجنازه) لكن بدى يظلم وخاصة(ن) اهل القصيم وعلى قولة القايل كل(ن) دون حقه انقتل ابن رشيد في روضة مهنا سنة 1324هـ وبعد سجل حافل بالشجاعه والكرم والي ذبحو ابن رشيد هم اهل عنيزه واخذوا راسه وخاتمه وعلقو راسه بمدخل عنيزه (ثلاث ايام) لانه الصراحه سوى حركه مال امها داعي ومن الاشعار التي قيلت به يامن يخبرني بخيال عن الفين خيال .................................................. الفين خيال كل ابوهم مشاكيل عبدالعزيز الشمري ماض الافعال ..............................................الي ضحايا والدينه رجاجيل ومن بعده خلاص صارت حائل ضعيفه عقب القوه العجيبه وكان له عيال ولكن ذبحوهم عيال حمود العبيد علشان الحكم الا واحد اسمه (سعود ) وهذا امه انحاشت به للمدينه ويوم صار عمره 14 سنه وهو يرجع لحائل ويصير امير عليها وقاد معركه من اشرس المعارك في التاريخ بين شمر و عنزه وكانت التوقعات هي الهزيمه لشمر لكن الي صار العكس تمام وانذبح من ولد عمه لكن خلاص تراه اخر الرشيد كل جو عقبه خكاريه<========= لاحد يلومه واستروا ماواجهتو وسامحونا على الاطاله |
|
|
|
12-06-2002, 21:12
|
#2 |
|
جاسر الحربي
|
السلام عليكم .....
يالله حييييييييييييييه عزيز ............ ان شاء الله طيب ياخوي انت وين بالاتجاه المعاكس  الصراحه طرحت الموضوع بشكل ممتااااااااز وبدون بتحيز ............. واوافقك بشدّه على ما ذكرت اول طرحك ...... ابن خميّس محد ينكر انه خدم الشعر حقيقه بس اذا شفت له كتاب تاريخي الصراحه ما اشتريه طبعا هذا راي شخصي وماني من اللي يعطون احكام ======================================= يا ليت ويا حبذا// تفسّر بعض معاني الكلماااات يا عزيز وانت سويتها مثل معنى السويق بس مثل شلفا قل هي الرمح احسن تعرف بعضهم غااارق في التكنلوجيا =========== وتعال بهاوشك هنا كبيره يبو محمد آخر كلمة ولا بنلومك يعني من باب اتقاء الزعل من اللي يهمهم الامر================================ اما الاسلوب فما شاء الله تبارك الله عندك ملكة الروايه 100 % الصراحه آآآآخر مواضيعك رائعه رائعه رائعه .......... يعطيك العافية ومنتظرينك لا تبطي ترى هالمنتدى بدونك مااااااش وانا مستغرب لاني حصلتكذا قرائه له ........... يعني عطوا هاللي خذا وقت يكتب ويجمع وجه ابو محمد كن سعيدا وتحيااااااتي المسسسسسسسسك اخوك/ ابو المهند اخر تعديل كان بواسطة » المهند في يوم » 12-06-2002 عند الساعة » 21:15. |
|
|
|
|
13-06-2002, 16:10
|
#3 |
|
رحمة الله عليه
|
هلا والله وغلا حي الله خالي جاسر والله يابعدي ابرك الساعات الي اشوف اسمك هنا <====== عاد كيف الكتابه وفعلا والله عبدالله ابن خميس والعطار حق كتاب صقر الجزيره مير العطار حق صقر الجزيره جاب العيد جاب وحده ماتنبلع يقولوسبب تسمية معركة الصريف بهذا الاسم هو قدرة الله سبحانه وتعالى بانه صرف الملك عبدالعزيز عن المعركه (ملاحظه \ في كلمة صرف بدون تشديد الرآ) وهذي الي مالها مطار عاد الصريف<========= المكان الي حصلت فيه المعركه وغيرها الكثبر الكثبر وابشر بسعدك ياخال انشاء الله الكلمه الصعبه ابي اورد تفسيرها وترى يابعدي قرايتك للموضوع فقط تكفيني مهوب ردك الي والله يسوى عندي ردود 100 واحد ردو ولا قروا الموضوع واشكرك على الرد ياخال وعلى الاطرآ<====== انبسط وتقبل تحيات اخوك ومغليك<======== يمديك على الاخيره ذي |
|
|
|
|
13-06-2002, 18:39
|
#4 |
|
عضو شعبيات
|
بيض الله وجهك اخوي عزيز
الله يعطيك العافيه وما قصرت موضوع جميل وطرح ممتع وشيق ومعلومات يمكن اول مره اعرفها تسلم يمينك... زدنا من هالقصص التاريخية الله يسعدك ومشكور اخوي أختك ....رهف |
|
|
|
|
14-06-2002, 01:17
|
#5 |
|
عضو شعبيات
|
كفووووووووووووو والله
تسلم ياعزيز وتسلم يمينك ... والله اني ما ادخل المنتدى الا عشانك انت وخالك خخخخخخخخ تسلم يمينك ..... -------------------------------- لكن لي مداخله معاك ...قرأت ان ابن رشيد .. سوى مذبحه بالقصيم باهل بريده وذبح ..40 منهم 10 اطفال مالهم دخل ... ولا ذنب مجرد تخويف لاهل القصيم وعقاب لهم عشان اهل عنيزه وقفوا مع ابن سعود وان يوم معركه الروضه .. اللي قطع راسه واصبعه اللي فيه الخاتم هو امير بريده وعلقه ببريده 3 ايام ولا اعلم صحه هذا الكلا م وشكررررررررررررررررررررررررررررررررررررررررررررررر ررا لك يالغالي الحبيب |
|
|
|
|
14-06-2002, 03:19
|
#6 |
|
رحمة الله عليه
|
هلا والله وغلا حي الله اختي رهف والله ابرك الساعات يوم جاز لك الموضوع وهذا بعض ماعندكم وتقبلي تحيات اخوك عزيز |
|
|
|
|
14-06-2002, 03:59
|
#7 |
|
رحمة الله عليه
|
الحبيب ..... ياهلا وغلا
هلا وغلا اول شي ياخوي اشكرك على هالمدح الي خلان اصدق عمري وهذا كله من ذوقك ياطويل العمر شف اخوي بالنسبه لذبحة ابن رشيد خذ تفاصيلها من شيبان الله يرحمهم جميع ... عايشو الاحداث ذي (ابن رشيد زعل من اهل القصيم علشانهم وقفوا مع ابن سعود ) هذا كلامك صح؟ صحيح هذا احد الاسباب والشي الاساسي ان ابن رشيد كان حاقد على اهل القصيم من قبل ذي وابن رشيد كان بروضة مهنا عام 1324هـ والديره ذي(روضة مهنا) كانت قريبه من بريده وكان ابن رشيد يتجول بالمنطقه ذيك وصادف في طريقه 11 من (الحشاحيش) وهم الي يحشون من الارض وطبعا لايخفاك ان الشغله ذي للحريم والشيبان الضعوف والبزران ويوم شافهم قال انتم من وين؟ قالو من بريده قال <======= مااظنه قال جاء ابن رشيد وذبحهم كلهم ومن ضمنهم شايب ومعه ولدين اثنين اعمارهم (13 و 9) سنه وقال الشايب لابن رشيد اذبح اثنين مننا وخل واحد يكد على اهله ترى ورانا عائله قال ابن رشيد (مامثلهن وهن يشحذن) <====== شف النذاله وذبحهم كلهم المهم راحت الايام وابن رشيد وقعت بينه وبين اهل القصيم والملك عبدالعزيز عدة معارك وكانت الغلبه لابن رشيد(وهذا الشي الي ماذكر في الكتب ) والملك عبدالعزيز كان ورى البكيريه (يعني مخيم باقصى الديره علشان يصير بعيد عن ابن رشيد) وحتى انه اخر الايام قرر ينسحب للرياض وكان ابن رشيد وده ياصل الملك عبدالعزيز لكن اهل عنيزه يردونه (وهذه ثلاث مرات حصلت) وبعد مامشى ابن سعود من البكيريه ناوي الرياض حسو اهل عنيزه ان ابن رشيد يبي يتقعد لهم وقالو نبي نرسل للملك ابن سعود ونقوله ان ابن رشيد انسحب لان جيشه (مايجمل ) وفعلا اهل عنيزه ارسلو مرسولهم وقامو ونحروا روضة مهنا ناوين ابن رشيد ================================================= الكلام ذا كله بالليل ================================================== == ابن رشيد كان عنده خال عياله ويقاله حمود السبهان وكان نايم ابن رشيد وحلم حلم شين وفز من نومه وقال له ابن سبهان وشبك ياطويل العمر ؟ قال الشايب الي انا ذبحته هو وعياله <========== الي كانو يحشون جاني بالحلم ويقول (يابن رشيد صياد الفهود يصاد ) ابن سبهان قال له هذي حلوم ولايضيق صدرك المهم ان الشي ذا تكرر ثلاث مرات وكل شوي يقوم من النوم اخر مره طار عنه النوم وقال خلنا نهجد هالقصمان بالليل يوم طلع من خيمته ويشوف بيرق اهل عنيزه ويحسبه بيرقه وقام ينادي على (فريح) الي هو البيارقي (يعني الي يشيل البيرق والعلم ) واحد من اهل عنيزه سمع صوت ابن رشيد وعرفه وقال (ابن رشيد ياطلابته) <======= يعني هذا ابن رشيد يالي تبونه وتطلبونه وقامو عليه وجزوا راسه وصار الي صار وبالنسبه لقولتك ان الي ذبحوه اهل بريده لا ياخوي الكلام ذا خذه مني وكاد لان الراوي واحد عايش ذيك الايام وانا والله العلي العظيم منيب من اهل عنيزه لكن هذا الحق وتعال يالبريداوي<======== ماتلاحظ انه عرفك ياخي اهل بريده لهم افعال ماحد سبقهم عليها ومنها المعركه الي صارت بين اهل حايل والعتبان وكانو العتبان بس (برقا) وكانو شويين لكن فزعو (روق) يوم يقول برغش ابن طواله نو نشا من روس عالي جباله ...................................هلت على ابن حميد هو والشيابين يوم اوجهوا جاء فزعة(ن)من شماله ....................................من اولاد روق معدلين الميازين المهم ان اهل حايل ورطوا مع العتبان وانهزموا اخر شي لكن ابن رشيد استفزع باهل بريده ويفزعون له ولاوقفوا عتيبه الا جنوب نجد ويقول ابن حثلين لولا ابو حسن نوخ بذربين الايمان .......................................... راحت عليكم يابو ماجد كسيره ابو حسن<========= ابن مهنا امير بريده ابوماجد<======== حمود العبيد الرشيد وكان موجه قصيده لابن حثلين يقول له اننا هزمنا العتبان ولعنا جدهم فرد عليه ابن حثلين وقال له معنا علم من الي هزم العتبان وكل ديره به حقه من رجاله ونعم بالاجواد كلهم ياخوي واسف على الاطاله لكن حبيت اوضح لك شي شف حبيبي عبدالعزيز ابن رشيد سبه التاريخ ...... وانا معك فعلا كان طاغيه لكن التاريخ مدح عبيدالرشيد وتلقا اغلب الكتب يقولون ان عبيد ابن رشيد كان من اهل المذهب الوهابي المتشدد <======= يعني مطوع عبيد ابن رشيد كان اطغى من عبدالعزيز المتعب وله افعال كانت مثل(العار) غدره باهل الجوف معركة بقعا كانت بالقيض ويوم انتصر ابن رشيد (عبيد) جاء وحرم الاسرى الماء ثلاث ايام وصار يمشي بينهم ومعه قربته ومن طلب ما ذبحه بالسيف والي ذبحت بشذرة السيف تسعين .........................................ايضا ولاني عن طردهم بسايل تدري ليش التاريخ مدح عبيد؟ لانه كان على صله وثيقه بالامام فيصل ال سعود ومدحوه علشانه رفيقه وهذا الي خلاني اقدر عبدالعزيز ابن رشيد بزود عن غيره لانه ياخي مظلوم واسف على الاطاله وتقبل تحيات اخوك عزيز |
|
|
|
|
14-06-2002, 04:54
|
#8 |
|
جاسر الحربي
|
ماشاء الله تبارك الله وش هالزين هههههههههههههههههنقد قصصي تاريخي وضرب امثله وشعر ...... والله تعجب تعجب وصدقت في كلامك صحيح كان ابن رشيد عبيد وفي بالحيل للامام فيصل ومعظم قصايده يختمها بمدح الو تركي (الامام فيص) واقر هالبيت واااااااااضح معزته للامام فيصل: وخزني على باس الدهر راس شغموم,,,,, الليث ابو تركي مهدّي المصاعيب الخزن=الذخيره شغموم= من شغم يشغم شمغا فيقال فلان شاغم او شغموم كما ورد في كتاب ابن شغمويه ههههههههههه أمـــــــــــــــــــزح شغموم=سنافي, بطل لا يقهر وعلى حكاية انه وهابي بعد, فما أدري هل هو استقام وصار ديّن, مدري؟ بس قوله: راس الجهاد ان قالوا الدين مرجوم,,,, قيدوم ربع وان نخي كلّ يجيب ويمكن سبب ثاني للتعاطف معاه انه شاعر من الطراز الاول والناس حبت اشعاره ,, وشعر عبيد ما يحتاج =========================================== مهـــــــــــــــمّ ما فيه مذهب اسمه الوهـــــابيه أبددددددددددد ,,,, وهذا اطلقوه على المتدينين من أهل نجد ناس ما عندهم سالفه الوهّابية= حركة تصحيح قام بها الشيخ الامام/ محمد بن عبدالوهاب الله يرحمه ================================================== تحياتي |
|
|
|
|
14-06-2002, 09:38
|
#9 |
|
عضو شعبيات
|
ولنا عوده :)
هلا بك اخوي ... عزيز وتسلم والله على السرد التاريخي الرائع والمشرف واسلوبك الاروع ولي وقفاات قليله معك .... بالنسبه اول شي اتهامك لي باني من اهل بريده .. فأنا مانب من اهل بريده ... بس انا قلت لك الروايه اللي وصلتلي وقلت لك لا اعلم صحتها ... وما عندي اي طاري تحيز او عصبيه ياخلفهم ثاني شي من المعروف ايضا مواقف اهل عنيزه المشرفه مع الملك عبدالعزيز .. ومعاهده السليم مع ال سعود والى يومك والسليم امرا لعنيزه ... الشاهد ابي اسألك من صحه المعلومات اللي عندي ... قرأت ... انه بعد معركه البكيريه .. واللتي انتصر فيها اهل القصيم على جنود الدوله وانهزم الملك عبدالعزيز من ابن رشيد في نفس المعركه انه الملك عبدالعزيز زبن عنيزه واهل القصيم راحوا بالغنايم لبريده .. وابن رشيد راح للقصور حول الرس وقال العوني قصيده المشهوره قوموا كفاكم شر ميلات الاقدار ..........................................شدوا على هجن لهن الطرب دار الين قال بالقصيده على عنيزه بالبيارق وردنا ........................................ماهاب ابو تركي ولا اخلف وعدنا جينا وحنا واثقين بلدنا ........................................نظن ظن الخير والعبد مكار وقعد كل واحد منهم 3 شهور يتولم للثاني .... ويزبط اموره ... الين صارت معركه الرس ... وانهزم به ابن رشيد !! الى ان قال قمنا بحربه فوق تسعين ليله .........................................ولا قدرنا له بالاسباب حيله اغراه عرضه والمباني الطويله .........................................واللي يقول بكلمته نار وجدار .................................................. ................. وابي ايضا فضلا ليس امرا ... من انتصر في معركه الارطاويه ؟؟ هل هو ابن رشيد ام الملك عبدالعزيز ام طرف اخر ؟؟ هذا ليس الا للتأكد من معلوماات مصادر عندي ... ولا انا مالي والله مقصد بكثره الاسئله ياخوي عزيز وانا اعتبرك مرجع لي يابعدي ويا هلا بي مرتن اخرى =================================== ملاحظه اخوي عزيز .... انظر لتوقيعي لاعدمناك ... تعرف انا من وين يابعدي الحبيب اخر تعديل كان بواسطة » الحبيب في يوم » 14-06-2002 عند الساعة » 10:33. |
|
|
|
|
14-06-2002, 12:41
|
#10 |
|
رحمة الله عليه
|
هلا وغلا خالي جاسر
هلا وغلا بك يابعدي عز الله ان الحبيب كله بركه الي خلاك ترجع مره ثانيه واشوف تعليقك ومشكور يابعدي على هالمدح<======== كبر راسه وفعلا عبيد واخوه عبدالله كانو فيه صداقه بينهم وبين الامام ماسمعت عبيد يوم قال ياشيخ انا جيتك مسير وبلاس .................................... واريد اشوفك يامضنة فوادي وعبيد الله يرحمه صحيح كان داهيه في التخطيط هذا شي محد ينكره بس ماكان (مطوع ) لان له ثلاث مواقف مهيب يم دين (الله يغفر له ويرحمه )ولاتغير يابعدي الين مات وهو على شغله ماسمعت احد عيال طلال العبدالله الرشيد يقول بعبيد بعد ماشيب طبعا عبيد حرش الولد ذا على ذبح عمه طاوعت حتسي المقعديه بعمي ..................................... ياعل عبيد وشيبته باسفل النار والله يغفر له ويرحمه وانا معك في كلامك عن (الوهابيه) ولايغرك الشعر تراه هرج والله لو عبيد ابن رشيد اسامه ابن لادن عبيد يوم يحارب اهل الجوف كان قصده الجهاد الله يجيرك بس لو تقرى قصته بالجوف وفعايله بحطاب ابن سراح وابوه كان تنهبل ماهيب لم جهاد ولادين وحياك الله يابعدي وماقصرت على التعليق وان شفت (الحبيب) حجرلي لاتخلين تعال افزع |
|
|
|
|
14-06-2002, 13:46
|
#11 |
|
رحمة الله عليه
|
هلا والله بالحبيب شف اول شي انا اذا قلت انك من بريده يعني اتهمك؟ <========= يبي يورطك لا والله يابعدي ونعم بك وديرتك والله اني استمتع بقراية تاريخه لكن! شف يابعدي تاريخ عنيزه الي يشرف صح ..... مهوب تاريخ(ال سليم) مع الملك عبدالعزيز والله ياخوي ال سليم عائله مافيه شك ان طلع منها اشجع فرسان نجد الي هو (يحيا) ابن سليم الي كان يسمى (صعوط المجانين) وكان معروف بالشجاعه والذكاء والدهاء ومن القصص الي قيلت عنه في معركة (المليدآ) بين ابن رشيد واهل القصيم ابن رشيد كان كل الي معه (خيول) خياله واهل القصيم كان اغلبهم على بعارين(الجيش) وكان ابن رشيد بالمليدآ وجو اهل القصيم وخيمو بين ابن رشيد وبين القصيم بمنطقه كانت (نفود) وكان كله تخطيط ابن سليم على اساس ان الخيل (ماتكر ولا تفر بالنفود) والجيش يمشي حاله بالنفود لكن ابن رشيد كان ذكي (الي هو عبدالله) وانسحب من المليدآ على اساس يسحب اهل القصيم ويجيبهم للمليدآ وكان امير بيرده (العليان) مع ابن سليم ويوم شاف انسحاب ابن رشيد قال خلونا نلحقه الين حائل قال ابن سليم هذي خطه منه يبي يجرنا قال العليان ..... لا انت خايف قام ابن سليم طير شلوى ولاوقف الا عند ابن رشيد ودارت معركه كانت من اقوى المعارك بين اهل القصيم واهل حائل طبعا النتيجه كانت بنتصار اهل حائل لانهم بارضهم وبين جمهورهم لكن فقد في المعركه ذي الكثير من عائلة الرشيد قدروا (14) رجل ولكن عبدالله ابن رشيد بعد ماانسحب من المليدآ مكان يقول (مايجون اهل القصيم ومعهم ابن سليم) وهو يقصد ان ابن سليم داهيه وفاهم الوضع ويوم شافو اهل جو ومعهم ابن سليم قال ...... هاه ياعبدالله هذا ابن سليم جاء شفه؟ قال (ماجاب الا قهر الرجال) وهو يقصد ان احد قال له انك خايف وتصرف لكن عائلة السليم اول ماجو مع الملك عبدالعزيز من الكويت ودخلو عنيزه ذبحوا ناس واجد من عنيزه وكان في الفتره الي طلعو من عنيزه للكويت الحكم لعائله من اهل عنيزه يقال لهم (البسام) وبعد مارجعو ال سليم من الكويت ومعهم جيش الملك عبدالعزيز دخلو عنيزه ولعبو بحسبة الديره وكل واحد من عائلة البسام يشوفونه يذبحونه على طول (اقصد من الهرج كله ) لامدح ابن سليم الي جاء مع ابن سعود من الكويت لانه ماانعرف بالشجاعه مثل ابوه وجده ومثل ماقلت لك ظلم الكثير من اهل عنيزه وجده لو تقرى عنه تشوف الشجاعه صح تدري عن قصة يحيا ابن سليم هو وابن ربيعان شيخ عتيبه ؟ <===== انشد عن السالفه لاتفوتكوكلامك والله يالغالي عن معركة البكيريه هو نفس الي عندي او الي سمعت به لكن قصيدة العوني من وين جبته؟ ماهيب بديوانه هذي من قصايد العوني الي دفنهن التاريخ وطلعوهن بعض الشيبان وبالنسبه لسؤالك عن الارطاويه يجيك على الخاص الجواب اجل التوقيع ياخي مهيب مجامله بس تاريخ عنيزه فعلا يبيض الوجه لو جت عنوز وشمر(ن) وابن رشيد ............................................ ونجد جت جميعه دقها وجلالها جبته وخليته كما حلقة حديد ......................................جنوب وشرقها وشمالها <============ خش جو مع الخياط لا شف الثانيه عاداتنا ذبح المجوخ دوم ............................ والخيل صرعى في قفى الميدان الله يرحمه وحياك الله يالغالي بس اصبر وتفقد صندوقك حق الرسايل ولاتقطعنا والله لو مانزلت موضوع الاسبوع ذا اني لااوريك الشغل<====== خربت الاخلاق لابس يالغالي لابد نشوف لك مواضيع ونجي نستقعد لك <====== هذا اوله وسامحنا على القصور |
|
|
|
|
14-06-2002, 17:55
|
#12 |
|
عضو شعبيات
|
هلا بك يابعد حيي
زين انك جبت القصيده خخخخخخ بس والله يانت لعبت بحسبتها ههههههه المهم يابعد حيي .. ابشر والله بالموضوع السنع ... وبقصيده العوني كامله انشاء الله مع الروايه الاصح بأذن الله وبالنسبه للخاص مالقيت شي وشف ياخوي اذا نزلت موضوع لا اشوفك قايل لي شي ترا بهج وياهلا الحبيب |
|
|
|
|
19-06-2002, 11:20
|
#13 |
|
رحمة الله عليه
|
هلا وغلا اخوي حبيب شف يابعدي بالنسبه للبيوت الي اوردتهن وقلت اني لعب بحسبتهن صدقني هذي من القصايد الي بالذاكره ولو انها قديمه في الذاكره اكيد بيجي فيها لخبطه ولكن رجعت لشريط للواصل (تعرفه والا لا؟) وسمعتها وتاكدت اني مااغلطت لكن يمكن اختلاف المراجع .وبالنسبه لسالفة (الخاص) ترى ماردن عنه الا شيين الاول والله كتبت بالخاص لك كلام وااااااااااااااااااااااااجد والدليل على صدقي انه قال لي (لايمكن كتابة اكثر من 1200 حرف) يعني مايقبل الا اقل من كذا ولانتبهت انا والله وكنت حاط الصفحه في الخلف وبعد ماقضيت كاتب لك الرساله رجعت لصفحتي الي انا اقرى فيها بدون ماانتظر النتيجه ولا دريت الا من اخوي لاني قمت وقعد هو على الجهاز وانا طلعت ويوم رجعت قال ترى صار كذا كذا <========= تمزعت ايده من الكتابه هذا السبب الاول السبب الثاني ابي انزل موضوع تلقا فيه نشدتن عنه وابشر بالي يسرك واسف على التاخير ياخال وبعدين ياخي نزل موضوع ....... مدري احس اننا نبي نتهاوش عند موضوعك بس اخلص ونزل موضوعك لايجي علم <========== خاف يكمل وماقصرت يابعدي وشرفتنا |
|
|
|
|
07-07-2002, 20:08
|
#14 |
|
عاشقة شعبيات
|
أنتظروني
جميله هي شعبيات ومتفتحه وكل يوم تبهرني ...... مادريت ان الانترنت فيه كل هالمصداقيه .. أناأشهد انك ماكذبت ياعزيز يوم قلت اللي قلته عن عبد العزيز الرشيد عزيز عشت ... وتسلم يمينك على هالأسلوب الرائع .. وعلى هالسرد الجميل ..... اسلوبك الروائي ممتع جداً ..... وماينمل منه .. عزيز شجعتني للكتابه عن .... الهارف .. وأذا كنت ماتعرفه .. أقرا عنه عما قريب في هذا القسم أنشاء الله ... ولا يفوووووووووتك تكفى ابي ردك انت بالذات .. أوعدك اني باأكتبه في الايام الجايه علشان ابي اجمع المصادر ( طبعاً ماهي المصادر اللي موجوده في مكتباتنا الغاليه _ لأبن خميس وربعه ) لامصادري غير أنشاء الله بتشوووووووووووووف الموضوع وبيعجبك أنشاء الله وشكراً لأبداعك أخوي عزيز .... أختك سرااااااااااااااااااااااب |
|
|
|
|
08-07-2002, 13:45
|
#15 |
|
رحمة الله عليه
|
اختي سراب الليل الصراحه ياختي احرجتيني بطيبك وآطرائك .... وحياتس الله بين اخوانك في شعبيات . والله شي يوسع الصدر ان الواحد يشوف الاهتمام الشديد منك ياختي في التاريخ وبذات تاريخ اهلنا القريب والشي الوحيد ياختي ان الكاتب ينكره هو شجاعة اخو رثعه (عبدالعزيز المتعب الرشيد) عندك كتاب(صقر الجزيره) لكاتبه (العطار) حط صورة ابن رشيد وتحته (اعظم فارس انجبته الجزيره العربيه) والصراحه انه مااوفاه حقه لانه قال كلام مايقوله الا واحد عاش الفتره الي راحت وبالنسبه ياختي لقصة (الهارف ) تبين الصدق ؟ والله حمستيني للقصه طيب منهو الهارف؟ يعني من شمر والا عنزه والا عتيبه والا حرب والا من الحضر؟ وفي اي زمن هو ؟ <========= والله ياهو مستعجل اختي سراب انا متاكد ان قصة الفارس الهارف ممتعه لكن والله العلي العظيم اني منقهر القصه من اي كتاب؟ شكلها من احد الرواة (الشيبان) منهو طيب...... المرشدي والا الشرهان والا ابوصقر والا ابن جار الله ؟ والله ياختي اني انتظر القصه على احر من الجمر وانشاء الله ان ردي يصير اول رد ================================== بعد اذنتس اختي ابي اخوي المهند اخوي جاسر شفت الرساله لكن يعلم الله عجزت لا ارد والله بصعوبه الين مااسجل الدخول .... وبصعوبه ادخل على الرسايل الخاصه وبصعوبه تطلع لي (الرد على الرساله) ومستحيل ارسل الرساله وتاصلك على العموم ياخال اتمنى انك تعطين وقت تكون فيه بالماسنجر ابيك يابعدي ===================================== اخوي المهستر الحبيب ياحبي لك عطن ماسنجرك ..... تفهم والا اجي اتوطى في <========= خاف عطني ايميلك او خذ ايميلي azez58@hotmail.com |
|
|
|
 |
| عدد المتواجدون في هذا الموضوع » 1 , عدد الأعضاء » 0 , عدد الزوار » 1 | |
|
|
|
|
